100 ކިލޯ ޑްރަގް މައްސަލައާ ގުޅިގެން ހައްޔަރުކުރި ދެ މީހަކު ދޫކޮށް އަށް މީހަކު ބަންދަށް

ފުލުހުން ހިންގި ބޮޑު އޮޕަރޭޝަނެއްގައި އަތުލައިގަތް 100 ކިލޯގެ މަސްތުވާތަކެއްޗާ ގުޅުން ހުރި 10 މީހުންގެ ތެރެއިން އަށް މީހެއްގެ ބަންދުގެ މުއްދަތު އިތުރުކޮށް ދެ މީހަކު ކްރިމިނަލް ކޯޓުން ދޫކޮށްލައިފި އެވެ.

ތަފްސީލް - މިދިޔަ ބުދަ ދުވަހުން ފެށިގެން ފުލުހުން ކުރިއަށްގެންދިޔަ އެ އޮޕަރޭޝަނުގައި ހައްޔަރުކޮށްފައި ވަނީ އުމުރުން 19 އަހަރުން ފެށިގެން 61 އަހަރާ ދެމެދުގެ އެކި އުމުރުތަކުގެ 10 ފިރިހެނުންނެވެ. އޭގެ ތެރޭގައި ދެ ބިދޭސީއަކު ވެސް ހިމެނޭ ކަމަށް ފުލުހުން ބުނެ އެވެ.

ބަންދުގެ މުއްދަތު - އެ މައްސަލައާ ގުޅިގެން ހައްޔަރުކުރި މީހުންގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ހަތަރު މީހެއްގެ ބަންދަށް 15 ދުވަސް، ތިން މީހެއްގެ ބަންދަށް 10 ދުވަސް އަދި އެކަކަށް ފަސް ދުވަހުގެ މުއްދަތެއް ދިން ކަމަށް، ފުލުހުން ބުންޏެވެ.

ފުލުހުން ބުނީ ދޫކޮށްލި ދޫކޮށްލި ދެ މީހުންގެ މައްސަލަ އިސްތިއުނާފުކުރަން އެދި މިހާރު ވަނީ ޕްރޮސެކިއުޓާ ޖެނެރަލްގެ އޮފީހަށް ފޮނުވާފައި ކަމަށެވެ.

އެނގުން މުހިންމު - ފުލުހުންގެ ބައެއް އޮޕަރޭޝަންސްތަކުގައި ގިނަ އަދަދެއްގެ މަސްތުވާތަކެތި މި ފަހުން އަންނަނީ އަތުލަމުންނެވެ. އެގޮތުން 12 އޮކްޓޯބަރު 2020 ގައި ހުޅުމާލޭ ފަޅުތެރޭގައި އޮތް ކަންނެލި ދޯންޏަކުން 100 ކިލޯގެ ޑްރަގް އަތުލައިގަތެވެ. ހަމަ އެ މަހު، އައްޑޫން ވެސް ވަނީ 100 އެއްހާ ކިލޯގެ ޑްރަގް އަތުލައިގަނެ ބޮޑު ޑްރަގް ނެޓްވޯކެއްގެ ބަޔަކު ހައްޔަރުކޮށްފަ އެވެ.  

އިތުރަށް ކިޔާލަން

100 ކިލޯ ޑްރަގް އަތުލައިގަނެ 10 މީހަކު ހައްޔަރުކޮށްފި