ދިގުކޮށް، އަވަހަށް އަޑުއެހުންތައް ބާއްވާ އިސްތިއުނާފީ މައްސަލަ ނިންމައިދޭން ޔާމީން އެދިވަޑައިގެންފި

އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދޫކުރުމުގައި ހިންގި ހިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް އިއްވާފައިވާ 11 އަހަރުގެ ޖުލު ހުކުމްގެ އިސްތިއުނާފް އަޑުއެހުންތައް ދިގުކޮށް އަދި ވީހާވެސް އަވަސް އަވަހަށް ކުރިއަށް ގެންގޮސް ނިންމައިދޭން ޔާމީން މިއަދު ހައި ކޯޓުގައި އެދިވަޑައިގެންފި އެވެ. މިއަދުގެއަ ޑުއެހުން ނިންމާލިއިރު ވެސް ޔާމީންގެ ބައި ފެށޭގޮތެއް ނުވެ އެވެ.

މައްސަލައިގެ ފެށުން - އާރަށު މައްސަލައިގައި ޔާމީންގެ މައްޗަށް އުފުލި ދެ ދައުވާ ވެސް ސާބިތުވެ، 11 އަހަރަށް ޖަލަށް ލާން 25 ޑިސެމްބަރުގައި ކްރިމިނަލް ކޯޓުން ހުކުމް ކުރި އެވެ.

ވީ ކިހިނެއް؟ - އިސްލާހުކުރުމަށް ފަހު ފޯމު ހުށަހަޅާފައި އޮންނަތާ ގާތްގަނޑަކަށް ތިން މަސް ފަހުން މި މައްސަލައިގެ އަޑުއެހުންތައް ފެށީ މިދިޔަ ބުދަދުވަހު އެވެ. އެގޮތުން:

ތަފްސީލް - މިއަދުގެ އަޑުއެހުމުގައި ފުރަތަމަ އޮތީ މިދިޔަ ބުދަދުވަހު މި މައްސަލަ ހައި ކޯޓުގައި ފެށުމަށް ބޭއްވި އަޑުއެހުމުގައި ނައީމުގެ ފަރާތުން ހުށަހެޅި އިފްތިތާހީ ބަޔާންތަކަށް ދައުލަތުން ދިން ރައްދުތަކާ ގުޅިގެން ނައީމުގެ ފަރާތުން ރައްދުދިނުމެވެ.

މިއަދު 2 ޖެހިއިރު ފެށި އަޑުއެހުންތައް އަސަރު ވަގުތަށް މެދުކަނޑާލުމަށް ފަހު، ދެވަނަ ސެޝަން ފަށަމުން އަޑުއެހުން ކުރިއަށް ގެންދާނެ ގޮތަކާއި ވަގުތަކާ މެދު ފަނޑިޔާރުން ސުވާލުކުރެއްވުމުން ދައުލަތުންނާއި، ދިފާއުން އެދުނީ ޔާމީންގެ ފަރާތްޕުޅުން އިފްތިތާހީ ބަޔާން އިއްވައި އެޔަށް ޖަވާބުދާރީވުމަށް ފަހު ޝަރީއަތުން ސާފުކުރަން ޖެހޭ ކަންކަން ސާފުކުރަން ފެށުމަށެވެ.

އެއަށް ފަހު ޔާމީން ފުރުސަތަކަށް އެދިވަޑައިގެން ވިދާޅުވީ، އިސްތިއުނާފީ މައްސަލައަކަށް ވާތީ ހައި ކޯޓުގައި އެ މައްސަލަ ވަގުތު ދިގުކޮށް އަވަސް އަވަހަށް ކުރިއަށް ގެންގޮސްދިނުމަށް އެދިވަޑައިގަންނަވާ ކަަމަށެވެ.

"މިއީ އިސްތިއުނާފްގެ މައްސަލައަކަށް ވާތީ އަޅުގަނޑު ހަމަ އިލްތިމާސްއެއް ދަންނަވާލަން ތަންކޮޅެއް ވަގުތު ދިގުކޮށް ތަންކޮޅެއް އަަވަސް އަވަހަށް ގެންގޮސްދެއްވައިފިއްޔާ އަޅުގަނޑު ހަމަ ވަރަށް ޝުކުރުވެރިވާނަން. އެ ކްރިމިނަލް ކޯޓުގައި އެބަ ދޭ ވަރަށް އަވަހަށް ވަަރަށް ދިގުކޮށް. އަޅުގަނޑު ހަަމަ ނިހާޔަަތަށް އެދެން މި ކޯޓުގައި މައްސަލަ ވަގުތު ދިގުކޮށް އަަވަސް އަވަހަށް ގެންގޮސް ދިނުމަށް. އެ އިންތިޒާމު ހަމަޖައްސަވައިދެއްވާތޯ ދެންނެވިން," ޔާމީން ވިދާޅުވި އެވެ.

ޔާމީން ވިދާޅުވީ:

ޔާމީންގެ ވާހަކަތަކަށް ފަހު މައްސަލަ ބައްލަވާ ބެންޗުގެ އިސް ފަނޑިޔާރު ހަސަން ޝަފީއު ވިދާޅުވީ މައްސަލައަކީ ފުދޭވަރަކަށް ގިނަ ލިއުންތަކެއް ހިމެނޭ މައްސަލައެއް ކަމަށެވެ. އެގޮތުން ކޮންމެ ރިޕޯޓެއްގައި 2,000އަަށް ވުރެ ގިނަ ޕޭޖު ހިމެނޭކަން ފާހަގަކުރެއްވި އެވެ.  ނަމަވެސް  ވީހާވެސް އަވަހަށް މައްސަލަ ނިންމަން މަސައްކަތް ކުރަމުން އަންނަ ކަމަށް ޝަފީއު ވިދާޅުވި އެވެ.

އެއަށް ފަހު ފަނޑިޔާރު ނިންމެވީ ޔާމީންގެ ބައި ފެށުމުގެ ކުރިން، ނައީމުގެ ހުށަހެޅުންތަކަށް ދެ ފަރާތުން ދެއްކި ވާހަކަތަކާ ގުޅިގެން ޝަރީއަތުން ސާފުކުރަން ޖެހޭ ކަންކަން ސާފުކުރުމަށެވެ. ޝަރީއަތުން ސާފުކުރަން ޖެހޭ ކަންކަން ސާފުކުރުމަށް ފަހު ދާދި ދެންމެއަކު އަޑުއެހުން ނިންމާލިއިރު މިއަދު ވެސް ޔާމީންގެ ބައި ފެށޭ ގޮތެއް ނުވި އެވެ. ނަމަވެސް ދެން އަންނަ އަޑުއެހުމެއްގައި އެބައި ފެށޭނެ އެވެ.

އަޑުއެހުން ނިންމާލުމުގެ ކުރީން ޔާމީންގެ ގާނޫނީ ޓީމުގެ އިސް ވަކީލު ޑރ. މުހައްމަދު ޖަމީލް އަހްމަދު ވެސް ވަނީ، އަޑުއެހުންތައް ދިގުކޮށް ކުރިއަށް ގެންގޮސްދިނުމަށް އެދިވަޑައިގެންފަ އެވެ. 

ޖަމީލު ވިދާޅުވީ:

އެނގުން މުހިންމު - މި މައްސަލާގައި ދެން އަޑުއެހުމެއް އޮންނާނީ އަންނަ ހަފްތާގެ ތެރޭގަ އެވެ. ވަކި ތާރީހެއް ޝަރީއަތުން ނުދެ އެެވެ. 

ފާހަގަކޮށްލެވޭ ކަމެއް - އިސްތިއުނާފީ އަޑުއެހުންތައް ދިގުކޮށް ކުރިއަށް ގެންގޮސްދޭން ޔާމީން މިއަދު ހައި ކޯޓުގައި އެދިވަޑައިގެންއިރު، ކްރިމިނަލް ކޯޓުގައި ހިނގަމުން އަންނަ ރ. ފުއްގިރި މައްސަލާގައި މިދިޔަ އަންގާރަ ދުވަހު 13 ގަޑިއިރު ހެކިބަސް ނެގި މައްސަލާގައި އިދިކޮޅުން ދަނީ ކަންބޮޑުވުން ފާޅުކުރަމުންނެވެ. އަދި އެއީ "ޔާމީން އަށް ދެމުންދާ އަނިޔާއެއް"ގެ ގޮތުގައި އިދިކޮޅުން ސިފަކުރެ އެވެ.