އާބަންކޯގެ ސީއޯއޯއަކަށް އަހްމަދު އިބްރާހީމް؛ ފުރަތަމަ އަމާޒަކީ 'ޖަރީމާތައް' ބެލުން

ހުޅުމާލެ ހިނގަމުން އަންނަ އާބަންކޯގެ ޗީފް އޮޕަރޭޓިން އޮފިސަރުގެ މަގާމަށް އަހްމަދު އިބްރާހީމް (ޕޮކަންޑި) ހަމަޖައްސައިފި އެވެ. އެއާ އެކު، އޭނާ ވިދާޅުވީ، އެންމެ އިސް އަމާޒަކީ މިދިޔަ ސަރުކާރުގައި ހިންގި ޖަރީމާތައް ބެލުން ކަމަށެވެ.

ވީ ކިހިނެއް؟ - އާބަންކޯގެ ސީއީއޯގެ މަގާމަށް އަހްމަދު އިބްރާހީމް އައްޔަން ކުރުމަށް އެ ކުންފުނީގެ ބޯޑުން ނިންމީ މިދިޔަ ހޯމަ ދުވަހު އެވެ. އެއާ އެކު އޭނާ ވަޒީފާއަށް ނުކުތުމަށް މިހާރު ވަނީ އަންގައިފަ އެވެ. ނަމަވެސް އެ ކުންފުނިން މިކަން އަދި ރަސްމީކޮށް އިއުލާނެއް ނުކުރެ އެވެ.

ބުނީ ކީކޭ؟ - "އަޅުގަނޑު އެންމެ ބޮޑަށް އިސްކަންދޭ ކަންކަމުގެ ތެރޭގައި ފާއިތުވި ފަސް އަހަރު އާބަންކޯ ތެރޭގައި ހިންގި ޖަރީމާތައް ބެލުން އޮންނާނެ،" މަގާމަށް އައްޔަން ކުރި ހަބަރާ އެކު އާންމުން މަރުހަބާ ކިޔަން ފެށުމުން، ރޭ އަހްމަދު އެކްސްގައި ކުރެއްވި ޕޯސްޓެއްގައި ވިދާޅުވި އެވެ.

ތަފްސީލު - އަހްމަދު މިދިޔަ ސަރުކާރުގެ ކޮރަޕްޝަންގެ މައްސަލަތަކާ ބެހޭ ގޮތުން އެންމެ ގަދައަށް ލިޔުންތައް ޝާއިއު ކުރި ދިޔަރެސް ނޫހުންގެ ކޯ-ފައުންޑަރު އަހްމަދު އިބްރާހީމް، އެ ޕޯސްޓުގައި އިތުރަށް ވިދާޅުވި ގޮތުގައި، ރައީސް އިބްރާހިމް މުހައްމަދު ސޯލިހްގެ ސަރުކާރު ނިމުމުގެ ކުރިން ހުޅުމާލޭގެ ބިންތައް 'ކަޅު ފައިސާގެ ދަހިވެތިކަމުގައި ބަހާލުމަކީ ބޮޑު ޖަރީމާއެއް' ކަމަށެވެ.

އެ ބިންތަކަކީ ދިވެހި ރައްޔިތުންގެ ދިރިއުޅުމާއި ކުރިމަގާ ގުޅިފައިވާ ބިންތަކެއްކަން ފާހަގަކޮށް، އޭނާ ދެއްވި ޔަގީން ކަމަކީ، އެ 'ޖަރީމާތައް' ބަލާނެ ކަމުގެ ޔަގީން ކަމެވެ.

ފާހަގަކޮށްލެވޭ ކަމެއް - ޝަރުއީ ދާއިރާއިން ތައުލީމް ހާސިލު ކުރައްވައިގެން ހުންނެވި އަހްމަދު އިބްރާހީމް މީީގެ ކުރިން ވަޒީފާ އަދާ ކުރެއްވީ ހުޅުމާލޭ މެޖިސްޓްރޭޓް ކޯޓުގެ  އޮފިސަރަކަށެވެ. ސޯލިހްގެ ސަރުކާރާ ދެކޮޅަށް ޓުވީޓްތަކެއް ކުރި މައްސަލާގައި އޭނާ މަގާމުން ވަކިކުރީ، ނޮވެމްބަރު 2021ގަ އެވެ. ޑިޕާޓްމަންޓު އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)އިން އޭރު ބުނެފައިވާ ގޮތުން އޭނާ މަގާމުން ވަކިކުރީ، ޝަރުއީ ދާއިރާގެ މުވައްޒަފުންގެ ކޯޑު އޮފް ކޮންޑަކްޓާ އެތައް ފަހަރަކު ހިލާފުވެގެންނެވެ.

އޭގެ ފަހުން އެ ސަރުކާރާ ދެކޮޅަށް ވަރަށް ބޮޑަށް ފާޑުވިދާޅުވެ، ޓުވިޓާގައި ވަރަށް ހަރަކާތްތެރިކޮށް އުޅުއްވި އެވެ. އަދި ރާއްޖޭގައި ތިބި އިންޑިއާ ސިފައިންގެ ބޭރުކުރުމަށް ވަރަށް ބޮޑަށް ވަކާލާތު ކުރެއްވި އެވެ.

ގުޅުން ހުރި ކަމެއް - އަހުމަދުއާ ދެކޮޅަށް ޑީޖޭއޭ އިން ސީރިއަސް އެހެން ތުހުމަތުތަކެއް ވެސް އޭރު ކުރި އެވެ. އޭގެ ތެރެއިން އެންމެ ބޮޑު މައްސަލައެއްގެ ގޮތުގައި ފާހަގަކޮށްފައި ވަނީ، މަސްތުވާތަކެތި ޓްރެފިކް ކުރުމުގެ މައްސަލައެއްގެ ދައުވާ ފޯމު، ދައުލަތުން 2017 ވަނަ އަހަރު ހުޅުމާލޭ މެޖިސްޓްރޭޓް ކޯޓަށް ހުށަހެޅުމުން، ކޯޓުން މައްސަލަ ބަލައި ގަނެ އެންޓްރީ ކޮށްފައިވަނިކޮށް އެއަށް ބަދަލު ގެނައުމެވެ. ނަމަވެސް އެކަން އޭނާ އޭރު ދޮގު ކުރެއްވި އެވެ.