އަނަސްގެ މަރުގެ މައްސަލާގައި ކުށް ސާބިތުނުވެގެން ދޫކޮށްލި ދެ މީހަކު އިތުރު މައްސަލައެއްގައި ހައްޔަރުކޮށްފި

މާލޭގައި މީގެ ހަ އަހަރު ކުރިން ތޫނު އެއްޗަކުން ހަމަލާދީ މަރާލި މުހައްމަދު އަނަސްގެ މަރުގެ މައްސަލާގައި ކުށް ސާބިތުނުވެގެން ދޫކޮށްލާފައި ހުރި ދެ މީހަކު އިތުރު މައްސަލައެއްގައި ހައްޔަރުކޮށްފި އެވެ.

ވީ ކިހިނެއް؟ - އެކަން ހާމަކުރީ ހޯމް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި ޑެޕިއުޓީ ޕޮލިސް ކޮމިޝަނަރު އިސްމާއިލް ނަވީން އެވެ. އޭނާ ވިދާޅުވީ އަނަސްގެ މަރުގެ މައްސަލައިގެ ޝަރީއަތް ނިންމި ގޮތުގެ ރިޕޯޓު ނުލިބިގެން އެ މައްސަލަ އިސްތިއުނާފް ކުރުން ލަސްވަމުންދާ ކަމަށެވެ.

އަދި، އެކަން އެހެން އޮއްވައި، ރޭގައި ލޯންޗެއް ހުއްޓުވައި ބަލައި ފާސްކުރުމުގެ ތެރެއިން މަސްތުވާތަކެއްޗާއި ގިނަ އަދަދެއްގެ ބަނގުރަލާ އެކު ހައްޔަރުކުރި މީހުންގެ ތެރޭގައި އަނަސްގެ މަރުގެ މައްސަލަ ސާބިތުނުވެގެން މިފަހުން ދޫކޮށްލި މީހަކު ހިމެނޭ ކަމަށް އޭނާ ވިދާޅުވި އެވެ.

"އެހެންވީމަ [އަނަސްގެ މަރުގެ މައްސަލާގައި ހިމެނޭ ކަމަށް ތުހުމަތުވާ މީހުން ދޫވެފައި ތިބުމުގެ] ކަންބޮޑުވުން ހުރި މިންވަރު އަޅުގަނޑުމެން މިފާހަގަކޮށްލީ. އަދި ރޭގައި ވެސް އެ ކުށް ކުރި މީހަކު އަޅުގަނޑުމެންގެ ބެލުމުގެ ދަށަށް ގެނެސްފައިވަނީ،" ނަވީން ވިދާޅުވި އެވެ.

އޭނާ ވިދާޅުވީ އެ މައްސަލައިގެ ތަފްސީލީ މައުލޫމާތު ހާމަކުރަން އަންނަ އާދިއްތަ ދުވަހު ނޫސްވެރިންގެ ބައްދަލުވުމެއް ބާއްްވާނެ ކަމަށެވެ. 

އެނގުން މުހިންމު - އަނަސް، ފެންފިޔާޒުގޭ/ރ. މީދޫ، އަނިޔާވެރި ގޮތަކަށް މަރާލީ 31 ޖުލައި 2017ގަ އެވެ. މި މައްސަލާގައި އަށް މީހެއްގެ މައްޗަށް ދައުވާކުރި އިރު، އޭގެތެރެއިން ކުށް ސާބިތުވީ އެންމެ މީހަކަށެވެ. އެއީ އެމައްސަލާގައި ހައްޔަރުކުރީ އޭރު 18 އަހަރު ނުފުރޭ ކުޑަކުއްޖާގެ މައްޗަށެވެ. މިދިޔަ ސަރުކާރުގައި އޭނާގެ ޖަލު ހުކުމަށް ރައީސް އިބްރާހިމް މުހައްމަދު ސޯލިހް ވަނީ މައާފް ދެއްވައިފަ އެވެ.

ދެން މި މައްސަލާގައި ހިމެނޭ ހަތް މީހުންގެ މައްޗަށް ކުށް ސާބިތުނުވާ ކަަމަށް މިދިޔަ މަހު ކްރިމިނަލް ކޯޓުން ހުކުމް ކުރުމުން، އަނަސްގެ މަރަށް ހަ އަހަރު ފަހުން އެ އެންމެން މިހާރު ވަނީ މިނިވަންވެފަ އެވެ. 

މި މައްސަލަ ކްރިމިނަލް ކޯޓުގައި ބެއްލެވި ގާޒީ އަލީ ނަދީމް ވިދާޅުވީ އެ ދައުވާތައް ސާބިތުކުރަން ފުލުހުން ހުށަހަޅާފައިވާ، ހެކި ގަރީނާތަކުން، އެ ކުށުގައި އެ މީހުން ބައިވެރިވެފައިވާކަން އެކަށީގެންވާ ޝައްކެއް ނެތް މިންވަރަށް ސާބިތުކޮށް ނުދެވޭ ކަމަށެވެ.