ދައުވާތައް ނެގުމާ އެކު އަލީ ވަހީދު މިއަދު ރާއްޖެ ވަޑައިގަންނަވަނީ

މި ސަރުކާރުގެ ފުރަތަމަ ޓޫރިޒަމް މިނިސްޓަރަކަށް ހުންނަވަނިކޮށް، އެ މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާ ކުރި ކަމަށް ތުހުމަތުކުރެވޭ މައްސަލައެއްގައި ވަޒީފާ އިން ވަކިކޮށް ދައުވާ އުފުލުމާ ގުޅިގެން ރާއްޖޭން ބޭރަށް ވަޑައިގެން ބޭރުގައި އުޅުއްވަމުން ގެންދަވާ އަލީ ވަހީދު، އޭނާގެ މައްޗަށް ދައުލަތުން އުފުލި ދައުވާތައް އަނބުރާ ގެންދިއުމާ އެކު މިއަދު ރާއްޖެ ވަޑައިގަންނަވާ ގޮތަށް ހަމަޖެހިއްޖެ އެވެ.

މައްސަލައިގެ ފެށުން - ޓޫރިޒަމް މިނިސްޓްރީގެ މުވައްޒަފުންތަކަކަށް އެކި ދުވަސް މަތިން ޖިންސީ އަނިޔާ އާއި ޖިންސީ ގޯނާ ކުރި ކަމަށް ތުހުމަތުކުރެވުނު މައްސަލާގައި އަލީ ވަހީދުގެ މައްޗަށް ދައުވާ ކުރީ 18 ނޮވެމްބަރު 2020ގަ އެވެ. ކޯޓުން ޕާސްޕޯޓު ދޫކޮށްލުމާ އެކު ރާއްޖެއިން ފުރައިގެން ދިޔައީ، ފެބްރުއަރީ 2021ގަ އެވެ.

އޭނާގެ މައްޗަށް ކުރި ދައުވާތަކަކީ:

ވީ ކިހިނެއް؟ - އަލީ ވަހީދު ފުރައިގެން ދިޔުމުން ޝަރީއަތް ކުރިއަށް ނުގެންދެވި މިދިޔަ ދެ އަހަރު ދިގުލައިގެން ގޮސްފައިވަނިކޮށް، ހެކި ނެތް ކަމަށް ބުނެ ދައުވާތައް އަނބުރާ ގެންދިއުމަށް ނިންމާފައިވާކަން މިދިޔަ މަހު 14ގައި ޕްރޮސެކިއުޓާ ޖެނެރަލް އޮފީސް (ޕީޖީ)އިން ވަނީ ހާމަކޮށްފަ އެވެ. އެއާ އެކު، މިއަދު އޭނާ ރާއްޖެ ވަޑައިގަންނަވަން ހަމަޖެހިފައިވާކަން 'ދައުރު'އަށް ވަނީ ކަށަވަރުވެފަ އެވެ.

ތަފްސީލު - އަލީ ވަހީދުގެ ގާތް ބޭފުޅަކު މިއަދު 'ދައުރު'އަށް ވިދާޅުވި ގޮތުގައި، އޭނާ ރާއްޖެ ވަޑައިގަަތުމަށް ހަމަޖެހިފައިވަނީ ޓާކިޝް އެއާލައިންސްގެ ފްލައިޓަކުންނެވެ. އެ ފްލައިޓް ވެލާނާ އިންޓަނޭޝަންލް އެއާޕޯޓުގައި ޖެއްސުމަށް ތާވަލްކޮށްފައި ވަނީ 1:20ގަ އެވެ.

ދެ އަހަރަށް ވުރެ ގިނަ ދުވަސް ފަހުން އަލީ ވަހީދު އެނބުރި ރާއްޖެ ވަޑައިގަންނަވާއިރު، އެއާޕޯޓުގައި އަލީ ވަހީދު މީޑީއާތަކާ ބައްދަލުކުރުމަށް ވެސް ހަމަޖެހިފައިވާ ކަމަށްވެ އެވެ.

މިވީ މުއްދަތު ތެރޭގައި އަލީ ވަހީދު ދިރިއުޅުއްވަމުން ގެންދެވީ އިނގިރޭސިވިލާތުގަ އެވެ. އެ ގައުމުގައި ހުންނަވައިގެން އަލީ ވަހީދު ވަނީ ސެޕްޓްބަރު 2021ގައި އޮންލައިންކޮށް ނޫސްވެރިންގެ ބައްދަލުވުމެއް ވެސް ބާއްވާފަ އެވެ. އެ ބައްދަލުވުމުގައި އޭނާ ވިދާޅުވީ، ބަޔަކު މިނިސްޓަރުކަމުގެ މަގާމުގެ ދަހިވެތިކަމުގައި ދޮގު ތުހުމަތު އަޅުވައި އޭނާގެ "ދުވަސް ދުއްވާލީ" ކަމަށެވެ.

އެނގުން މުހިންމު - އަލީ ވަހީދުގެ ދައުވާތައް އަނބުރާ ގެންދަން ނިންމީ، ޕީޖީ އޮފީހުން ބުނެފައިވާ ގޮތުގައި، މައްސަލަ އިތުރަށް ކުރިއަށް ގެންދަން ބޭނުން ނުވާ ކަމަށާއި ދީފައިވާ ބަޔާންތައް އަނބުރާ ގެންނަން ބޭނުންވާ ކަމަށް ބުނެ، މައްސަލާގައި އަނިޔާ ލިބުނު މީހުންނާއި ހެކިން ޕީޖީ އޮފީހަށާއި ފުލުހުންނަށް ފޮނުވަމުންދިޔަ ސިޓީތަކާ ގުޅިގެންނެވެ. އެގޮތުން: