ކޮންމެ އެނދެއް ކައިރީގައި ގޭސްފުޅިއެއް؛ ތަނުގެ ހާލަތު ހުރީ ނުރައްކާތެރި ގޮތަކަށް

މ. ނިރުފެހި ގޭގައި އަލިފާނުގެ ހާދިސާއެއް ހިނގައިގެން އުޅޭ ކަމުގެ މައުލޫމާތު، ސިފައިންގެ ފަޔާ އެންޑް ރެސްކިއުއަށް ލިބުނީ ރޭ 12:30ގަ އެވެ. އޭގެ 3 މިނިޓް ފަހުން، އަލިފާން ނިއްވާ ވެހިކަލް އޮތީ، ގޭގެ ބުޑުގަ އެވެ. އެކަމަކު އޭރު ވެސް، އިމާރާތުގެ ތިރީގައި އޮތީ ވަރަށް ބޮޑަށް ހުޅު ހިފާފައިކަމުން، ސިފައިން ފުރަތަމަ އެންމެ ބޮޑު އިސްކަމެއް ދިނީ، އަލިފާންގަނޑު އިތުރަށް ފެތުރުނަ ނުދިނުމަށެވެ.

އެކަން ކާމިޔާބުވުމުން ދެން ފެށީ، އެތެރޭގައި ތިބި މީހުން ހޯދުމުގެ މަސައްކަތެވެ. އެކަމަކު އެކަމުގައި އުޅުނު ސިފައިންނަށް ފެނުނީ މީގެ ކުރިން ދުވަހަކު ވެސް ދުށް މަންޒަރެއް ނޫނެވެ. މިއީ ރާއްޖޭގެ ތާރީހުގައި ވެސް އަލިފާނުގެ ހާދިސާއެއްގައި އެންމެ ގިނަ ބަޔަކު މަރުވި ފުރަތަމަ ފަހަރެވެ.

އެ ގޭގެ ހާލަތު، ފަޔާ އެންޑް ރެސްކިއުއާ ހަވާލުވެ ހުންނެވި ކާނަލް އިބްރާހިމް ރަޝީދު މިއަދު ހެނދުނު ސިފަކުރެއްވީ، ނުރައްކާ ހާލަތެއްގައި އޮތް ތަނެއްގެ ގޮތުގަ އެވެ.

"އަޅުގަނޑުމެންނަށް އެނގިފައި އޮތް ގޮތުން، އެތަނުގައި ހުރި ކޮންމެ އެނދެއް ކައިރީގައި ވެސް ހުރި ގޭސްފުޅިއެއް ބަހައްޓާފައި،" ރަޝީދު ވިދާޅުވި އެވެ.

ސިފައިން ބުނި ގޮތުގައި އަލިފާން ރޯވީ، އިމާރާތުގެ އެންމެ ތިރީގައި ހުރި ގަރާޖެއްގަ އެވެ. ހަލާކުވެގެން ގެންނަ ވެހިކަލް މަރާމާތު ކުރާ އެ ގަރާޖުގައި، މީހެއްގެ އިސްކޮޅު ހުންނަ ވަރުގެ ގޭސް ސިލިންޑަރުތައް ހުރި ކަމަށް ސިފައިން ބުންޏެވެ. މީހުން ދިރިއުޅެމުން ދިޔައީ، އެ ތަނުގެ މަތީގައި ހަދާފައި ހުރި ދެ ބުރީގަ އެވެ.

އެނގިފައިވާ ގޮތުގައި، ފުރަތަމަ ބުރި އާއި ދެވަނަ ބުރީގައި ވެސް ބިދޭސީން ދިރިއުޅެމުން ދިޔައީ ކުއްޔަށް، ގިނަ މީހުން ވަކިވަކިންނެވެ. ގާތްގަނޑަކަށް 25 މީހުންނަށް ދިރިއުޅެވޭ ގޮތަށް، ކުދިކުދި ކޮޓަރިތަކެއް ހަދާފައި ހުރި އިރު، ދެމަފިރިން ވެސް އެ ތަނުގައި އުޅެ އެވެ.

އިމާރާތަށް އަރައި ފޭބުން ހުރީ ހަނިހަނި ސިޑިއެކެވެ. އެހެންވެ، ދަންވަރު އަލިފާނުގެ ހާދިސާ ހިނގުމާ އެކު އެ ތަނުން ފޭބުން ވެސް ވީ ގޮންޖެހުމަކަށެވެ. ބައެއް މީހުން މަރުވީ އެ ތަނުން ނުފޭބިގެން ކަމަށް ގަބޫލު ކުރެވެ އެވެ. 

"ހަނިހަނި ސިޑިއަކުން އަރަން ހުރި އިރު، މުޅިތަން ވެސް ހުރީ ވަރަށް ކޮންޖެސްޓެޑް ގޮތަކަށް،" އިމާރާތް ހުރި ގޮތުން، އަލިފާން ނިއްވައި މީހުން ސަލާމަތް ކުރުމަށް އުނދަގޫތައް ކުރިމަތިވިކަން ފާހަގަކުރައްވައި ރަޝީދު ވިދާޅުވި އެވެ.

އަލިފާން ރޯވި އިރު، އެ ތަނުގެ ތެރޭގައި ތިބީ ކިތައް މީހުން ކަމެއް އަދި ސިފައިން ނުބުނެ އެވެ. އެކަމަކު ސިފައިން އެ ސަރަހައްދަށް ދިޔުމުން، އެ ތަނުން ނުކުތް މީހުންނާ ހަވާލާދީ ރަޝީދު ވިދާޅުވީ ނުވަ މީހަކު މަދުވާ ކަމަށް ބެލެވޭ ކަމަށެވެ.

"އެކަމަކު މިހާތަނަށް އަޅުގަނޑުމެންނަށް 10 މީހެއްގެ ހަށިގަނޑު ފެނުނު އިރު، އިތުރު މީހެއްގެ ފުރާނަ ވަނީ ސަލާމަތް ކުރެވިފައި،" އޭނާ ވިދާޅުވި އެވެ.

"ނަމަވެސް އޭނާގެ ހާލަތު ކްރިޓިކަލް."

ހާދިސާގެ އިތުރު ތަފްސީލަށް ބަލާއިރު:

މި ގަރާޖުގައި މީގެ ކުރިން ވެސް ވަނީ އަލިފާނުގެ ހާދިސާތަކެއް ހިނގާފަ އެވެ.

ރަޝީދު ވިދާޅުވީ ރޭގެ ހާދިސާއާ އެކު، އަލިފާނުގެ ދެ ހާދިސާއެއް އެ އިމާރާތުން ރިޕޯޓުކޮށްފަ އެވެ. އިތުރު އެހެން ހާދިސާއެއް ހިނގި ނަމަވެސް އެކަން ސިފައިންނަށް ރިޕޯޓުކޮށްފައި ނުވާ ކަމަށް އޭނާ ވިދާޅުވި އެވެ.

"އެކަމަކު އަޅުގަނޑުމެންނަށް ފަހުން ލިބުނު މައުލޫމާތަށް ބަލާއިރު، މެއި މަހު ހިނގި އެ ހާދިސާއަކީ ވެސް ގޭސްކަޓާއެއްގައި އިހުމާލުތަކެއް ހިނގައިގެން ހިނގި އަލިފާނުގެ ހާދިސާއެއް ކަމަށް ވަނީ،" ރަޝީދު ވިދާޅުވި އެވެ.

އޭނާ ވިދާޅުވީ ރޭ އެ ތަނުގައި އަލިފާން ރޯވާން ދިމާވި ސަބަބު އެނގޭނީ އިތުރަށް ތަހުގީގުކޮށް ބެލުމުން ކަމަށެވެ.