މަރު ކޮމިޝަންގެ މެމްބަރު މިސްބާހް އާއި ފަރީޝާ: ރައީސް މުހައްމަދު މުއިއްޒު ވަނީ އެ ކޮމިޝަން އުވާލައްވާފައި (ފޮޓޯ/އެޗްއާރްސީއެމް)
މައްސަލަތައް ނިމިއްޖެކަމަށް ވިދާޅުވެ، މަރު ކޮމިޝަން އުވާލައްވައިފި
މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލަން ކުރީގެ ރައީސް އިބްރާހިމް މުހައްމަދު ސޯލިހް އުފެއްދެވި ރިޔާސީ ކޮމިޝަނާ ހަވާލުކުރި މައްސަލަތައް ނިމިފައިވާ ކަމަށް ވިދާޅުވެ އެ ކޮމިޝަން ރައީސް މުހައްމަދު މުއިއްޒު އުވާލައްވައިފި އެވެ.
ވީ ކިހިނެއް؟ - އެ ކޮމިޝަން އުވާލެއްވީ ރައީސް މުއިއްޒު ސޮއިކުރައްވައި، މިރޭ ނެރުއްވި ހާއްސަ ގަރާރަކުންނެވެ.
ބުނީ ކީކޭ؟ - އެ ގަރާރުގައި ވަނީ އެ ކޮމިޝަންއާ "މަތިކޮށްފައިވާ މަސައްކަތްތައް އެ ކޮމިޝަނުން ނިންމާފައިވާ" ކަމަށެވެ.
ފާހަގަކޮށްލެވޭ ކަމެއް - މޭ މަސް ނިމުމާ އެކު މަރު ކޮމިޝަން އުވާލަން ރައީސް މުއިއްޒު ކަނޑައަޅުއްވާފައި ވާތީ، އެ ކޮމިޝަންގެ ހޯދުންތައް އާންމުކުރަން އަމިއްލަ ބައެއް ޖަމިއްޔާތަކުން ވަނީ ގޮވާލައިފަ އެވެ.
މަރު ކޮމިޝަނުން ބެލި އެންމެ ބޮޑު މައްސަލަތަކުގެ ތެރޭގައި ނޫސްވެރިޔާ ރިލްވާން އަބްދުﷲ ގެއްލުވާލުމާއި ބްލޮގާ ޔާމީން ރަޝީދުގެ މަރުގެ މައްސަލަ ހިމެނެ އެވެ. ނަމަވެސް މިހާތަނަށް އައިއިރު އެ ދެ މައްސަލައިގައި އާއިލާތަކަށް އިންސާފު ލިބިފައެއް ނުވެ އެވެ. އެހެންކަމުން ދެ އާއިލާއިން އަންނަނީ ކަންބޮޑުވުން ފާޅުކުރަމުންނެވެ.
