ސަދަގާތުގެ ގޮތުގައި އެޗުޑީސީއިން އައިއޭސީގެ ގާޒާ ފަންޑަށް 1 މިލިއަން ރުފިޔާ ހަދިޔާކޮށްފި

ހައުސިން ޑިވެލޮޕްމަންޓް ކޯޕަރޭޝަން (އެޗުޑީސީ)އިން އިންޓަނޭޝަނަލް އެއިޑް ކެމްޕޭން (އައިއޭސީ)ގެ ގާޒާ އިމަޖެންސީ ރިލީފް ފަންޑަށް އެއް މިލިއަން ރުފިޔާ ހަދިޔާކޮށްފި އެވެ.

ތަފްސީލު - އައިއޭސީއިން މިއަދު ނެރުނު ބަޔާނެއްގައި ބުނީ އެޗުޑީސީއިން ސަދަގާތުގެ ގޮތުގައި ހަދިޔާކުރި އެއް މިލިއަން ރުފިޔާ އެ ޖަމިއްޔާގެ ގާޒާ އެމަޖެންސީ ރިލީފް ފަންޑަށް ލިބިފައިވާ ކަމަށެވެ.

އެކަމަށް ޝުކުރު އަދާކޮށް އައިއޭސީއިން ބުނީ އެ އެހީ އޭގެ ހައްގުވެރި ފަރާތަށް ފޯރުކޮށްދޭނެ ކަމަށާއި އޭގެ ތަފްސީލު ވެސް ހާމަކުރާނެ ކަމަށެވެ.

ގުޅުންހުރި ކަމެއް - އައިއޭސީއާ ގުޅިގެން ހަނގުރާމައިގެ ސަބަބުން ސުންނާފަތިވެ، ހާލުގައި ޖެހިފައިވާ މުސްލިމް ގައުމުތަކަށް އެހީތެރިވުމަށް އެޗުޑީސީއިން މިދިޔަ އަހަރު އެއްބަސްވުމެއްގައި ވެސް ސޮއިކޮށްފައިވެ އެވެ.

ފާހަގަކޮށްލެވޭ ކަމެއް - އައިއޭސީގެ މަގްސަދާ މެދު ސުވާލު އުފައްދައި، އެ ޖަމިއްޔާއިން މަކަރާއި ހީލަތް ހަދާ ކަމަށް މީގެ ކުރިން ސޯޝަލް މީޑިއާގައި އެކި ފަރާތްތަކުން ތުހުމަތުތަކެއް ކުރި އެވެ.

އެ މީހުން އެންމެ ބޮޑަށް ފާހަގަ ކުރަނީ، ހަދިޔާ ކުރާ ފައިސާއިން ޖަމިއްޔާގެ އިދާރީ ހިންގުމަށް %12.5 ނަގާއިރު، އޭގެ ތަފްސީލު އާއްމު ނުކުރާ ކަމަށް ބުނެ އެވެ.

އެ މީހުން ބުނާ ގޮތުގައި:

އެ ތުހުމަތުތަކާ ގުޅިގެން އޭރު އެ ޖަމިއްޔާއިން ބުނީ ހަރަދުކުރާ ގޮތުގެ ތަފްސީލު، ކުރިއަށް އޮތް ތަނުގައި މީޑިއާ މެދުވެރިކޮށް އާއްމު ކުރާނެ ކަމަށެވެ. އަދި އޮޑިޓް ރިޕޯޓު ހާމަ ކުރާނެ ކަމަށް ކުރިން ބުނި ނަމަވެސް އަދި މިހާތަނަށް އައިއިރު އެ ޖަމިއްޔާއިން އެކަމެއް ނުކުރެ އެވެ.