ކޭ ޕާކް މަޝްރޫއު ނުހުއްޓޭނެ ކަމުގެ ޔަގީންކަން މައި ކުންފުނިން ދީފި

ހުޅުމާލޭގައި ހިންގަމުންދާ ކޭ-ޕާކް ފްލެޓް އެޅުމުގެ މަޝްރޫއު ނުހުއްޓޭނެ ކަމުގެ ޔަގީންކަން އެ މަޝްރޫއު ހިންގައި މައި ކުންފުނި ހަމްބޯ ޓެކް ކޮރެއާއިން މިއަދު ދީފި އެވެ. އެ ކުންފުނިން ބުނީ މައްސަލަ ޖެހުނީ ރާއްޖޭގެ އެޖެންޓް ކުންފުނި ހަންބޯ މޯލްޑިވްސްއާ ދެމެދު ކަމަށާއި ދެ ކުންފުނިން ހަދާފައިވާ އެގްރިމަންޓު މިއަދު ނިމުމަކަށް ގެނެސްފައިވާ ކަމަށެވެ.

މައްސަލައިގެ ފެށުން - ހަންބޯ މޯލްޑިވްސް ކުންފުނި ބޭނުންކޮށްގެން މައިނޯރިޓީ ހިއްސާދާރު ހަސަން މަމްދޫހު ކޭ ޕާކްގެ ފްލެޓްތައް މަކަރާއި ހީލަތުން ނުއަގުގައި ވިއްކި ކަމަށް ބުނާ މައްސަލައެއް މިއަދު ވަނީ ފެންމަތިވެފަ އެވެ. އެ ކުންފުނިން މިއަދު ނެރުނު ބަޔާނެއްގައި ބުނިގޮތުގައި މިހާރު ވަނީ ޖިނާއީ ތަހުގީގެއް ހިންގުމަށް ފުލުހަށް މައްސަލަ ހުށަހަޅާފަ އެވެ. 

ވީ ކިހިނެއް؟ - ހަންބޯ މޯލްޑިވްސްއިން ހަމްދޫންގެ މައްޗަށް އެ ތުހުމަތުތައް ކޮށް ބަޔާނެއް ނެރުނު ފަހުން، މި މަޝްރޫއުގެ މައި ކުންފުނި ހަންބޯ ޓެކް ކޮރެއާއިން ވަނީ ބަޔާނެއް ނެރަފަ އެވެ.

ތަފްސީލު -  މައި ކުންފުނީގެ ބަޔާނުގައި ބުނީ، ހަންބޯ މޯލްޑިވްސްއަކީ 2017 ވަނަ އަހަރު އުފެއްދި އެ ކުންފުނީގެ ރާއްޖޭގެ އެޖެންޓް ކަމަށެވެ. ހަންބޯ މޯލްޑިވްސް އުފެއްދީ، ހަންބޯ ޓެކް ކޮރެއާއަށް މި މަޝްެރޫއޫ ހިންގުމަށާއި މާކެޓް ކުރުމާއި ފްލެޓްތައް ވިއްކުން ފަދަ ކަންކަމަށް އެހީތެރިވުމަށް ކަމަށް ބަޔާނުގައި ބުންޏެވެ.

އޭގެ ކުރިން، އޮކްޓޯބަރު 2016ގައި، ހުޅުމާލޭގައި މިކްސްޑް ޔޫސް ރެޒިޑެންޝަލް ކޮމްޕްލެކްސްއެއްގެ ގޮތުގައި ކޭ ޕާކް ފްލެޓް އެޅުމަށް އޭރުގެ އެޗްޑީސީއާ އެކު ހަންބޯ ޓެކް ކޮރެއާއިން ސޮއިކޮށްފައިވާ ކަމަށް ބަޔާނުގައި ބުންޏެވެ.

ރާއްޖޭގެ އެޖެންޓާ ދެމެދު ހަދާފައިވާ އެއްބަސްވުން ބާތިލުކުރުމަށް ނިންމި ސަބަބެއް ކަމަށް ބަޔާނުގައި ބުނީ، މަޝްރޫއު ތަންފީޒުކޮށް، މަސައްކަތް ނިންމުމުގައި ދިމާވި ތަފާތު ދަތިތަކެވެ. އަދި އެއީ ހަންބޯ ޓެކް ކޮރެއާގެ ޑިރެކްޓަރުންގެ ބޯޑުން ނިންމުމެއް ކަމަށް ބަޔާނުގައި ބުނެފައިވެ އެވެ.

"ހަންބޯ ޓެކް ކޮރެއާގެ މި ނިންމުމުގެ ސަބަބުން [ހަންބޯ މޯލްޑިވްސްއިން] ހަދާފައިވާ އެއްވެސް އެގްރިމަންޓަކަަށް އަދި މި ޕްރޮޖެކްޓާ ގުޅިގެން މި ކުންފުނީގެ ނަމުގައި ދީފައިވާ ކޮމިޓްމަންޓަކަށް އެއްވެސް އަސަރެއް ނުކުރާނެ،" ކަސްޓަމަރުންގެ އެގްރިމަންޓްތަކަށް އިހްތިރާމް ކުރާނެކަން ފާހަގަކޮށް ބަޔާނުގައި ބުންޏެވެ.

ކަސްޓަމަރުންގެ ހައްގުތަކާއި މަސްލަހަތު ހިމާޔަތް ކުރާނެކަމުގެ ޔަގީންކަން ދެމުން އެ ކުންފުނިން ބުނީ، ވީހާވެސް އަވަހަކަށް މަޝްރޫއު ނިންމުމަށް އިސްކަން ދެމުންދާ ކަމަށެވެ. އަދި މި މައްސަލައިގައި އިތުރު މައުލޫމާތު ހޯއްދަން ބޭނުން ނަމަ ގުޅާނެ ގޮތުގެ މައުލޫމާތު ބަޔާނުގައި ހިމަނާފައިވެ އެވެ. އެއީ:

ހަންބޯ މޯލްޑިވްސްގެ ބަޔާނުގައި ފެންމަތިކުރި މަކަރާއި ހީލަތުގެ މައްސަލައާ ގުޅޭގޮތުން ހަންބޯ ޓެކް ކޮރެއާ އިން އެއްވެސް އެއްޗެއް ނުބުނެ އެވެ.