ކާޑެއްދޫ އެއާޕޯޓު ހެދުން ލަސްވީ ސަރުކާރުތަކާ ހެދި، 3 މަސް ތެރޭ ތަަރައްގީކުރަން ފަށާނަން: ގާސިމް

ގދ. ކާޑެއްދޫ އެއާޕޯޓް ތަރައްގީކުރުމުގެ މަސައްކަތް ލަސްވެފައިވަނީ ސަރުކާރުތަކުގެ ސަބަބުން ކަމަށާއި ކުރިއަށް އޮތް ތިން މަސް ތެރޭ އެ މަސައްކަތް ފަށާނެ ކަމަށް ޖުމްހޫރީ ޕާޓީ (ޖޭޕީ)ގެ ރިޔާސީ ކެންޑިޑޭޓު ގާސިމް އިބްރާހިމް މިރޭ ވިދާޅުވެއްޖެ އެވެ.

ވީ ކިހިނެއް؟ - ގދ. އަތޮޅުގެ ވެރިރަށް ތިނަދޫއާ އިންވެގެން އޮންނަ ކާޑެއްދޫ އެއާޕޯޓް ތަރައްގީކޮށް ހިންގުމަށް ހަވާލުކޮށްފައި އޮތީ ގާސިމްގެ ވިލާ ކުންފުންޏާ އެވެ. ނަމަވެސް އޭގެ އެއްވެސް ކަމެއް ނުކުރެވި، އެއާޕޯޓް ހަލާކުވަމުންދާތީ، އާންމުންގެ ކަންބޮޑުވުންތައް ވަނީ އިތުރުވެފަ އެވެ.

ރިޔާސީ ކެމްޕެއިންގައި ތިނަދޫ ސިޓީއަށް ވަޑައިގެން މިހާރު ބާއްވަމުންދާ ޖަލްސާއެއްގައި ވާހަކަދައްކަވަމުން ގާސިމް ވަނީ ކާޑެއްދޫ އެއާޕޯޓު ތަރައްގީކުރުން ލަސްވާ ސަބަބާއި އެ މަސައްކަތް ކުރަން ވިސްނާފައިވާ ގޮތް ވިދާޅުވެދެއްވާފަ އެވެ.

ތަފްސީލް - ގާސިމް ވިދާޅުވީ ކާޑެއްދޫ އެއާޕޯޓު ބައިނަލްއަގުވާމީ ފެންވަރަށް ތަރައްގީނުކުރެވި ފުރަތަމަ ލަސްވީ، ކުރީގެ ރައީސް އަބްދުﷲ ޔާމީންގެ ސަރުކާރުގައި ސިފައިން ގޮސް ގަދަކަމުން އެތަނުން ވިލާ ކުންފުނި ބޭލުމުން ކަމަށެވެ. އެރަށުން ފައިބައިގެން ދިޔައިރު ކުޑަމިނުން ފަންސޫރެއް ވެސް ނުގެންދާ ކަމަށް ގާސިމް ވިދާޅުވި އެވެ.

އޭގެ ފަހުން، މި ސަރުކާރުގައި އެތަން ވިލާއަށް ލިބުމަށް ފަހު ވެސް މަސައްކަތް ލަސްވެފައި އޮތް ސަބަބާ ބެހޭގޮތުން ގާސިމް ވިދާޅުވީ:

"ނަމަވެސް، އިރާދަކުރެއްވިއްޔާ އެންމެ ލަސްވެގެން ކުރިއަށް އޮތް ތިން މަސް ނުވަތަ ދެ މަސް ދުވަހުގެ ތެރޭގައި އެ ރަށަށް ބޭނުންވާ [2800 މީޓަރުގެ ދިގު] ރަންވޭ އެޅުމަށް، އެއީ ވައިޑް ބޮޑީ އެއާކްރާފްޓު ޖެއްސޭ ވަރުގެ ރަންވޭއެއް އެޅުމަށް، ބޭނުންވާ ފަޅު ހިއްކުމުގެ މަސައްކަތް އަޅުގަނޑު ފައްޓާނަން،" ގާސިމް ވިދާޅުވި އެވެ.

"އަޅުގަނޑުގެ ޑްރެޖަރު އަންނާނެ. ސަރުކާރުގެ އޮތް ވަރަށް ވުރެ މާ ފުރިހަމަ ބޮޑު ޑްރެޖަރެއް އަޅުގަނޑުގެ އޮންނާނެ. އެ ޑްރެޖަރު ގެނެސް އެ މަސައްކަތް ފައްޓާނަން އިރާދަކުރެއްވިއްޔާ ގިނަވެގެން ތިން މަސް ތެރޭ." 

ފަސްމަންޒަރު - ރާއްޖޭގެ އެންމެ ދުވަސްވީ ރީޖަނަލް އެއާޕޯޓު ކަމަށްވާ ކާޑެއްދޫ ތަރައްގީކޮށް، ހިންގުމަށް ވިލާ އެއާއަށް 50 އަހަރަށް އެންމެ ފުރަތަމަ ހަވާލުކުރީ ޔާމީންގެ ވެރިކަމުގައި 2013 ވަނަ އަހަރު އެވެ. އެ ކުންފުނިން ކާޑެއްދޫ އެއާޕޯޓް ހިންގަން ރަސްމީކޮށް ފެށީ ޖެނުއަރީ 2014ގަ އެވެ. ނަމަވެސް:

ގުޅުންހުރި - ޕީޕީއެމް-ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު މިދިޔަ މަހު ތިނަދުއަށް ކުރެއްވި ކެމްޕެއިން ދަތުރުގައި ވަނީ، ކާޑެއްދޫ އެއާޕޯޓް އިންޓަނޭޝަލްކޮށް ގދ. ތިނަދުއާ ބުރިޖަކުން ގުޅުވާލަން ވައުދު ވެވަޑައިގެންފަ އެވެ.

އޭގެ ފަހުން ރައީސް އިބްރާހިމް މުހައްމަދު ސޯލިހް މިދިޔަ ބުދަ ދުވަހު ތިނަދު އަށް ވަޑައިގެން ވަނީ، ކާޑެއްދޫ އިންޓަނޭޝަނަލް ނުކުރެވިއްޖެ ނަމަ ތިނަދޫ ފަޅުގައި އިންޓަނޭޝަނަލް އެއާޕޯޓެއް އަޅުއްވައިދެއްވާނެ ކަމަށް ވައުދުވެ ވަޑައިގެންފަ އެވެ.