ރިޕޯޓު ނުލިބިގެން، އިންތިގާލީ އިންސާފުގެ އޮފީހުގައި އާދޭސްކުރަނީ

ދައުލަތުގެ ފަރާތުން އެކިއެކި ބޭއިންސާފުތަކާ ކުރިމަތިވެފައިވާ ފަރާތްތަކަށް އިންސާފު ހޯދައިދިނުމަށް ރައީސް އިބްރާހިމް މުހައްމަދު ސޯލިހް އުފައްދާފައިވާ ޓްރާންސިޝަނަލް ޖަސްޓިސްގެ އޮފީސް ނުވަތަ އިންތިގާލީ އިންސާފުގެ އޮފީސް މާދަމާ އުވޭއިރު، އެ އޮފީހުން ބެލި މައްސަލަތައް ނިންމި ގޮތުގެ ރިޕޯޓު ނުލިބިގެން އާންމުން އެ އޮފީސް ދޮށަށް އެއްވެ، މިއަދު އާދޭސް ކުރަން ފަށައިފި އެވެ.

ވީ ކިހިނެއް؟ - މިއަދު މެންދުރުން ފެށިގެން ބައެއް މީހުން އެ އޮފީސް ދޮށަށް ރިޕޯޓު ހޯދުމަށް ގޮސް ތިބިއިރު، އަދިވެސް ފަސް ވަރަކަށް މީހުން އެ އިދާރާގައި އެބަ ތިއްބެވެ.

ތަފްސީލު - އެ އޮފީހުގައި މިވަގުތު ތިބި ބައެއް މީހުން 'ދައުރު'އާ ވާހަކަ ދައްކަމުން ބުނި ގޮތުގައި:

"މި ސަރުކާރު ވެރިކަމަށް އައީ، އެ އިންސާފު ހޯދައިދޭނެ ކަމުގެ ވައުދާ އެކު. ވެރިކަމުން ފައިބައިގެން ދާއިރު ވެސް އެ އިންސާފު ނުލިބޭ. ރިޕޯޓު ނުލިބިގެން މި އޮފީހުގައި އާދޭސް ކުރަން މި ޖެހެނީ،" އެ ތަނުން ވާހަކަ ދެއްކި އެކަކު ބުންޏެވެ.

"މިއަދު މެންދުރުން ފެށިގެން އައިސް މި ހުރީ، އަދިވެސް ރިޕޯޓު ނުލިބޭ. އެކަމަކު މިދިޔަ މަހު ބުނި މައްސަލަ ނިމިއްޖެއޭ،" އެހެން މީހަކު ބުންޏެވެ.

އެ ތަނުގައި ތިބި މީހުން ބުނި ގޮތުގައި، ރިޕޯޓު ނުލިބި ލަސްވަނީ އެންޓި-ކޮރަޕްޝަން ކޮމިޝަން (އޭސީސީ)ން އިއްޔެ އެ އޮފީހަށް ވަދެ، ބައެއް ތަކެތި ގެންގޮސްފައިވާތީ "ޕްރިންޓު ނުކުރެވިގެން" ކަމަށް އެ އޮފީހުން އެ މީހުން ކައިރީ ބުނެފައިވާ ކަމަށެވެ.

'ދައުރު'ގެ ނޫސްވެރިން އެ ތަނުގައި ތިއްބާ އެކަކުގެ ރިޕޯޓު ވަނީ ހަވާލުކޮށްފަ އެވެ.

މިކަމާ ގުޅޭ ގޮތުން އެ އޮފީހުގެ ބަހެއް އަދި ނުލިބެ އެވެ.

ފަސްމަންޒަރު - އިންތިގާލީ އިންސާފުގެ އޮފީހަކީ ޖެނުއަރީ 1953 އިން ފެށިގެން 17 ނޮވެމްބަރު 2018ގެ ނިޔަލަށް ހިންގާފައިވާ އިންސާނީ ހައްގުތަކާއި ކަރާމާތާ ގުޅުން ހުރި މައްސަލަތައް ބަލަން އުފެއްދި އޮފީހެކެވެ.

އެ އޮފީހަށް 3،000އަށް ވުރެ ގިނަ މައްސަލަ ހުށަހަޅައި ބެލި އެވެ.

އިތުރަށް ކިޔާލަން -