ވެލާނާ އިންޓަނޭޝަނަލް އެއާޕޯޓުގައި ފަތުރުވެރިންތަކެއް ހިދުމަތް ހޯދަނީ (ދައުރު ފޮޓޯ/އަބްދުﷲ އަނޫފް ޖުނައިދު)
އެއާޕޯޓު ޓެކްސްއާ އެކު ޓޫރިޒަމްގެ ޓެކްސްތައް ބޮޑުކުރާ އިސްލާހުތައް ތަސްދީގުކޮށްފި
މުހިންމު ނުކުތާތައް
ޓޫރިޒަމްގެ މުދަލާއި ހިދުމަތްތަކުން ނަގާ ޓެކްސް އަންނަ އަހަރުގެ ޖުލައި މަހުން ފެށިގެން %17 އަށް އިތުރުވާނެ
ގްރީން ޓެކްސް ބޮޑުކުރާ އިސްލާހަށް އަމަލު ކުރާނީ އަންނަ ޖެނުއަރީ އިން ފެށިގެން
ވައިގެ މަގުން ރާއްޖެއިން ފުރާ ބޭރު މީހުންގެ އަތުން ނަގާ ޑިޕާޗާ ޓެކްސް އާއި އެއާޕޯޓު ޑިވެލޮޕްމެންޓު ފީ އަންނަ މަހުގެ 1 އިން ފެށިގެން ބޮޑުވާނެ
ރާއްޖޭގެ އެއާޕޯޓަކުން ބޭރަށް ފުރާ ފަސިންޖަރުންގެ އަތުން ނަގާ ފީ ބޮޑުކުރުމާއި ޓީޖީއެސްޓީ ބޮޑުކުރުމަށް އަދި ގްރީން ޓެކްސް ދެގުނަ ކުރުމަށް ކަމާ ގުޅޭ ގާނޫނުތަކަށް ރައްޔިތުންގެ މަޖިލީހުން ގެނައި އިސްލާހުތައް ރައީސް މުހައްމަދު މުއިއްޒު މިއަދު ތަސްދީގު ކުރައްވައިފި އެވެ.
ތަފްސީލް - އިސްލާހު ގެނައި ގާނޫނުތަކަކީ:
-
ޓޫރިޒަމާ ބެހޭ ގާނޫނު
-
މުދަލާއި ހިދުމަތުގެ އަގުން ނަގާ ޓެކުހުގެ ގާނޫނު
-
ރާއްޖޭގެ އެއާޕޯޓަކުން ރާއްޖެ އިން ބޭރަށް ފުރާ ފަސިންޖަރުންގެ އަތުން ޓެކްސް އާއި ފީ ނެގުމުގެ ގާނޫނު
ރައީސް ތަސްދީގު ކުރެއްވި އިސްލާހުތަކާ އެކު ޓޫރިޒަމުގެ ހިދުމަތްތަކުން ނަގާ ޓެކްސް ނުވަތަ ޓީޖީއެސްޓީ %16 އިން %17 އަށް ބޮޑުވާނެ އެވެ. އެ ބަދަލު އަންނާނީ އަންނަ އަހަރުގެ ޖުލައި މަހުން ފެށިގެންނެވެ.
ރާއްޖޭގެ އެއާޕޯޓަކުން ބޭރަށް ފުރާ ފަސިންޖަރުންގެ އަތުން ނަގާ ޑިޕާޗާ ޓެކްސް އާއި އެއާޕޯޓު ޑިވެލޮޕްމެންޓު ފީ ބޮޑުކުރަން ގާނޫނަށް ގެނައި އިސްލާހާއެކު އަންނަ މަހުގެ 1 ވަނަ ދުވަހުން ފެށިގެން:
-
އިކޮނޮމީ ކްލާހުން ދަތުރުކުރާ ބިދޭސީންގެ އަތުން 50 ޑޮލަރު ނަގާނެ
-
ބިޒްނަސް ކްލާހުން ދަތުރުކުރާ ދިވެހިންނާއި ބިދޭސީންގެ އަތުން 120 ޑޮލަރު ނަގާނެ
-
ފަސްޓް ކްލާހުން ދަތުރުކުރާ ހުރިހާ ފަސިންޖަރުންގެ އަތުން 240 ޑޮލަރު ނަގާނެ
-
ޕްރައިވެޓް ޖެޓުތަކުން ފުރާ ފަސިންޖަރުންގެ އަތުން 480 ޑޮލަރު ނަގާނެ
އެއާޕޯޓު ޑިވެލޮޕްމެންޓު ފީ އަދި ޑިޕާޗާ ޓެކްސްއަށް ގެނައި އިސްލާހުގެ ދަށުން އިކޮނޮމީ ކްލާހުން ދަތުރުކުރާ ދިވެހިންގެ އަތުން ނަގާ ޓެކުހަށް އެއްވެސް ބަދަލެއް ނުގެނެ އެވެ. ދިވެހިންގެ އަތުން ނަގަނީ ޑިޕާޗާ ޓެކުހުގެ ގޮތުގައި އަދި އެއާޕޯޓު ޑިވެލޮޕްމެންޓު ފީގެ ގޮތުގައި ވެސް 12 ޑޮލަރެވެ.
ގްރީން ޓެކްސް ބޮޑުކުރުމަށް ޓޫރިޒަމާ ބެހޭ ގާނޫނަށް ގެނައި އިސްލާހާ އެކު:
-
ގެސްޓްހައުސްތަކުން (50 ކޮޓަރިއަށް ވުރެ މަދު): 3 ޑޮލަރުން 6 ޑޮލަރަށް ބޮޑުވާނެ
-
ރިސޯޓްތަކާއި ސިޓީ ހޮޓާ އަދި 50 ކޮޓަރިއަށް ވުރެ ގިނަ، ޓޫރިސްޓުންނަށް ހިދުމަތް ދޭ ތަންތަނުން: 6 ޑޮލަރުން 12 ޑޮލަަރަށް ބޮޑުވާނެ
ގްރީން ޓެކްސް ބޮޑުކުރާ އިސްލާހަށް އަމަލު ކުރާނީ އަންނަ ޖެނުއަރީ އިން ފެށިގެންނެވެ.
ފާހަގަ ކުރެވޭ - ޓޫރިޒަމްގެ މުދަލާއި ހިދުމަތްތަކުން ނަގާ ޓެކްސް %1 ބޮޑުކުރުމުގެ އިތުރުން ގްރީން ޓެކްސް އާއި ރާއްޖޭގެ އެއާޕޯޓުން ފުރާ ބޭރު މީހުންގެ އަތުން ނަގާ ޓެކްސްތައް ބޮޑުކޮށްގެން ދައުލަތަށް ލިބޭ އާމްދަނީއަށް 3 ބިލިއަން ރުފިޔާ އިތުރުވާނެ ކަމަށް ސަރުކާރުން ލަފާކުރެ އެވެ.
ކޮމެންޓް