އަމީނީމަގުގައި ހުރި ގަސްތައް ނަގައި ކުޑަގިރިއަށް

މާލޭގެ އަމީނީމަގު ތާރު އަޅައިގެން ތަރައްގީކުރުމަށް ފަށާފައިވާ މަސައްކަތުގެ ދަށުން، އެ މަގުގައި ހުރި ގަސްތައް ނަގައި މާލޭގައި އުޅޭ މީހުން ދަތުރު ދާން ފަޅެއް ހިއްކައިގެން ތައްޔާރުކުރަމުން އަންނަ ކ. ކުޑަގިރިއަށް ގެންދަން ނިންމާފައިވާ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން މިއަދު ބުނެފި އެވެ.

ވީ ކިހިނެއް؟ - 'މާލެ ސްޓްރީޓް ސްކޭޕިން ޕްރޮޖެކްޓު'ގެ ދަށުން އަމީނީމަގު ހެދުމުގެ އަމަލީ މަސައްކަތް މިދިޔަ މަހުގެ 30ގަ އެވެ. އެ މަސައްކަތުގެ ތެރެއިން މިހާރު ވަނީ އަމީނީމަގުގައި ހުރި ގަސްތައް ނަގަން ފަށައިފަ އެވެ.

ތަފްސީލް - މަގުގައި ހުރި ގަސްތައް ނަގާތީ ބޮޑެތި ފާޑުކިޔުންތަކެއް އަމާޒުވެފައި ވަނިކޮށް އާރްޑީސީން ނެރުނު ބަޔާނެއްގައި ބުނީ، އަމީނީމަގު ތަރައްގީ ކުރުމުގެ މަސައްކަތް އެ ކުންފުންޏާ ހަވާލުކުރި ދުވަހުން ފެށިގެން ވެސް، އެ މަގު މަރާމާތު ކުރުމުގެ މަސައްކަތް ކުރިއަށް ގެންދަން ނިންމާފައި އޮތީ މަގުގައި ހުރި އެއްވެސް ގަހަކަށް ގެއްލުން ނުވާނެ ގޮތަކަށް، ތިމާވެއްޓާ ރައްޓެހި ގޮތަކަށް ކަމަށެވެ.

ނަމަވެސް، މާލޭގެ ހުރިހާ މަގުތަކާ އެއް ގޮތަށް އަމީނީމަގަކީ ވެސް ފެނާއި ނަރުދަމާގެ އިތުރުން އެހެން ބައިވަރު ނެޓްވޯކުތަކެއް ވެސް ވަޅުލާފައިވާ މަގަކަށް ވާތީ، އެ މަސައްކަތް ކުރުމަށް ވަރަށް ބޮޑެތި ގޮންޖެހުންތަކެއް ހުރި ކަމަށް އާރްޑީސީން ބުންޏެވެ.

އާރްޑީސީން ބުނީ:

އާރްޑީސީން ބުނީ އަމީނީމަގުގައި ހުރި ގަސްތައް ބަހައްޓައިގެން އެ މަހުގެ މުޅި ނެޓްވޯކް އަޕްގްރޭޑު ކުރުމަކީ ވަރަށް ބޮޑު ގޮންޖެހުމެއް ކަމަށެވެ.

ބުނީ ކީކޭ؟ - "މިހާރު ވެސް އެ މަގުގައި ވަޅުލާފައިވާ ހޮޅިތަކާއި އެހެނިހެން ކޭބަލްތަކަށް ގަސްތަކުގެ މުލުގެ އަސަރު ވަނީ ވަރަށް ބޮޑަށް ކޮށްފައި،" ބަޔާނުގައި ބުންޏެވެ.

އެހެންކަމުން، އަމީނީމަގުގައި ހުރި ގަސްތައް އެހެން ތަނަކަށް ބަދަލުކުރުމުގެ މަސައްކަތް ކުރަމުން އަންނަ ކަމަށާއި، ގަސްތައް ކެނޑުމުގެ ބަދަލުގައި ގަސްތައް ނެގުމަށް ފަހު ގެންދާނީ ކުޑަގިރިއަށް ކަމަށް އެ ބަޔާނުގައި ބުނެފައިވެ އެވެ.

"އަދި އަމީނީމަގުގެ މަސައްކަތް ނިމޭއިރު އެ މަގުން ނަގާ ގަސްތަކުގެ ބަދަލުގައި ގަސް އިންދެން ހުރި ތަންތަނުގައި ގަސް އިންދާނެ. މީގެ އިތުރުން އަމީނީމަގު އިތުރަށް ފެހިކުރުމަށްޓަކައި ޓްރީޕިޓް ބަހައްޓާނެ،" ބަޔާނުގައި ބުނެފައިވެ އެވެ.