ރައީސް ބޭނުންވަނީ ރޯދަ މަހު އިންތިހާބު ބާއްވަން

ކުރިއަށް އޮތް ރައްޔިތުންގެ މަޖިލީހުގެ އިންތިހާބު ރޯދަ މަހު ނުބޭއްވުމަށް މަޖިލީހުން ފާސްކޮށް އެ ބިލު ތަސްދީގު ކުރުމަށް ރައީސް މުހައްމަދު މުއިއްޒަށް ފޮނުވާފައިވީ ނަމަވެސް، އެމަނިކުފާނު އިންތިހާބު ބާއްވަން ބޭނުންފުޅުވަނީ ރޯދަ މަހުގައި ކަން ދޭހަވާ މޭރުމަކުން މިއަދު ވާހަކަފުޅު ދައްކަވައިފި އެވެ.

ވީ ކިހިނެއް؟ - ރައީސް މިފަދައިން ވާހަކަދެއްކެވީ، އެމަނިކުފާނު މިވަގުތު ވަޒީރުންނާ އެކު ދެކުނުގެ އަތޮޅުތަކަށް ކުރައްވަމުންގެންދަވާ ދަތުރުފުޅުގައި އައްޑޫ ހުޅުމީދުއަށް ވަޑައިގެން ބޭއްވި ޖަލްސާގަ އެވެ.

ބުނީ ކީކޭ؟ - މަޖިލިސް އިންތިހާބުގެ މެޖޯރިޓީ ސަރުކާރަށް ދިނުމަށް އެދިވަޑައިގެން ދެއްކެވި ވާހަކަފުޅުގައި، ރައީސް ވިދާޅުވީ އެ އިންތިހާބުގެ ވޯޓުލުން އޮންނާނީ އަންނަ މަހުގެ 17ގައި ކަމަށެވެ.

"މި ރަނުގެ ފުރުސަތު ތިޔަ ބޭފުޅުންގެ އަތްޕުޅަށް ކުރިއަށް އޮތް މަހުގެ 17 ވަނަ ދުވަހު ލިބިގެންދާ އިރުގައި، އެ ފުރުސަތަކީ ތިޔަ ބޭފުޅުން ޒިންމާދާރުކަމާ އެކީގައި، ތެދުވެރިކަމާއި އިހުލާސްތެރިކަމާ އެކީގައި، ތިޔަ ބޭފުޅުންނަށްޓަކައި، މި ސަރުކާރުން ތިޔަ ބޭފުޅުން ތިޔަ އެދިލައްވަމުން ގެންދަވާ ކަންކަން ކުރުމަށް މަގުފަހިކޮށްދިނުމަށްޓަކައި ކަންކަން ނިންމައިދޭ އިންތިހާބަކަށް ހަދައިދިނުމަކީ ތިޔަ ބޭފުޅުން ކުރައްވާނެ ކަމެއް ކަމަށް އަޅުގަނޑު ޔަގީންކުރަން،" ރައީސް ވިދާޅުވި އެވެ.

އެނގުން މުހިއްމު - ރޯދަ މަސް ނިމޭ ފަހުން މަޖިލިސް އިންތިހާބު ބާއްވާ ގޮތަށް އިންތިހާބުތަކާ ބެހޭ އާންމު ގާނޫނަށް އެމްޑީޕީގެ ފަރާތުން ހުށަހެޅި އިސްލާހު މަޖިލީހުން ފާސްކޮށްފައި ވަނީ މިދިޔަ ހަފްތާގެ އާދިއްތަ ދުވަހު އެވެ. މަޖިލީހުން 'ދައުރު'އަށް ކަށަވަރުކޮށްދިން ގޮތުގައި ޖެހިގެން އައި ހޯމަ ދުވަހު އެ ބިލު ތަސްދީގު ކުރުމަށް ރައީސް އޮފީހަށް ވަނީ ފޮނުވައިފަ އެވެ.

އޭގެ ފަހުން މިހާރު ހަފްތާއެއްހާ ދުވަސް ފާއިތުވި އިރު މިހާތަނަށް ރައީސް އެ ބިލު ތަސްދީގެއް ނުކުރައްވަ އެވެ. ސަރުކާރުގެ ބައެއް އޮފިޝަލުން ނުރަސްމީކޮށް 'ދައުރު'އަށް ދީފައިވާ މައުލޫމާތުތަކުން އެނގޭ ގޮތުގައި މަޖިލިސް އިންތިހާބު ފަސްކުރަން ސަރުކާރުން ބޭނުމެއް ނުވެ އެވެ. އެހެންވެ އެ ބިލު ރައީސް ތަސްދީގު ކުރެއްވުމަކީ ދުރު ކަމެއް ކަމަށް ބެލެވެ އެވެ.

ބިލް ތަސްދީގު ކުރެއްވުން ލަސްވާތީ އެމްޑީޕީގެ ފަރާތުން ވަނީ ކަންބޮޑުވުން ވެސް ފާޅުކޮށްފަ އެވެ.

"އަޅުގަނޑުމެން ހިއެއް ނުކުރަން، ރައީސުލްޖުމްހޫރިއްޔާ އެހާ ނޭއްގާނީ ވެދާނެ ކަމަށް. ރާއްޖޭގެ މުސްތަގުބަލުގެ ކަންކަން ނިންމަން މެންބަރުން އިންތިހާބު ކުރާ އިންތިހާބެއްގައި ވޯޓުލުމަށް ގިނަ މީހުން ބައިވެރިވެވޭނެ ގޮތަށް މަޖިލީހުން ބިލު ފާސްކުރީމަ، ރައީސުލްޖުމްހޫރިއްޔާ ވެސް އެކަން [ތަސްދީގު] ކުރާނެ ކަމަށް ހީކުރީ،" ފައްޔާޒު އިއްޔެ 'ދައުރު'އަށް ވިދާޅުވި އެވެ.

"އަޅުގަނޑުމެން އެކަމާ އަޅާނެ ފިޔަވަޅަކަށް މަޝްވަރާ ކުރަމުން މިދަނީ." 

ގާނޫނުއަސާސީގައިވާ ގޮތުން:

އެހެންކަމުން، އެ ބިލު ތަސްދީގު ކުރަން ބޭނުންފުޅުނުވާ ނަމަ، ރައީސް އެ ބިލު ފޮނުއްވާނީ އަނބުރާ މަޖިލީހަށެވެ.

އަނބުރާ ފޮނުވާލެއްވި ނަމަވެސް، އަލުން އަނެއްކާވެސް ބިލު އޮތް ގޮތަށް މަޖިލީހުން ފާސްކުރާނެ ކަމަށް އަގުލަބިއްޔަތު މެންބަރުން ތިބި އެމްޑީޕީ އާއި ޑިމޮކްރެޓްސްއިން ވަނީ ބުނެފަ އެވެ. އެ ދެ ޕާޓީގެ މެންބަރުންގެ އަދަދަކީ 54 އެވެ.

ފާހަގަކޮށްލެވޭ - މި ބިލު މަޖިލީހަށް ފުރަތަމަ ހުށަހެޅިއިރު ޕީއެންސީން ފުރަތަމަ ބުނެފައިވަނީ ރޯދަ މަހުގެ ފަހުގެ ތާރީހަކަށް އިންތިހާބު ބޭއްވުމަކީ އެ ޕާޓީއަށް މައްސަލައެއް ނޫން ކަމަށެވެ. ނަމަވެސް މަޖިލީހުގައި ބިލަށް ބަހުސް ކުރި އިރު އެ ޕާޓީގެ މެންބަރުން އިންތިހާބު ފަސްކުރަން ދެކޮޅު ހެއްދެވި އެވެ. 

ބިލު މަޖިލީހުން ފާސްކުރީ ވޯޓުގައި ބައިވެރިވި 49 މެމްބަރުންގެ ތެރެއިން 46 މެމްބަރުންގެ ތާއީދާ އެކު އެވެ. އެ ބިލު ފާސްކުރަން ނުފެންނަ ކަމަށް ވޯޓުދިނީ އެމްޑީޕީން ވަކިވެ ފަހުން ޕީއެންސީއަށް ސޮއި ކުރެއްވި ތިން މެމްބަރެކެވެ. އޭގެ ތެރޭގައި ހިމެނެނީ:

މަޖިލިސް އިންތިހާބު ބާއްވަން މިހާރު އިލެކްޝަންސް ކޮމިޝަނުން ނިންމާފައި ވަނީ 17 މާޗްގަ އެވެ. އެއީ ރޯދަ މަހުގެ ކުރީ ކޮޅެވެ. އިސްލާހު ގެނެސްފައި ވަނީ ރޯދަ މަސް ނިމި 10 ދުވަސް ފަހުން އިންތިހާބު ބޭއްވުމަށެވެ. އެގޮތަށް ބާއްވާ ނަމަ، އެންމެ އަވަހަށް ވެސް މަޖިލިސް އިންތިހާބު ބޭއްވޭނީ އެޕްރީލް 21 ނުވަތަ 22ގަ އެވެ.