މުދިމު ގަޔަށް 13 ފަހަރު ވަޅި ޖެހި؛ ފައި ރަަނގަޅަށް ހަރަކާތެއް ނުކުރޭ: އާއިލާ

ތ. ދިޔަމިގިލީގައި އެ ރަށު މިސްކިތުގެ ވަގުތީ މުދިމަށް އިއްޔެ ވަޅިން ދިން ހަމަލާގައި އޭނާގެ ހަށިގަނޑަށް 13 ފަހަރު ވަޅި ޖެހުމުގެ ސަބަބުން އޭނާގެ ފައި އަދި ރަނގަޅަށް ހަރަކާތް ނުކުރާ ކަމަށް އާއިލާއިން މިއަދު ބުނެފި އެވެ.

ވީ ކިހިނެއް؟ - ތ. ދިޔަމިގިލީ މަސްޖިދުލް އަމާނާތުގެ މުދިމަކަށް މީގެ ތިން ދުވަސް ކުރިން ހަމަޖެއްސި އުމުރުން 55 އަހަރުގެ އަހްމަދު ރަޝީދު މުހައްމަދަށް ވަޅިން ހަމަލާ ދިނުމުގެ ސަބަބުން އޭނާ އިއްޔެ މާލެ ގެނެސް އައިޖީއެމްއެޗްގައި އަންނަނީ ފަރުވާ ދެމުންނެވެ. އެކަމުގެ ތުހުމަތުގައި ދިވެހި ފިރިހެނަކު ވަނީ ހައްޔަރުކޮށްފަ އެވެ.

ބުނީ ކީކޭ؟ - އާއިލާގެ ފަރާތުން މިއަދު 'ދައުރު'އާ ވާހަކަ ދެއްކި މީހަކު ބުނީ މި މައްސަލައިގެ ތުހުމަތުގައި ހައްޔަރުކުރި މީހާ އާއި އަހްމަދު ރަޝީދަކީ ގާތް ދެ މީހުން ކަމަށާއި ވަޅި ޖަހަން ޖެހުނު ސަބަބު އަދިވެސް ނޭނގޭ ކަމަށެވެ.

"މައިބަދައަށް އަސަރުކޮށްފައިވާތީ އަދިވެސް ދެ ފައި ރަނގަޅަށް ހަރަކާތް ނުކުރެވޭ. ވަރަށް ކުޑަކޮށް ހަރަކާތް ހުރީ. އެކަމަކު ޑޮކްޓަރުގެ އުންމީދު އެބަ އޮތް ރަނގަޅު ވާނެ ކަމުގެ،" ނަން ނުޖަހާ ގޮތަށް ވާހަކަދެއްކި އާއިލާގެ މެމްބަރު ބުންޏެވެ.

ޑޮކްޓަރުންނާ ހަވާލާދީ އޭނާ ބުނީ، ގައިގެ ހަތަރު ތަނަކަށް 13 ފަހަރު ވަޅި ޖަހާފައިވާ ކަމަށެވެ. އޭނާ ބުނި ގޮތުގައި ވަޅި ޖަހާފައި ވަނީ:

ނަމަވެސް، ކުރިއަށް ވުރެ އޭނާގެ ހާލު މިހާރު ރަނގަޅު ކަމަށް ވެސް އާއިލާގެ މެމްބަރު ބުންޏެވެ.

މިކަމާ ގުޅޭ ގޮތުން އައިޖީއެމްޗުގެ ބަހެއް އަދި ނުލިބެ އެވެ.

ގިނަ ދުވަސްތަކެއް ވަންދެން ކަސްޓަމްސްގެ ވަޒީފާގައި އުޅުނު އަހްމަދު ރަޝީދު ވަނީ މީގެ ކުރިން އެމްއެންޑީފްގައި ގުރުއާން ކިޔަވައިދޭ ގާރީއަކަށް ވެސް މަސައްކަތް ކޮށްފަ އެވެ.

އެނގުން މުހިންމު - އަހްމަދު ރަޝީދުގެ ގަޔަށް ވަޅި ޖެހި ތަން ފެންނަ ސީސީޓީވީ ވީޑިއޯ ފުޓޭޖެއް ވެސް އިއްޔެ ސޯޝަލް މިޑިއާގައި ވަނީ ދައުރުވެފަ އެވެ.

ގެއެއްގެ ބޭރުގައި ހަރުކޮށްފައި ހުރި ކެމެރާއަކުން ނަގާފައިވާ އެ ވިޑީއޯއިން ފެންނަ ގޮތުގައި ދެ މީހުން ވާހަކަދައްކަން ތިބެފައި ކުއްލިއަކަށް އަހްމަދު ރަޝީދަށް ދިގު ވަޅިއަކުން ހަމަލާ ދެ އެވެ. ފުރަތަމަ ހަމަލާ ދިނީ ފަސް ވަރަކަށް ފަހަރު އެވެ. އަދި ދުރަށް ދިއުމަށް ފަހު، ދެ ވަނަ ފަހަރަށް އެނބުރި ގޮސް، އަނެއްކާ ވެސް ފަސް ވަރަކަށް ފަހަރު ވަޅި ހަރާ ތަން ފެނެ އެވެ.

އިތުރަށް ކިޔާލަން -