ނ. އަތޮޅުގެ ރަށްތައް ދިނުން ހުއްޓުވަން ކޯޓުން އަމުރެއް ނުދިން

ނޫނު އަތޮޅުގެ ދެ ރަށެއްގައި ރިސޯޓު ހަދަން ކުއްޔަށް ދިނުމާ ދެކޮޅަށް އެ އަތޮޅު ކައުންސިލުން ރައީސް އޮފީހާ ދެކޮޅަށް ސިވިލް ކޯޓަށް ހުށަހެޅި މައްސަލައިގައި އެ މަސައްކަތް މަޑުޖައްސާލުމުގެ އަމުރެއް ނުނެރެން އެ ކޯޓުން ނިންމައިފި އެވެ.

އެނގުން މުހިންމު - ނޫނު އަތޮޅުގެ ރަށްތަކާއި ފަޅުތައް ދިނުން ހުއްޓުވަން ނ. އަތޮޅު ކައުންސިލުން ގަރާރެއް ފާސްކުރީ، އެ ތަންތަނުން އެ އަތޮޅު ރައްޔިތުންނަށް މަންފާ ނުލިބޭ ކަމަށް ބުނެ، މިދިޔަ އަހަރުގެ ސެމްޓެމްބަރުގަ އެވެ. 

އެއީ އެ އަތޮޅު ތޮޅެންދޫ 21 އަހަރަށް ކުއްޔަށް ދޭން އުޅުނު މައްސަލައިގަ އެވެ. ތޮޅެންދޫ މައްސަލައިގައި ސިވިލް ކޯޓުން ވަނީ އެ ރަށް ދޫކުރުން ހުއްޓުވަން ވަގުތީ އަމުރެއް ނެރެދީފަ އެވެ. ދައުލަތުން އެ އަމުރު އިސްތިއުނާފު ކުރުމުން ހައި ކޯޓުން ވެސް ވަނީ އަމުރަށް ތާއީދުކޮށްފަ އެވެ.

ވީ ކިހިނެއް؟ - މިހާރު ކޯޓުގައި ކުރިއަށް ދަނީ އެ އަތޮޅު ކެނދިވަރާއި ކަނޑޫދޫ (ދޮނައެރިކަނޑޫދޫ) ދިގު މުއްދަތަކަަށް ޓޫރިޒަމަށް ދިނުމާ ގުޅޭ މައްސަލައެކެވެ. މި މައްސަލަ ހުށަހަޅަމުން ކައުންސިލުން ބުނީ، ރައީސް އޮފީހާ ދެކޮޅަށް މައްސަލަ ހުށަހެޅީ އެ ކައުންސިލާ މަޝްވަރާ ނުކޮށް ރަށްތައް ދޭން ނިންމުން ލާމަރުކަޒީ ގާނޫނާ ހިލާފު ވާތީ ކަމަށެވެ.

ތަފްސީލް - ނ. އަތޮޅު ކައުންސިލުން މި މައްސަލައިގައި ވަގުތީ އަމުރަކަށް އެދޭ ސަބަބުތަކުގެ ގޮތުގައި ފާހަގަކުރީ:

ވަގުތީ އަމުރަށް އިންކާރުކުރަމުން ދިން ރައްދުގައި ދައުލަތުން ކޯޓުގައި ބުނީ، މި ދެ ރަށަކީ ވެސް ކުއްޔަށް ދޭން އެއްބަސްވެފައިވާ ރަށްތަކެއް ކަމުން އެއްބަސްވުން އުވާލައިގެން ލިބިދާނެ ގެއްލުމަށް ބަލާއިރު، މި މައްސަލައިގައި ދައުލަތުގެ މަސްލަހަތު މާ ބޮޑު ކަމަށެވެ. 

އޭގެ އިތުރުން، މިހާރު އަމަލުކުރަމުންދާ މަދަނީ އިޖުރާއަތުގެ ގާނޫނުގެ ދަށުން މި ބާވަތުގެ ޖުޑީޝަލް ރިވިއުގެ މައްސަލަތަކުގައި، އެންމެ ފަހު ކަމަކަށް މެނުވީ ކޯޓަށް މައްސަލަ ހުށަހަޅައިގެން ހައްލު ހޯދަން ބަޔާންކުރި ނަމަވެސް ކައުންސިލުން އެފަދަ ކަމެއް ކޮށްފައި ނުވާ ކަމަށް ވެސް ދައުލަތުން ފާހަގަކުރި އެވެ.

ކައުންސިލުގެ އަމަލުތަކަށް ފާޑުކިޔަމުން، ދައުލަތުން ބުނީ މި މައްސަލައިގައި ގަރާރެއް ނެރެ، އެ ނިންމުމަށް ގޮންޖެހުމުގެ އިތުރަށް މައްސަލައިގައި ސުލްހަވެރި ހައްލެއް ހޯދަން އެއްވެސް މަޝްވަރާއެއްކޮށްފައި ނުވާ ކަމަށެވެ. އަދި މިހާރު ވެސް، ލާމަރުކަޒީ ގާނޫނުގައި ބުނާ ގޮތަށް މަޝްވަރާ ކުރުމުގެ ފުރުސަތު އޮތް އިރު، ޖުޑީޝަލް ރިވިއުގެ ދައުވާއެއް ހުށަހަޅައިގެން ކުރިއަށް ނުދެވޭނެ ކަަމަށް ވެސް ދައުލަތުން ބުންޏެވެ.

ފަނޑިޔާރުގެ ބަސް - ކޯޓުން ވެސް ބުރަވީ، މި ނުކުތާއަށެވެ. ޝަރީއަތުން ފާހަގަކުރި ގޮތުގައި، މި މައްސަލައިގައި ދައުލަތުން އެ ފާހަގަކުރާ ފަދައިން، މަދަނީ އިޖުރާއަތުގެ ގާނޫނުގައި ބުނާ ގޮތަށް ހައްލު ހޯދަން އަތޮޅު ކައުންސިލުން ކޮށްފައިވާ މަސައްކަތެއް އެނގޭނެ ލިޔުމެއް ހުށަހަޅާފައެއް ނުވެ އެވެ.