އޭޖީގެ ބަޔާނުން އެނގެނީ ކަނޑު ގެއްލުންކަމަށް ބުނެ ހެދީ ދޮގުކަން: އެމްޑީޕީ

ރާއްޖޭގެ ކަނޑުގެ ސަރަހައްދުން ބައެއް ގެއްލުނު ކަމަށް ބުނެ، އެ ސަރަހައްދު އަލުން ހޯދަން ކުރާ މަސައްކަތާ ބެހޭ ގޮތުން އެޓާނީ ޖެނެރަލްގެ އޮފީހުން ނެރުނު ނޫސް ބަޔާނުން، ކަނޑު ގެއްލުނުކަމަށް ބުނެ މި ސަރުކާރުން ދައްކަނީ ދޮގު ވާހަކަތަކެއްކަން އެނގޭ ކަމަށް އެމްޑީޕީން މިއަދު ބުނެފި އެވެ.

ވީ ކިހިނެއް؟ - ރާއްޖެ އާއި ޗާގޯސްއާ ދެމެދު ފުށުއަރާ ކަނޑުގެ ސަރަހައްދުގެ އިން ވަކިކުރުމުގެ މައްސަލައިގައި ބައިނަލްއަގުވާމީ ކަނޑުގެ ގާނޫނާ ބެހޭ ޓްރައިބިއުނަލުން ނިންމި ނިންމުން ބަދަލުކުރެވިދާނެ ކަމަށް ކަމާ ބެހޭ ގާނޫނީ މާހިރުން ލަފާދީފައި ވާތީ، އެ މަސައްކަތް ފަށާފައިވާ ކަމަށް ބުނެ ބަންޑާރަ ނައިބުގެ އޮފީހުން ވަނީ ހޯމަ ދުވަހު ބަޔާނެއް ނެރެފަ އެވެ.

އެ ބަޔާނުގައި އޭޖީ އޮފީހުން ފާހަގަކޮށްފައިވާ ގޮތުގައި:

ބުނީ ކީކޭ؟ - އެ ބަޔާނާ ގުޅިގެން މިއަދު އެމްޑީޕީން ނެރުނު ނޫސްބަޔާނެއްގައި ބުނީ އޭޖީ އޮފީހުގެ ނޫސްބަޔާނުން އެ މައްސަލަ އިސްތިއުނާފުކުރެވޭނެކަން ނުވަތަ ނުކުރެވޭނެކަން ވެސް ސާފުނުވާ ކަމަށެވެ. އެ ޕާޓީން ބުނި ގޮތުގައި، އޭޖީގެ ބަޔާނުން:

"28 އެޕްރީލް 2023ގައި އިޓްލޮސް އިން ކޮށްފައިވާ ހުކުމާ ގުޅޭ ގޮތުން އެ ދުވަހުން ފެށިގެން އޭރުގެ އިދިކޮޅު ފަރާތްތަކުން ދައްކަމުން ގެންދިޔަ ވާހަކަތަކުގައި އެއްވެސް ބުރަދަނެއް ހުރިކަން ދައްކުވައިދޭ ކަމެއް އެ ހުކުމުގެ ފަހުން 10 މަސްދުވަސް މިހާރު ފާއިތުވެފައިވާއިރު ވެސް ދެއްކިފައެއް ނެތެވެ،" އެމްޑީޕީގެ ބަޔާނުގައިވެ އެވެ.

"ނޫސްބަޔާނުން އެނގޭ ގޮތުން ކުރެވުނުހާ ވެސް ކަމަކީ، 'ކަމާ ބެހޭ ތަޖުރިބާކާރުން' ކަމަށް ބުނާ، އެއީ ކޮން ބައެއްކަން ނޭނގޭ ބަޔެއްގެ ގާނޫނީ ލަފާ ހޯދުމެވެ."

އިދިކޮޅު އެންމެ ބޮޑު ޕާޓީން ފާހަގަކުރި ގޮތުގައި:

މައްސަލައިގެ ފުރަތަމަ މަރުހަލާތަކުގައި ކުރީގެ ރައީސް އިބްރާހިމް މުހައްމަދު ސޯލިހުގެ   ސަރުކާރުން އަމަލުކުރީ "ވަރަށް ޒިންމާދާރުކަން ކުޑަ ގޮތަކަށް" ކަމަށް ނޫސް ބަޔާނުގައި ބުނާއިރު، އަދި ނެގެން ހުރި ގިނަ ދިފާއުތަކެއް ނަގާފައިނުވާކަމަށް ބުނާއިރު، މައްސަލައިގެ ނޯޓިސް ސަރުކާރަށް ލިބުމުން ސަރުކާރުން ވަނީ ކަމާ ގުޅޭ ބައިނަލްއަގުވާމީ ތަޖުރިބާކާރުންގެ ޓީމެއް އެކުލަވާލައި، ފުރިހަމަ ކުރަން ޖެހޭ އިޖުރާއަތްތައް ފުރިހަމަ ކޮށްފައި ކަމަށް ވެސް އެމްޑީޕީގެ ބަޔާނުގައި ފާހަގަކުރި އެވެ.

މީގެ އިތުރުން:

"މައްސަލަ މައުލޫއީ ގޮތުން ބެލުމުގެ މަރުހަލާގައި ދިވެހިރާއްޖެ ތަމްސީލުކުރުމަށްޓަކައި މި ދާއިރާއިން ފާހަގަކޮށްލެވޭ ތައުލީމާއި ތަޖުރިބާހުރި ބައިނަލްއަގުވާމީ ވަކީލުންނާއި ހައިޑްރޯގްރަފީ އަދި ޖިއޮލޮޖީ ދާއިރާގެ ހަބީރުންގެ މައްޗަށް އެކުލެވޭ ޓީމެއް އައްޔަނުކޮށް، ދިވެހިރާއްޖޭގެ ފަރާތުން ހުށަހެޅުންތައް ހުށަހަޅާފައިވާނީ ދިވެހިރާއްޖެއަށް އެންމެ ބޮޑު ސަރަހައްދެއް ލިބޭނެ ފަދަ ގޮތަކަށް ދިވެހިރާއްޖޭގެ އެންމެ މަތީ މަސްލަހަތުތައް ހިމާޔަތްކުރުމަށް އިސްކަން ދީގެންނެވެ. މި މައްސަލައިގައި ބައިނަލްއަގްވާމީ ހަމަތަކުގެ މަތިން އިޓްލޮސްގައި ވާނީ އެންމެ ފުރިހަމައަށް ދިފާއު ހުށަހަޅާފައެވެ،" އެމްޑީޕީން ބުންޏެވެ.

އެ ދިފާއު ހުށަހެޅުމުގައި ބައިވެރިވި މާހިރުން ވަކިވަކިން ފާހަގަކޮށް، އެމްޑީޕީގެ ބަޔާނުގައި އެބޭފުޅުންގެ ގާބިލުކަމާއި ތަޖުރިބާގެ ފެންވަރު ތަފްސީލްކޮށްދީފައިވެ އެވެ.

"ކަންމިހެން އޮތްއިރު، އިޓްލޮސްގައި ރާއްޖެއިން އަމަލުކޮށްފައިވަނީ ޒިންމާދާރުކަން ކުޑަ ގޮތަކަށް ކަމަށް މިހާރުގެ ސަރުކާރުން ބުނާއިރު، އެފަދައިން ބުނާ ސަބަބެއް ބުނެދެވިފައެއް ނުވެ އެވެ. އެފަދައިން ލަފާދިން "ހަބީރުން" ނަކީ ކޮބައިކަމެއް ނޭނގެ އެވެ. އެ މީހުންގެ ތައުލީމާއި ތަޖުރިބާ ސާފެއް ނޫނެވެ. އެމީހުން ބުނި އެއްޗެއް ވެސް މިހާރުގެ ސަރުކާރުން ހާމައެއް ނުކުރެ އެވެ،" އެމްޑީޕީން ބުންޏެވެ.

"ހަމައެކަނި ފެންނަނީ ސިޔާސީ ގޮތުން ނެރެފައިވާ ދިވެހި ބަހުން އޮތް ނޫސްބަޔާނެކެވެ. ސަރުކާރަށް ލަފާދިން 'ހަބީރުން'ގެ މައުލޫމާތާއި، އެ ފަރާތްތަކުން ތައްޔާރުކުރި ލިޔުން، އޮތް ގޮތަށް، އުނިއިތުރަކާނުލައި، ރައްޔިތުންނަށް ހާމަކުރުމަށް އަޅުގަނޑުމެން ގޮވާލަމެވެ."