އަމީނީ މަގު ހެދުމުގެ މަޝްރޫއު ރަސްމީކޮށް ފެއްޓުމަށް މިއަދު ހަވީރު ބޭއްވި ރަސްމިއްޔާތުގެ ތެރެއިން (ފޮޓޯ/އާރްޑީސީ)
އަމީނީ މަގުގެ މައްސަލަ ހައްލުކުރާ ބޮޑު މަޝްރޫއުގެ އަމަލީ މަސައްކަތް ފަށައިފި
މާލޭގެ އަމީނީ މަގު ޒަމާނީ ފެންވަރަށް ތަރައްގީ ކުރަން ރޯޑް ޑިވޮލޮޕްމެންޓް ކޯޕަރޭޝަން (އާރްޑީސީ)އާ ހަވާލުކޮށްފައިވާ މަޝްރޫއުގެ އަމަލީ މަސައްކަތް މިއަދު ފަށައިފި އެވެ.
ވީ ކިހިނެއް؟ - އަމީނީ މަގުގައި އަޑިގުޑަންތައް ގިނަވެ، ވެހިކަލް ދުއްވަން އުނދަގޫވުމަކީ ގިނަ ބަޔަކު ކުރާ ޝަކުވާއެކެވެ. ވާރޭ ވެހޭ ނަމަ ވަރަށް ބޮޑަށް ފެން ހެދޭ އެ މަގުގައި ހިނގާބިނގާވެ އުޅުމަށާއި ވެހިކަލް ދުއްވުމަކީ ވެސް ފަސޭހަ ކަމެއް ނޫނެވެ. އެކަން ހައްލު ކުރަން ސަރުކާރުން ފަށާފައިވާ 84 މިލިއަން ރުފިޔާގެ މަޝްރޫއުގެ އަމަލީ މަސައްކަތް އަމީނީ މަގުގައި ފެށީ މިއަދު ދަރުބާރުގެ ކައިރީގައި ބޭއްވި ރަސްމިއްޔާތެއްގަ އެވެ.
ތަފްސީލް - އެ ރަސްމިއްޔާތުގައި، އަމީނީ މަގުގެ އަމަލީ މަސައްކަތް ފައްޓަވައިދެއްވީ މާލޭ މޭޔަރު ޑރ. މުހައްމަދު މުއިއްޒާއި، މާލޭގެ ކުރީގެ މޭޔަރު މައިޒާން އަލިމަނިކާއި ރޯޑް ޑިވެލޮޕްމަންޓް ކޯޕަރޭޝަންގެ މެނޭޖިން ޑިރެކްޓަރު މޫސާ އަލީ މަނިކު (މޫކޭ) އާއި ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން އަދި މަޖިލީހުގެ ހެންވޭރު ދެކުނު ދާއިރާގެ މެމްބަރު ހުސައިން ޝަހީމް އެވެ.
އެ މަގު ހަދާނީ އެންމެ ޒަމާނީ ފެންވަރުގައި ކަމަށް އާރްޑީސީއިން ބުނެ އެވެ. އެގޮތުން، އެ މަގުގައި:
-
1.79 ކިލޯމީޓަރުގެ ތާރު އަޅާނެ
-
ބަސް ހުއްޓިތަކާއި ޕާކިން ޒޯނުތައް ހަދާނެ
-
މަގުބައްތި ހަރުކުރާނެ
-
ގަސް އިންދައިގެން ފެހިކުރުމަށް 'ޓްރީ ޕިޓް' ބަހައްޓާނެ
-
ކޭބަލް އެޅުމަށްޓަކައި މަގުގެ ދެ ފަޅީގައި ކޭބަލް ޓްރޭ ހަދާނެ
-
އެޗްވީ ކޭބަލަށް ހާއްސަކޮށްގެން ޖަންކްޝަންތަކެއް ބަހައްޓާނެ
-
ވީލްޗެއާ އެކްސެސް ގާއިމް ކުރާނެ
-
ނުކުޅެދުންތެރިކަން ހުންނަ ފަރާތްތަކަށް އެހީވުމަށް ދުވާރުގައި ބްރެއިލް ބްލޮކްސް ޖަހާނެ
-
ސައިން ބޯޑުތަކާއި ބަމްޕަރުތައް ހަދާނެ
-
ފެން ހިންދާ ނިޒާމެއް ގާއިމް ކުރާނެ
އެނގުން މުހިއްމު - އަމީނީ މަގު ހެދުމުގެ މަޝްރޫއު ޕްލޭނިން މިނިސްޓްރީއިން ޖުލައި 3 ވަނަ ދުވަހު އާރްޑީސީއާ ހަވާލުކޮށްފައި ވަނީ ހަތް މަހުގެ ތެރޭޭގައި ނިންމާ ގޮތަށެވެ.
ފަސްމަންޒަރު - އެކި ޒާތްޒާތުުގެ ހޮޅިއާއި ކޭބަލް އަޅަން ކޮންނަން ޖެހޭތީ އާއި
އަޑިގުޑަންވެ ހަލާކުވުމާއި ބޯކޮށް ވާރޭވުމުން ފެންބޮޑުވުން ފަދަ
މައްސަލަތައް ދިމާވާތީ މާލޭގެ މަގުތައް ހެދުމަށާއި މަރާމާތު ކުރުމަށް
ބޮޑެތި މަޝްރޫއުތައް އަބަދުވެސް ހިންގަން ޖެހެ އެވެ. ނަމަވެސް، މި މަޝްރޫއު ނިމޭ އިރު އެ ހުރިހާ މައްސަލަތަކަށް ހައްލެއް ލިބޭނެ ކަމަށް ސަރުކާރުން ބުނެ އެވެ.
މާލޭގެ މަގުތައް ހަދަމުން ދަނީ ސްޓްރީޓް ސްކޭޕިން ޕްރޮޖެކްޓުގެ ނަމުގައި ހިންގާ 462 މިލިއަން ރުފިޔާގެ މަޝްރޫއެއްގެ ދަށުންނެވެ. އެ ޕްރޮޖެކްޓުުގެ ދަށުން 15 މަގު ހަދަން ނިންމާފައިވާއިރު، މިހާތަނަށް ނިމިފައިވަނީ ތިން މަގެކެވެ. އެ މަޝްރޫއުގެ ދަށުން ތަަރައްގީ ކުރާ މަގުތަކުގައި ތާރު އަޅާ ގޮތަށް ވަނީ ހަމަޖެހިފަ އެވެ.