ޓޫރިޒަމް ނެތް ތަންތަނުގައި ތަރައްގީކުރަން ލުއި ދޭން ޖެހޭ: ފައިސަލް

ފަތުރުވެރިކަން ނެތް ސަރަހައްދުތަކުގައި އެ ސިނާއަތް ތަރައްގީ ކުރުމަށް، އެ ސަރަހައްދުތަކަށް ޓެކުހާއި ޓޫރިޒަމުން ނަގާ ފީތަކުން ލުއި ދޭން ޖެހޭ ކަމަށް ޓޫރިޒަމް މިނިސްޓަރު އިބްރާހިމް ފައިސަލް ރޭ ވިދާޅުވެއްޖެ އެވެ.

ވީ ކިހިނެއް؟ - ފަތުރުވެރިކަން ޕްރޮމޯޓު ކުރުމަށް އައްޑު އަކީ ޓޫރިޒަމްގެ ބްރޭންޑެއްގެ ގޮތުގައި އިޝްތިހާރުކުރުން އިފްތިތާހު ކުރުމަށް ރޭ އެ ސިޓީގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަ ދައްކަވުން ފައިސަލް ވިދާޅުވީ އެކަށީގެންވާ މިންވަރަށް ޓޫރިޒަމް ތަރައްގީވެފައި ނެތް ސަރަހައްދުތަކުގައި އެ ސިނާއަތް ތަރައްގީ ކުރުން މުހިއްމު ކަމަށެވެ.

ބުނީ ކީކޭ؟ - ފައިސަލް ވިދާޅުވީ ޓޫރިޒަމް ނެތް ސަރަހައްދުތަކަށް އެ ސިނާއަތް ގެންދިއުމަށް އޮތް އެންމެ ބޮޑު ގޮންޖެހުމަކީ ދަތުރުފަތުރު ކަމަށެވެ.

"މީގެ އިތުރުން، މި ސަރަހައްދުތަކުން ވެސް ރާއްޖޭގައި ޓޫރިޒަމް އެންމެ ފައްކާ ވެފައިވާ ސަރަހައްދުތަކުން ޓެކްސް ނެގިގެން ދިއުމަކީ ވެސް ގޮންޖެހުމެއް. މި ޓެކްސްތަކަށް ވެސް ލުއިތަކެއް ދީ، ލޭންޑް ރެންޓު، އިކުއިޒިޝަން ކޮސްޓު. މިހެން ހުރި [ކަންތައް ވެސް] ޓޫރިޒަމް ނެތް ތަންތަނަށް ލުއިތައް ދީގެން ނޫނިއްޔާ ރާއްޖޭގެ ޓޫރިޒަމް ނެތް  ސަރަހައްދުތަކަށް ޓޫރިޒަމް ގެންދިއުމަކީ ދަތިކަމަކަށް ވާނެ،" ފައިސަލް ވިދާޅުވި އެވެ.

މިނިސްޓަރު ވިދާޅުވީ ފަތުރުވެރިކަން ނެތް ސަރަހައްދުތަކުގައި އިންވެސްޓުކުރަން ފައިސާ ލިބުމުގެ ދަތިކަން ވެސް ކުރިމަތިވާ ކަމަށެވެ. އެ މައްސަލަ ހައްލު ކުރުމަށް ބޭންކުތަކާއި ފައިނޭންސިން އިދާރާތަކުން ފައިސާ ލިބުން ފަސޭހަކުރުމަށް މަސައްކައްތަކެއް ކުރައްވާކަން އޭނާ ފާހަގަކުރެއްވި އެވެ.

އައްޑޫގެ ޓޫރިޒަމަށް ގިނަ މަޝްރޫއުތަކެއް ކުރިއަށް ގެންދަން ނިންމާފައިވާކަން ފާހަގަކުރައްވާ މިނިސްޓަރު ވިދާޅުވީ އައްޑޫ އެއާޕޯޓު ހިންގާ ކުންފުނީގެ އެއް ހިއްސާދާރު، ކާސާ ހޯލްޑިންސް އިން ގަމުގައި ޓޫރިޒަމްގެ މަޝްރޫއެއް ކުރިއަށް ގެންދަން ބޭނުންވާ ކަމަށެވެ. އެކަމަށް ސަރުކާރުގެ އެއްބާރުލުމަށް އެދިފައިވާ ކަމަށާއި އެ މަސައްކަތްތައް ޓޫރިޒަމް މިނިސްޓްރީ ން ކުރަމުން އަންނަ ކަމަށް އޭނާ ވިދާޅުވި އެވެ.

"އައްޑޫގައި މިހާރު މިހުރީ ގާތްގަނޑަކަށް 1100 އެނދު. އެހެން ނަމަވެސް އެނދު އުފައްދައިގެންހޭ އައްޑޫގައި ޓޫރިޒަމް ތަރައްގީ ކުރާނީ ނޫނީ ކަނެކްޓިވިޓީއާ އެކު ބްރޭންޑުކޮށް، ދުނިޔޭގެ އެކި ކަންކޮޅުތަކުގައި އައްޑޫ އިޝްތިހާރުކޮށްގެންތޯ؟،" ފައިސަލް ވިދާޅުވި އެވެ.

މިނިސްޓަރު ވިދާޅުވީ އައްޑޫގައި ޓޫރިޒަމް ސިމްޕޯސިއަމެއް އަންނަ އަހަރު ބާއްވާނެ ކަމަށާއި އެ ސިމްޕޯސިއަމްއަށް އިންޑިއާ އާއި ޗައިނާގެ ޓުއަ އޮޕަރޭޓަރުންނާއި އެއާލައިންތައް އަދި ބުކިން ޕްލެޓްފޯމުތައް ގެނެސް، އައްޑޫގެ ޓޫރިޒަމް ވިއްކަން މަސައްކަތް ކުރައްވާނެ ކަމަށެވެ.

އަންނަ އަހަރުގެ ފުރަތަމަ ނޫނީ ދެ ވަނަ ކުއާޓަރުގައި އެ މަސައްކަތް ކުރައްވާނެ ކަމަށް ފައިސަލް ވިދާޅުވި އެވެ.

މިނިސްޓަރު ވިދާޅުވީ ކުރިއަށް އޮތް 5-7 އަހަރު ތެރޭ ދެކުނުގައި މުޅިއެކު 4،000 ނުވަތަ 6،000 އެނދު އުފެއްދޭ ވަރަށް މަސައްކަތް ކުރެވިއްޖެ ނަމަ އައްޑޫ އިންޓަނޭޝަނަލް އެއާޕޯޓުގެ ބޭނުން ވެސް ފުރިހަމައަށް ހިފޭނެ ކަމަށެވެ.

"މިކަމުގައި އަޅުގަނޑު އެދެނީ އައްޑޫ، ފުވައްމުލައް އަދި ގއ. އަދި ގދ.ގެ ބޭފުޅުން އެކުވެރިވެ، އެންމެން އެކަތިގަނޑެއްގެ ގޮތުގައި މަސައްކަތް ކުރުން،" މިނިސްޓަރު ވިދާޅުވި އެވެ.

އައްޑޫގައި އޮންނަ ޝަންގްރިއްލާ ވިލިނގިިލި ރިސޯޓު ހުޅުުވުމަށް ކުރައްވާ މަސައްކަތްތައް ފާހަގަކުރައްވައި ފައިސަލް ވިދާޅުވީ:

"ޝަންގްރިއްލާ މިހާރު އެ އޮތް ގޮތަށް އޮޕަރޭޝަނަށް ގެންނަން މަސައްކަތް ކުރި ނަމަވެސް މަސްތަކެއް ނަގާނެ އެ ތަނުގެ ރިނޮވޭޝަންއަށް. ބަންދުކޮށްފައި އޮންނަތާ އެތައް ދުވަހެއް ވެއްޖެ،" ފައިސަލް ފާހަގަކުރެއްވި އެވެ.

ހަންކެޑެ އާއި އައްސޭރި ޓޫރިޒަމް އަދި ކާސާ ހޯލްޑިންސްގެ މަޝްރޫއު ފަށައިގަތުމަކީ ޝަންގްރިއްލާ ހުޅުވުމަށް އެޅޭނެ ބާރެއް ކަމަށް ވެސް ފައިސަލް ފާހަގަކުރެއްވި އެވެ.

"އެ ބޭފުޅުންނަށް ބޭނުންވަނީ އައްޑޫގެ ޓޫރިޒަމަށް ކޮބައިތޯ ސަރުކާރުގެ ޕްލޭނަކީ. އަޅުގަނޑަށް ގަބޫލު ކުރެވެނީ ހަންކެޑެ، އައްސޭރި އަދި ކާސާ ހޯލްޑިންސްގެ ޕްރޮޖެކްޓުގެ މަސައްކަތް ފެށިއްޖެ ނަމަ، ޝަންގްރިއްލާ ހުޅުވުމަށް ޝަންގްރިއްލާގެ އޯނަރުން ވެސް ބޭނުންވާނެ. އެއީ އެ ބޭފުޅުންގެ އަތުގައި ބަންދުކޮށްފައި ޕްރޮޕަޓީއެއް އޮތީ. ޝަންގްރިއްލާއާ މެދު ވަރަށް ބޮޑު އުއްމީދެއް އެބައޮތް،" ފައިސަލް ވިދާޅުވި އެވެ.

އޭނާ ވިދާޅުވީ ކޮންމެ އަހަރަކު ވެސް 200 ނޫނީ 100 މިލިއަން ރުފިޔާ ޓޫރިޒަމަށް އެކަށައެޅުމަށް މަސައްކަތް ކުރައްވާނެ ކަމަށާއި އެއީ ލުއި އިންޓްރެސްޓުގައި ލިބޭ ލޯނަށް ހެދުމަށް ވެސް މަސައްކަތް ކުރައްވާނެ ކަމަށެވެ.

މިނިސްޓަރު ވިދާޅުވީ ޓޫރިޒަމް ކުރިއެރުވުމަށް ދަތުރުފަތުރުގެ ނިޒާމު ހަރުދަނާކޮށް، އެ ދާއިރާ ތަރައްގީ ކުރަން ފައިސާ ލިބޭނެ ފަސޭހަ ގޮތްތައް ފަހިކޮށްދެވިއްޖެ ނަމަ، ކުރިއަށް އޮތް 15-5 އަހަރު ތެރޭ ރާއްޖޭގެ ޓޫރިޒަމް މިހާރަށް ވުރެ ކުރިއަރައިގެން ގޮސް، ޓޫރިޒަމް ނެތް ސަރަހައްދުތަކަށް އެ ސިނާއަތް ގެންދެވޭނެ ކަމަށެވެ.