އަހަރެއް ފަހުންވެސް އިމްރާންގެ އޮތީ އިލްތިމާސެއް؛ އެޅި ފިޔަވަޅެއް ނެތް

ދައުލަތުގެ އިސްވެރިންނާއި ސިޔަސީ ބޭފުޅުން، ޑްރަގު ނެޓްވޯކްތަކާ ދުރުވުމަށް މީގެ އަހަރެއްހާ ދުވަސް ކުރިން އިމްރާން ކުރެއްވި އިލްތިމާސް އަނެއްކާ ވެސް މިއަދު މަޖިލީހުގެ ތަކުރާރު ކުރައްވައިފި އެވެ. ނަމަވެސް ޑްރަގް ވިޔަފާރީގައ އުޅޭ މިފަދަ ފަރާތްތަކާ މެދު އަޅާ ފިޔަވަޅެއް އޭނާ ވިދާޅެއްނުވި އެވެ.

އެނގުން މުހިންމު - ޑްރަގު ނައްތާލުމަށްޓަކައި ޑިސެމްބަރު 2021ގައި ކ. ދޫނިދޫގައި ބޭއްވި ހަރަކާތެއްގައި މީޑިއާތަކާ ވާހަކަ ދައްކަވަމުން އިމްރާން ވިދާޅުވެފައި ވަނީ، މަސްތުވާތަކެތީގެ ވިޔަފާރީގައި އުޅޭ ސިޔާސީ މީހުންނާއި އެކަމުގައި ޝާމިލްވާ ރާއްޖޭގެ ވިޔަފާރިވެރިންވެސް އެނގޭ ކަމަށާއި އެދެނީ އެ ބޭފުޅުން އަމިއްލައަށް އެ ވިޔަފާރިން ދުރުވުމަށް ކަމަށެވެ.

ވީ ކިހިނެއް؟ - މިއަދު މަޖިލިސް ޖަލްސާގައި އިމްރާން އަނެއްކާވެސް އެ ވާހަކަ ތަކުރާރުކުރެއްވީ ތިމަރުފުށީ ދާއިރާގެ އެމްއެންޕީ މެންބަރު އަބްދުﷲ ރިޔާޒު ކުރެއްވި ސުވާލަކަށް ޖަވާބު ދެއްވަމުންނެވެ.

ކުރީގެ ޕޮލިސް ކޮމިޝަނަރުކަން ކުރެއްވި ރިޔާޒު ވިދާޅުވީ، ޑްރަގު ޓްރެފިކް ކުރުމުގެ ކުށުގައި ޖަލަށް ހުކުމްކޮށްފައިވާ ވަރަށް ގިނަ ގައިދީން ގާނޫނުގައި ބަޔާންކޮށްފައިވާ ވަރަށް އަދަބު ލުއިކޮށްދީ، މިނިވަންކޮށްފައިވާ ކަމަށެވެ.  އެކަން ހިނގާފައި ވަނީ މިނިސްޓަރު އިމްރާންގެ ބައިވެރިވުމާއި އެނގުމުގެ ތެރެއިން ކަމަށް މައުލޫމާތު ލިބިފައިވާ ކަމަށް ރިޔާޒު ވިދާޅުވި އެވެ.

ބުނީ ކީކޭ؟ - އިމްރާން ވިދާޅުވީ، މަސްތުވާތަކެއްޗާއި ގޭންގް ކުށްތައްކުގައި ބައިވެރިވާ ފަރާތްތަކަށް ލިބެން ޖެހޭ އަދަބު ލުއިކުރުމުގައި އޭނާގެ ބައިވެރިވުމެއް ނޯންނާނެ ކަމަށެވެ. އަދި އެގޮތަށް އެއްވެސް ފަރާތަކަށް އޭނާ މެދުވެރިވެގެން "ލުޔެއް ލިބޭނެ ގޮތެއް އިރާދަކުރެއްވިޔާ މެދުވެރި ނުވާނެ" ކަމަށްވެސް އިމްރާން ވިދާޅުވި އެވެ.

"ގޭންގްތަކާއި ޑްރަގު ޓްރެފިކިން މައްސަލަތަކަކީ އަޅުގަނޑު އެކަމަށް އަޅާނުލާ ދޫކޮށްލާނެ ކަމެއް ނޫން. އޭގެ ތެރޭގައި ޝާމިލުވާ އެއްވެސް ފަރާތެއްގެ ކުރިމަތީގައި އަޅުގަނޑު އިރާދަކުރެއްވިއްޔާ ތިރިއެއް ނުވާނަން. މިކަމުގެ ޔަގީންކަން ތިޔަ ހުރިހާ އެންމެނަށް ވަރަށް ސާބިތުކަމާއެކު އަޅުގަނޑު އަރުވަން،" ރިޔާޒުގެ ސުވާލަށް ޖަވާބު ދެއްވަމުން އިމްރާން ވިދާޅުވި އެވެ.

މަސްތުވާތަކެތީގެ މައްސަލަ ހައްލު ކުރުމަށް ފުލުހުންނާއެކު ވަރަށް ގިނަ މަސައްކަތްތަކެއް ކުރައްވަމުން ގެންދަވާކަން ފާހަގަ ކުރައްވަމުން އިމްރާން ވިދާޅުވީ، "ދާދިފަހުން ހިނގާފައިވާ ބޮޑެތި މައްސަލަތައްވެސް އިތުރަށް ބަލާ ދިރާސާ ކުރަމުން އަންނަ" ކަމަށެވެ. ނަމަވެސް އެކަމުގެ ތަފްސީލަށް ވަޑައިނުގަތް، އެނާ ތަކުރާރު ކުރެއްވީ ޑިސެމްބަރު 2021ގައި ޑްރަގު ނައްތާލުމަށް ބޭއްވި ހަރަކާތުގައި ދެއްކެވި ވާހަކަ އެވެ.

"ޑްރަގުގެ ބޮޑެތި ނެޓްވޯކްތަކުގައި ސިޔާސީ ބައެއް ބޭފުޅުންނާއި ވިޔަފާރިވެރިންނާއި ގައުމުގެ މުއައްސަސާތަކުގެ އިސްވެރިން އެބަ ބައިވެރިވެޔޭ [އެދުވަހު ދެންނެވިން]. އަޅުގަނޑު މިއަދުވެސް ދަންނަވާލަން ބޭނުންވޭ މި މަސައްކަތް ކުރިއަށް ގެންދާއިރު، [އެއިން] އެއްވެސް ބޭފުޅަކާ އަރާ ހަމަކުރާނަމަ، އަޅުގަނޑު ފަހަތަކަށް ނުޖެހޭނަން. އެކަމަށް ހުރިހާ ބޭފުޅުން ސަމާލުވުމަށް ވަރަށް ސާބިތުކަމާއެކު ދަންނަވަން،" އިމްރާން ވިދާޅުވި އެވެ.

"ހުރިހާ ބޭފުޅުން ފެއަށް ޖެހިވަޑައިގަންނަވާށޭ! މިއަޑު އެންމެން އައްސަވާނެ ކަމަށް ގަބޫލު ކުރަން. އަޅުގަނޑު ފަހަތަކަށް ނުޖެހޭނަން. އެކަމަކު އެ ހުރިހާ ބޭފުޅުން ފަހަތަށް ޖެހިވަޑައިގަންނަވަން ޖެހޭ."

މީގެ ކުރިން ދެއްކި ވާހަކައިގައި ދައުލަތުގެ އިސްފަރާތަތަކާއި މުއައްސަސާތަކުގެ އިސްވެރިން ޑްރަގު ވިޔަފާރީގައި ބައިވެރިވާ ކަމަށް އިމްރާން ވިދާޅެއްނުވެ އެވެ. ނަމަވެސް މިއަދު އެފަދަ މޭރުމަކުން ވާހަކަ ދެއްކެވި އިރު، އެކަމުގެ މާބޮޑު ތަފްސީލެއް އަދި ހެއްކެއް ނުދައްކަވަ އެވެ.

"މިފަދަ ކަމަކާ ދައުލަތުގެ އެއްވެސް އިސްވެރިޔަކު ބައިވެރިވުމަކީ މި ދައުލަތަށް ލިބޭނެ ވަރަށް ބޮޑު ގެއްލުމެއް. މިކަމުން އަޅުގަނޑުމެން އެންމެން ސަމާލުވާން ޖެހޭ. އެހެން ނޫނީ މި ގައުމަކަށް ރައްކާތެރިކަމެއް ނެތް،" އިމްރާން ވިދާޅުވި އެވެ.

ފާހަގަކޮށްލެވޭ ކަމެއް - ޑްރަގު ޓްރެފިކް ކުރުމުގައި ކުށުގައި މިދިޔަ ނޮވެމްބަރު މަހު، 25 އަހަރަށް ޖަލަށް ހުކުމް ކުރި މީހަކު މާފް ދިނުމާއި އަދަބު ލުއިކުރުމުގެ ގާނޫނުގެ ދަށުން ކްލެމެންސީ ބޯޑުން ފާސްކޮށް، ރައީސް އިބްރާހިމް މުހައްމަދު ސޯލިހްގެ މާފް ދެއްވި މައްސަލައެއް ފެންމަތިވި އެވެ.

ސަރުކާރުން ބުނެފައި ވަނީ، ގާނޫނާ ހިލާފަށް އެއްވެސް މީހަކަށް މާފް ދީފައި ނުވާނެ ކަމަށެވެ. އެކަން ކުރަމުން ދަނީ އުސޫލުތަކުގެ ތެރެއިން ކަމަށް ބުނި ނަމަވެސް، އެކަމުގެ މާ ބޮޑު ތަފްސީލެއް ސަރުކާރުން ހާމަކޮށްފައި ނުވެ އެވެ.