215 ކިލޯގެ ޑްރަގުގެ މައްސަލައިގައި ހައްޔަރުކުރި ދެ މީހުން. (ފޮޓޯ/ ފުލުހުން)
215 ކިލޯ ޑްރަގުގެ މައްސަލައިގައި ހައްޔަރުކުރި 2 މީހުން ޝަރީއަތް ނިމެންދެން ބަންދުކޮށްފި
މިދިޔަ މަހުގެ 15ގައި ފަޅު ރަށެއްގައި ފޮރުވާފައި ހުއްޓައި ފުލުހުން އަތުލި 215 ކިލޯގެ މަސްތުވާތަކެއްޗާ ގުޅުންހުރި ކަމަށް ތުހުމަތުކުރެވޭ ދެ މީހުން ޝަރީއަތް ނިމެންދެން ބަންދުކުރަން ކްރިމިނަލް ކޯޓުން އަމުރުކޮށްފި އެވެ.
މައްސަލައިގެ ފެށުން - ފުލުހުންގެ ޑްރަގް އެންފޯސްމަންޓް ޑިޕާޓްމަންޓް (ޑީއީޑީ) އާއި ޑްރަގު އިންޓެލިޖެންސް ޔުނިޓާއި މެރިން ޕޮލިސް އަދި ރ. އަތޮޅު ޕޮލިސް ގުޅިގެން ހިންގި އޮޕަރޭޝަނެއްގައި އެ ޑްރަގުތައް އަތުލައިގަތީ ރ. ރާނބުގަލީގައި ހުރި ކަށިކެޔޮގަހެއްގެ ތެރޭގައި ފޮރުވާފައި ހުއްޓަ އެވެ.
އެ އޮޕަރޭޝަންގައި ފުލުހުން ދެ މީހަކު ހައްޔަރުކުރި އެވެ. އެ ދެ މީހުން ހައްޔަރުކުރީ "ފެށުން 2" ކިޔާ ލޯންޗެއްގައި ރ. މަޑުއްވަރިއަށް ވަތް ވަގުތު އެ ލޯންޗު ހުއްޓުވައި ބަލައި ފާސްކުރުމަށް ފަހު އެވެ.
އެ މައްސަލައާ ގުޅިގެން ހައްޔަރުކޮށްފައި ވަނީ:
-
އަލީ ޝާކިރު (42އ): ރ. މަޑުއްވަރީ، ފިނިފަރު
-
ނިމާލް އަބްދުލްހާރިސް (33އ): މަޑުއްވަރި، ފެހިއަލި
ވީ ކިހިނެއް؟ - އެ ދެ މީހުންގެ ބަންދާ މެދު ގޮތެއް ނިންމަން އިއްޔެ ކްރިމިނަލް ކޯޓަށް ހާޒިރުކުރުމުން ޝަރީއަތް ނިމެންދެން ނުވަތަ ފަނޑިޔާރު އެހެން ގޮތަކަށް ކަނޑައަޅަންދެން ދެ މީހުން ވެސް ބަންދުކުރަން ވަނީ އަމުރުކޮށްފަ އެވެ.
ގުޅުންހުރި ކަމެއް - އެ މައްސަލައިގައި މީގެ ކުރިން ބޭއްވި ބަންދު މަޖިލީހުގައި، ހައްޔަރުކޮށްފައި ތިބި ދެ މީހުންނަށް ފުލުހުން އަނިޔާކުރި ކަމަށް އެ މީހުން ކޯޓުގައި ބުނުމުން، އެ މައްސަލަ ތަހުގީގުކުރަން އެޗްއާރްސީއެމްއަށް ކްރިމިނަލް ކޯޓުން އެންގި އެވެ. އަދި އަލީ ޝާކިރު ޑޮކްޓަރަށް ދައްކައި އެކަށީގެންވާ ސިއްހީ ފަރުވާ ފޯރުކޮށްދިނުމަށް ފުލުހުންނަށް އަމުރުކޮށް، ފަރުވާގެ ލިޔުންތައް ދެން އޮންނަ ބަންދު މަޖިލީހަކަށް ހުށަހަޅަން ގާޒީ އެންގެވި އެވެ.
ނަމަވެސް އިއްޔެގެ ބަންދު މަޖިލީހަށް ދިޔަ އިރު ވެސް އޭނާ ޑޮކްޓަރަށް ދައްކާފައެއް ނުވެ އެވެ. ފުލުހުން ކޯޓުގައި ބުނީ އަލީ ޝާކިރު ޑޮކްޓަރަށް ދައްކާފައި ނުވަނީ އެކަމަށް އޭނާ އެދިފައި ނުވާތީ ކަމަށެވެ. ދިފާއުގައި އަލީ ޝާކިރު ބުނީ ޑޮކްޓަރަށް ދައްކަން އެދިފައި ނުވަނީ ދޫނިދޫ ކަސްޓޯޑިއަލްގައި ހުންނަ ޑޮކްޓަރު ކޮންމެ ފަހަރަކު ވެސް އެއް ބޭސްތަކެއް ދޭތީ ކަމަށެވެ.
އިއްޔެ ކްރިމިނަލް ކޯޓުން ވަނީ ހަތް ދުވަހުގެ ތެރޭގައި އަލީ ޝާކިރު ޑޮކްޓަރަށް ދައްކައި ލިޔެކިޔުންތައް ކޯޓަށް ހުށަހަޅަން އަމުރުކޮށްފަ އެވެ.
އޮޕަރޭޝަންގެ ތަފްސީލް - އިންޓެލިޖެންސް މައުލޫމާތަށް ބަލައި ފާސްކުރިއިރު ފުލުހުންނަށް ފެނުނު ތަކެތީގެ ތެރޭގައި ހިމެނެނީ:
-
ސެޓެލައިޓް ފޯނެއް
-
ގިނަ އަދަދެއްގެ ޕެޓްރޯލް ހަން
-
ދެ މީހުންގެ ހަށިގަނޑުގައި ވެލީގެ އަސަރު ހުރި
-
ލޯންޗުގެ އަރިމަތިން، އިތުރު ބޯޓަކާއި ލޯންޗު ކައިރި ކުރިކަމުގެ ނިޝާން ހުރި
ފުލުހުން ބުނީ އެ މީހުންގެ އަތުން ހޯދި ސެޓެލައިޓް ފޯނުގެ އެކްސްޓްރެކްޝަން ރިޕޯޓަށް ބެލުމުން، އެ މީހުން ރާއްޖެ ސަރަހައްދުން ބޭރަށް ދިޔަ ކަމުގެ މެސެޖުތަކާ އަދި އެހެން ބޯޓަކާ ބައްދަލުކުރިކަމުގެ މެސެޖުތަކެއް ފެނުނު ކަމަށެވެ.
ބުނީ ކީކޭ؟ - އެ އޮޕަރޭޝަނާ ގުޅޭ ގޮތުން، ޑީއީޑީގެ ވެރިޔާ، ސުޕްރިންޓެންޑެންޓު އޮފް ޕޮލިސް އަހުމަދު ޝާކިރު 'ދައުރު'އަށް ކުރިން ވިދާޅުވެފައިވާ ގޮތުގައި، ތަހުގީގަށް މިހާތަނަށް ހޯދުނު މައުލޫމާތަށް ބަލާއިރު، އެއީ ރާއްޖެ އެތެރެކުރަން ގެނައި މަސްތުވާތަކެތި ކަމަށް ނުބެލެވޭ ކަމަށެވެ.
ޝާކިރު ވިދާޅުވީ ރާއްޖެއަކީ މަސްތުވާތަކެތި ޓްރާންސްޕޯޓު ކުރުމުގައި ބޭނުންކުރާ ޓްރާންސިޓް ބަނދަރަކަށް ވެފައިވާ ކަމަށާއި 215 ކިލޯގެ ޑްރަގަކީ ވެސް އެހެން ގައުމަކަށް ގެންދަން މަސައްކަތް ކުރި އެއްޗެހި ކަމަށް ވަރަށް ބޮޑަށް ބުރަވެވޭ ކަމަށެވެ.
އެންގުން މުހިންމު - އެ އޮޕަރޭޝަންގައި އަތުލައިގަތް 215 ކިލޯގެ ޑްރަގަކީ މިހާތަނަށް ފުލުހުންގެ އޮޕަރޭޝަނެއްގައި އެއްފަހަރާ އަތުލައިގަތް އެންމެ ގިނަ އަދަދެއްގެ މަސްތުވާތަކެއްޗެވެ. އޭގެ ކުރިން އެންމެ ގިނައިން އަތުލައިގެންފައި ވަނީ ގދ. އަތޮޅުގެ ފަޅުރަށެއްގައި ފޮރުވާފައި ހުއްޓާ 149 ކިލޯގެ ޑްރަގެވެ.
އިތުރަށް ކިޔާލަން -