100 ކިލޯ ޑްރަގް އަތުލައިގަނެ 10 މީހަކު ހައްޔަރުކޮށްފި

ފުލުހުން މިހާރު ހިންގަމުން އަންނަ އޮޕަރޭޝަނެއްގައި 100 ކިލޯގެ މަސްތުވާތަކެތި އަތުލައިގެންފި އެވެ.

ވީ ކިހިނެއް؟ - ޕޮލިސް ކޮމިޝަނަރު މުހައްމަދު ހަމީދު ދާދި ދެންމެއަކު ކުރެއްވި ޓުވީޓެއްގައި ވިދާޅުވީ ފާއިތުވި 24 ގަޑިއިރު ތެރޭގައި ފުލުހުން ހިންގި ޑްރަގް އޮޕަރޭޝަނެއްގައި 100 ކިލޯ ހެރޮއިން އަތުލައިގެންފައިވާ ކަމަށެވެ.

ތަފްސީލް - ޑްރަގް އެންފޯސްމަންޓް ޑިޕާޓްމަންޓް (ޑީއީޑީ) އާއި ޑްރަގް އިންޓެލިޖެންސް އަދި މެރިން ޕޮލިސް ގުޅިގެން ހިންގި އެ އޮޕަރޭޝަންގައި މަސްތުވާތަކެތި އަތުލައިގަތީ ތަފާތު އެކި ތަންތަނުންނެވެ. އެގޮތުން، 10 ތަނެއް ފުލުހުން ބަލައި ފާސްކުރި ކަމަށާއި 10 މީހަކު ވެސް ހައްޔަރުކޮށްފައިވާ ކަމަށް ސީޕީ ވިދާޅުވި އެވެ.

ފުލުހުންގެ ތަރުޖަމާނަކު 'ދައުރު'އަށް ވިދާޅުވީ އެ އޮޕަރޭޝަން އަދިވެސް ކުރިއަށްދާތީ އިތުރު މައުލޫމާތު ހާމަކުރެވެން ނެތް ކަމަށެވެ.

އެނގުން މުހިންމު - 12 އޮކްޓޯބަރު 2020ގައި ހުޅުމާލޭ ފަޅު ތެރޭގައި އޮތް ކަންނެލި ދޯންޏަކުން ފުލުހުން ވަނީ 100 ކިލޯގެ ޑްރަގް އަތުލައިގެންފަ އެވެ. ހަމަ އެ މަހު، އައްޑޫން ވެސް ވަނީ 100 އެއްހާ ކިލޯގެ ޑްރަގް އަތުލައިގަނެ ބޮޑު ޑްރަގް ނެޓްވޯކެއްގެ ބަޔަކު ހައްޔަރުކޮށްފަ އެވެ.