މިދިޔަ އޮގަސްޓް މަހު ބޭއްވި އެމްޑީޕީގެ ކޮންގްރެސް ތެރެއިން (ދައުރު ފޮޓޯ/އަބްދުﷲ ޔަޝާއު)
ވަގަށް އެހެން ޕާޓީތަކަށް ވައްދާފައިވާ މެންބަރުންނަށް އެމްޑީޕީއިން ފުރުސަތު ދެނީ
އެހެން ޕާޓީތަކުގެ ދަފްތަރުގައި ނަން އޮތުމުގެ ސަބަބުން އެމްޑީޕީ ދަފްތަރުން އުނިކޮށްފައިވާ ފަރާތްތަކަށް އަލުން އެމްޑީޕީއަށް ވަނުމަށް ފުރުސަތު ދޭން އެ ޕާޓީއިން ނިންމައިފި އެވެ.
ވީ ކިހިނެއް؟ - އެމްޑީޕީގެ ދަފްތަރާމެދު އެޕާޓީގެ ރައީސް މުހައްމަދު ނަޝީދު ސުވާލު އުފައްދާފައި ވަނިކޮށް، އެ ޕާޓީން މިއަދު ވަނީ، ވަގަށް އެހެން ޕާޓީތަކަށް ވައްދާފައި ތިބި މެންބަރުން ޕާޓީއަށް އަލުން ވަނުމަށް، މެމްބާޝިޕް ފޯމް ހުށަހެޅުމަށް އެދިފަ އެވެ.
އެގޮތުން އެމްޑީޕީިއިން މިއަދު ކުރި ޓްވީޓެއްގެ ޒަރިއްޔާއިން އެދިފައި ވަނީ އެމްޑީޕީގެ އެއްވެސް މެންބަރަކަށް ނޭނގި އެހެން ޕާޓީ އަކަށް ވައްދާފައިވާނަމަ، އެމްޑީގެ މެންބާޝިޕް ފޯމު ފުރިހަމަކުރުމުން އަލުން ޕާޓީގެ މެންބަރަކަށް ވުމުގެ ފުރުސަތު ދޭނޭ ކަމަށެވެ.
"ފޯމް ފުރިހަމަކޮށް އިލެކްޝަންސް ކޮމިޝަނަށް ހުށައެޅުމުން އެކަން ބަލާ އެ މެންބަރަކު އެމްޑީޕީ އަށް ރުޖޫއަ ކޮށްދޭނެ ،"އެ ޓްވީޓްގައި ބުނެފައިވެ އެވެ.
ގުޅުން ހުރި - އެމްޑީޕީގެ ރިޔާސީ ޕްރައިމަރީގައި ވާދަކުރައްވާ ނަޝީދު މިދިޔަ ބުދަ ދުވަހު ވިދާޅުވީ، 40،000 މެންބަރުން ވަނީ އެޕާޓީގެ ދަފްތަރުން އުނިކޮށްފަ އެވެ. އަދި އެހާލަތުގައި ބާއްވާ ޕްރައިމަރީ މިނިވަން ނުވާނެ ކަމަށް އެމަނިކުފާނު ތުހުމަތު ކުރެއްވި އެވެ.
އެ ތުހުމަތާ ގުޅިގެން އެމްޑީޕީން ބުދަ ދުވަހު ނެރުނު ބަޔާނުގައި ބުނީ، ޕާޓީގެ ދަފްތަރު މިހާރު އޮތީ، ސައްހަކޮށް ކަމަށާއި ނަޝީދުގެ ވާހަކަތާ މެދު ހިތާމަ ކުރާ ކަމަށެވެ.
ޗެއާޕާސަންގެ މަގާމަށް ފައްޔާޒު ކެމްޕެއިން ކުރެއްވިރު، ޕާޓީގެ ދަފްތަރު ސާފުކުރުމަކީ އޭނާގެ ވައުދެކެވެ. ފައްޔާޒު މަގާމާ ހަވާލުވުމަށް ފަހު، ޕާޓީގެ ކުރީގެ ދަފްތަރު އުވާލައި، އިލެކްޝަން ކޮމިޝަންގެ ދަފްތަރު ވަނީ އެއްގޮތް ކޮށްފަ އެވެ. އެ ނިންމުން ނިންމާފައިވަނީ މިިދިޔަ މެއި މަހު ބޭއްވި އެމްޑީޕީގެ ގައުމީ މަޖިލީހުގެ ޖަލްސާއަށް ހުށަހަޅައިގެން، އެ މަޖިލީހުން ފާސްކޮށްގެންނެވެ. ނަޝީދު ފެކްޝަންގެ މެންބަރުން އޭރު ވެސް އެކަމާ ކަންބޮޑުވުން ފާޅުކުރި އެވެ.
ކުރިން އޮތް ދަފްތަރުގައި 17،000 މީހުން ތިބީ އެހެން ޕާޓީތަކުގައި: އިބްރާހިމް ވަހީދު
މިިދިޔަ މެއި މަހު އެމްޑީޕީގެ ގައުމީ މަޖިލިސްއިން އެ ނިންމުން ނިމުމުގެ ކުރިން، އެޕާޓީގެ މިހާރުގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) އެ މަޖިލީހާ ހިއްސާ ކުރި ލިޔުމެއް އޭނާ މިއަދު ވަނީ ޝޯޝަލް މީޑިއާގައި އާންމުކޮށްފަ އެވެ.
މިދިޔަ މެއި މަހު ބޭއްވި އެމްޑީޕީގެ ޗެއާޕާސަން އިންތިހާބާއި މިދިޔަ އަހަރު އެޕްރީލް މަހު ބޭއްވި ދާއިރާތަކުގެ އިންތިހާބުގައި ވޯޓުލުން ބާއްވާފައި ވަނީ، ޕާޓީގައި އޮތް ދަފްތަރަށެވެ. އެ ދަފްތަރުގައި 93،000އަށްވުރެ ގިނަ މެންބަރުން އެމްޑީޕީގެ ރަޖިސްޓްރީގައި އޮތެވެ.
އިބްރާހިމް ވަހީދުގެ ލިޔުމުގައި ބަލާފައި ވަނީ، މިދިޔަ އަހަރު އެޕްރީލް މަހު އޮތް ޕާޓީގެ ދަފްތަރުގައި ހުރި މައްސަލަތަކާއި އިލެކްޝަންްސް ކޮމިޝަންގެ ދަފްރަތާ އަޅާ ކިޔުމެވެ.
އިބްރާހިމް ވަހީދު ވިދާޅުވީ، 93،000 މީހުންގެ ތެރެއިން 17،00އެއްހާ މީހުންނަކީ އިލެކްޝަސް ކޮމިޝަންގެ ދަފްތަރުގައިވާގޮތުން އެހެން ޕާޓީތަކުގެ މެންބަރުންނެވެެ. އެއީ:
-
ޕީޕީއެމް: 6،357 މެންބަރުން
-
ޖުމްހޫރީ ޕާޓީ: 3،788 މެންބަރުން
-
އެމްޑީއޭ:1،762 މެންބަރުން
-
އަދަލާތު ޕާޓީ: 1،211 މެންބަރުން
-
އެމްޓީޑީ: 1،048 މެންބަރުން
-
އެމްއާރުއެމް:1،029 މެންބަރުން
-
ޕީއެންސީ: 698 މެންބަރުން
-
ލޭބާ ޕާޓީ: 875 މެންބަރުން
-
ޑީއާރުޕީ:389 މެންބަރުން
-
ޖުމްލަ:17،157 މީހުން
އޭނާ ވިދާޅުވީ، ޕާޓީގެ ދަފްތަރުގައި އޮތް 24،033 މެންބަރުނަކީ އިލެކްޝަން ކޮމިޝަންގެ ދަފްތަރުގައިވާ ގޮތުން އެއްވެސް ޕާޓީއެއްގައި ރަޖިސްޓްރީވެފައި ނުވާ މީހުން ކަމަށެވެ.
"މި މަސައްކަތުގެ ތެރެއިން އެންމެ އަޖައިބު ކުރަނިވި ކަމަކަަށް ފާހަގަވީ، އެމްޑީޕީގެ ވެބްސައިޓުގައި ނެތް 46 މީހެއްގެ ނަން އެމްޑީޕީގެ މެންބަރުންގެ ގޮތުގައި އިލެކްޝަންސް ކޮމިޝަންގެ ދަފްތަރުގައި ހިމެނޭ ކަމެވެ،" އެ ލިޔުމުގައި އޭނާ ވިދާޅުވި އެވެ.
'އެހެން ޕާޓީތަކުގެ ކައުންސިލަރުން ވެސް އެމްޑީޕީގައި ތިބި'
އިބްރާހިމް ވަހީދުގެ އެ ލިޔުމުގައި ޕާޓީގެ ދަފްތަރުގައި އޮތް މީހުންގެ ތެރެއިން އެހެން ޕާޓީތަކާއި އަމިއްލަ ގޮތުން ވާދަކޮށް އިންތިހާބުވި ކައުންސިލަރުންނާއި އެގޮތަށް އިންތިހާބުވި އަންހެނުންގެ ތަރައްގީއަށް މަސައްކަތް ކުރާ ކޮމިޓީ، ޑަބްލިއުޑީސީގެ މެންބަރުންގެ ލިސްޓެއް ވެސް އާންމުކޮށްފައިވެ އެވެ.
އޭނާ ވިދާޅުވީ، އެމްޑީޕީގެ ޓިކެޓްގައި ވާދަކޮށްގެން ހޮވިފައި ވަނީ، 403 ކައުންސިލަރުންނެވެ. ނަމަވެސް ކައުންސިލަށް އަމިއްލަ ގޮތުންނާއި އެހެން ޕާޓީތަކުން ވާދަކޮށް އިންތިހާބުވި 124 މެންބަރުން އޭރު އެމްޑީޕީގެ ދަފްތަރުގައި އޮތް ކަމަށް އޭނާ ވިދާޅުވި އެވެ. އެއީ:
-
އަމިއްލަ: 62 ކައުންސިލަރުން
-
ޕީޕީއެމް: 54 ކައުންސިލަރުން
-
ޖުމްހޫރީ ޕާޓީ:6 ކައުންސިލަރުން
-
އަދާލަތު ޕާޓީ: 1 ކައުސިލަރު
-
ލޭބާ ޕާޓީ: 1 ކައުންސިލަރު
ޑަބްލިއުޑީސީއަށް އެމްޑީޕީން ވާދަކޮށް ހޮވިފައިވަނީ 306 މެންބަރުން ކަމަށް އޭނާ ވިދާޅުވި އެވެ. ނަމަވެސް އެހެން ޕާޓީތަކުންނާއި އަމިއްލަ ގޮތުން ވާދަ ކުރި 101 މެންބަރަކު އެ އިންތިހާބު ކާމިޔާބު ކުރި ކަމަށް އޭނާ ވިދާޅުވި އެވެ. އެއީ:
-
އަމިއްލަ: 55 މެންބަރުން
-
ޕީޕީއެމް:41 މެންބަރުން
-
ޖުމްހޫރީ ޕާޓީ: 4 މެންބަރުން
-
އެމްއާރުއެމް:1 މެންބަރުން
ކޮމެންޓް (2)
މުހައްމަދު - މުލަކު
ސްމޭޝް