ޒަޔާން މަރުގައި ހިމެނޭ ކުޑަކުދިން ރެކްރޫޓުކުރި ކަމަށް ބުނާ 7 މީހަކަށް ދައުވާކޮށްފި

އައްޑޫ ފޭދޫގެ ދެ ގްރޫޕެއްގެ މެދުގައި ހިނގި ސިލްސިލާ މާރާމާރީތަކަށް ފަހު މުހައްމަދު ޒަޔާން މަރާލި މައްސަލައިގައި ހިމެނޭ ކުޑަކުދިން ރެކްރޫޓު ކުރުމުގެ ތުހުމަތުގައި ހަތް މީހެއްގެ މައްޗަށް ދައުވާ ކުރަން ޕީޖީ އޮފީހުން ކްރިމިނަލް ކޯޓަށް އިއްޔެ ހުށަހަޅައިފި އެވެ.

މައްސަލައިގެ ފެށުން - މިދިޔަ ޖޫން 2 ވަނަ ދުވަހު، އުމުރުން 21 އަހަރުގެ މުހައްމަދު ޒަޔާން، ސ. ފޭދޫ/ސޮލިޑް މަރާލީ ގޭންގަކުން އޭނާ ދިރިއުޅޭ ގެއަށް ވަދެގެންނެވެ. ޒަޔާން މަރާލުމުގެ ތުހުމަތުގައި ހައްޔަރުކުރި މީހުންނަކީ އައްޑޫގެ 'މަގުއްދޫ ގްރޫޕް'އަށް ނިސްބަތްވާ ބައެކެވެ.

އެ މަރާ ގުޅޭ މައުލޫމާތު ހޯދުމަށް 'ދައުރު'ން ކުރި މަސައްކަތުގައި ޒަޔާން މަރާލަން އޯޑަރު ދިނީ، މަގުއްދޫ ގުރޫޕާ ގުޅިފައި އޮންނަ، މާލޭގައި ހަރަކާތްތެރިވާ ގޭންގަކުން ކަމަށް އެ ރަށުން މި ނޫހަށް މައުލޫމާތު ދިން މީހުން ވަނީ ބުނެފަ އެވެ. މިކަން ފަހުން ކަށަވަރުކޮށްދެމުން ފުލުހުން ވެސް ބުނީ ޒަޔާންގެ މަރާ މާލޭގެ ގޭންގަކާ ގުޅުން އެބައޮތް ކަމަށެވެ.

ވީ ކިހިނެއް؟ - ޕްރޮސިކިއުޓާ ޖެނެރަލް (ޕީޖީ) ހުސައިން ޝަމީމްގެ ބްލޮގުގައި ލިޔުއްވާފައިވާ ގޮތުގައި، ދައުވާ ކުރަން ފޮނުވި މީހުންނަށް ކުރަނީ:

މި ހުރިހާ ދައުވާތަކަކީ ވެސް ހެއްކާ އެކު ކޮންމެ ކުށެއް ވަކިން ސާބިތުކުރެވޭނެ ދައުވާތަކެއް ކަމަށް ޝަމީމް ލިޔުއްވާފައިވެ އެވެ. އެ މީހުންގެ މައްޗަށް އުފުލާފައިވާ ދައުވާތައް ސާބިތުވެއްޖެ 24 އަހަރުގެ ޖަލު ހުކުމެއް އައުމުގެ ފުރުސަތު އޮތް ކަމަށް ވެސް ޕީޖީ ފާހަގަކުރެއްވި އެވެ.

ޒަޔާންގެ މަރުގެ މައްސަލައަކީ، ކުޑަކުދިންތަކެއް ލައްވާ ޖިނާއީ ކުށެއް ކުރުވުމުގެ ދައުވާ އެންމެ ގިނަ ބަޔެއްގެ މައްޗަށް އެއް މައްސަލައެއްގައި ދައުވާތައް އުފުލި މައްސަލަ އެވެ.  

ތަފްސީލް - ޒަޔާންގެ މަރާ ގުޅިގެން މިހާތަނަށް 11 މީހަކު ފުލުހުން ހައްޔަރުކޮށްފި އެވެ. އޭގެ ތެރޭގައި ހަތަރު ކުޑަކުދިން ވެސް ހިމެނެ އެވެ. މި މައްސަލައިގައި ހިމެނޭ ކުޑަކުދިންނަކީ:

ޕީޖީ އޮފީހުން ވަނީ މި ހަތަރު ކުދިންގެ މައްޗަށް ދައުވާ ކުރަން މިދިޔަ އޮކްޓޫބަރު މަހު ފޮނުވާފަ އެވެ. ގަސްތުގައި މީހަކު މެރުމުގެ ދައުވާ ކުރީ އޭގެން އެއް ކުއްޖެއްގެ މައްޗަށެވެ. އަނެއް ތިން ކުދިންގެ މައްޗަށް ކުރީ، ގަސްތުގައި މީހަކު މެރުމުގައި ބައިވެރިވުމުގެ ދައުވާ އެވެ. 

މި މައްސަލައިގައި ހިމެނޭ ދެ ކުއްޖަކު ވަނީ ކުށަށް އިއުތިރާފުވެފަ އެވެ. އެހެންވެ، ކުޑަކުދިންގެ އަދުލުގެ ގާނޫނުގެ ދަށުން، އެ ކުދިން ކުށުގެ ވެއްޓާ ދުރުކުރަން ޑައިވާޝަން ފުރުސަތު ވަނީ ދީފަ އެވެ.

ޒަޔާންގެ މަރުގެ މައްސަލައިގައި ހިމެނޭ ކުޑަކުދިން ފިޔަވައި ބާކީ ތިބި މީހުންގެ ވަނަވަރު ފުލުހުން ވަނީ ހާމަކޮށްފަ އެވެ. ފުލުހުން ބުނާ ގޮތުގައި މި އެންމެންނަކީ ވެސް ކުށުގެ ރެކޯޑުު އޮންނަ މީހުން ކަމަށެވެ. އެއީ: 

ރެކްރޫޓު ކުރުމުގެ ދައުވާތަކުގެ އިތުރުން މި މީހުންގެ ތެރެއިން ޔައިޝް އާއި އައިލިޝްގެ މައްޗަށް ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާ އުފުލާފައިވެ އެވެ. ދެން ތިބި 5 މީހުންނަށް ކުރަނީ، ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގައި އެހީތެރިވުމުގެ ކުށުގެ ދައުވާ އެވެ. 

ގުޅުން ހުރި ކަމެއް - ޒަޔާންގެ މަރުގެ މައްސަލައިގައި މީގެ ކުރިން ފުލުހުން ބޭއްވި ނޫސްވެރިންގެ ބައްދަލުވުމެއްގައި، މައްސަލައިގައި ހިމެނޭ ކުޑަކުދިން ރެކްރޫޓު ކުރި ގޮތާ ގުޅޭ ގޮތުން، ފުލުހުން ވެސް ބައެއް ކަންކަން ހާމަކޮށްފައިވެ އެވެ. ފުލުހުން ބުނި ގޮތުގައި:

"ކުޑަކުދިން ގްރޫމްކޮށް، އެކްސްޕްލޮއިޓް ކުރާ ފަރާތްތަކުން އެ ކުދިންނަށް ބައިސްކަލު ގަނެދީ، ބައެއް ފަހަރު ސައިކަލު ދީ، ބައެއް ހާލަތްތަކުގައި ކޮފީ ބޯ ތަންތަން ހަދައިދީ، ކޮފީ ބޯން ރެސްޓޯރެންޓްތަކަށް ގެންގޮސްދީ. އަދި ބައެއް ހާލަތްތަކުގައި 16 އަހަރާ 18 އަހަރާ ދެމެދުގެ ބައެއް ކުދިން ވަކި ތަންތަން ކުއްޔަށް ހިފައި ބައިތިއްބާ. މިކަންކަން ކުރަމުންދާކަން ވެސް އަޅުގަނޑުމެންނަށް ފާހަގަވި،" ފުލުހުންގެ ސައުތު ރީޖަންގެ ކޮމާންޑަރު، ޗީފް ސުޕްރިންޓެންޑެންޓް އޮފް ޕޮލިސް އަހްމަދު ޝަމީމް އެ ނޫސްވެރިންގެ ބައްދަލުވުމުގައި ފާހަގަކުރައްވާފައިވެ އެވެ.