ރާއްޖެ އާއި އަފްގާނިސްތާން ދައްކައިދޭ ފުޓްބޯޅައިގެ ތަސްވީރު

މީގެ 20 އަހަރު ކުރިން، 7 ޑިސެމްބަރު 2005ގައި، އަޅުގަނޑު އިނީ ޕާކިސްތާނުގެ ކަރާޗީގެ ޕީޕަލްސް ފުޓްބޯލް ސްޓޭޑިއަމްގަ އެވެ. އެ ދަނޑަށް ކުޅެން ނުކުތީ ރާއްޖެ އާއި އަފްގާނިސްތާނެވެ. އެއީ އަފްގާނިސްތާން ސާފް ޗެމްޕިއަންޝިޕްގައި ވާދަކުރި ދެވަނަ ފަހަރެވެ. ރާއްޖެއަކީ ސާފްގެ ގަދަ ބާރެކެވެ.

އެތެރޭގެ ހަނގުރާމައާ ހެދި އަފްގާނިސްތާނުގައި ކުޅިވަރު އޮތީ ގާތްގަނޑަކަށް މަރުވެފަ އެވެ. އެކަމަކު އަލުން ބައިނަލްއަގުވާމީ ދަނޑަށް ނުކުމެ ސާފްގެ މެމްބަރަކަށް ހަދައި، ސައުތު އޭޝިއާގެ އެންމެ ބޮޑު ފުޓްބޯޅަ މުބާރާތުން ޖާގަ ދިނުމަކީ އަފްގާންގެ ފުޓްބޯޅައަށް ލިބުނު ދިރުމެވެ.

އެ މެޗުގެ ނަތީޖާއަކީ ރާއްޖެ އަތުން 9-1 އިން ބަލިވުމެވެ. ލަދުވެތި ބައްޔެކެވެ.

އެކަމަކު ރޭ ރާއްޖޭގެ އަމިއްލަ ފަސްގަނޑުގައި އަފްގާނިސްތާން އެ ފޭބީ 1-0 އިން ރާއްޖެ ބަލިކޮށްފަ އެވެ. 

ދެ ގައުމުގެ ފުޓްބޯޅައިގެ މި ތަސްވީރު އިތުރަށް ފުރިހަމަކޮށްލަމާ ހިނގާށެވެ.

މެޗުގެ ކުރިން ދެ ޓީމުގެ ކުޅުންތެރިންނާ ސަލާންކުރައްވަމުން ގެންދެވި އެފްއޭއެމްގެ މިހާރުގެ ރައީސް އަހުމަދު ތޯރިގު (ޓޮމް)އަކީ އެ ދުވަހު އަފްގާނިސްތާން ކޮޅަށް ތިން ލަނޑު ޖަހައި ހެޓްރިކް ހެދި ރާއްޖޭގެ ފޯވަޑެވެ.

ރޭ ބައިނަލްއަގުވާމީ 100 ވަނަ މެޗު ހަމަކޮށް، ފީފާގެ ސެންޗަރީ ކްލަބުން ޖާގަ ހޯދި، މިހާތަނަށް ރާއްޖެ ދުށް އެންމެ މޮޅު ފުޓްބޯޅަ ކުޅުންތެރިޔާ، އަލީ އަޝްފާގު (ދަގަނޑޭ) އެ މެޗުގައި ދެ ލަނޑު ޖެއްސެވެ.

ދިވެހި ފުޓްބޯޅައިގެ އުދަރެސް އަލިކޮށްދީ، ދިވެހިންގެ އުފާވެރިކަން ބޮޑުކޮށްދިން އަޝްފާގު 100 ވަނަ މެޗު ހަމަކުރީ ފަހު 10 މިނިޓްގައި ލިބުނު ފުރުސަތުގަ އެވެ. އެކަމަކު މިއަދު 40 އަހަރުގެ ފޯވަޑަކީ، ކުރީގެ ހަލުއި، ވަރުގަދަ ހުނަރުވެރިޔާއެއް ނޫނެވެ. އެއަށް ވުރެ ކުޅުން ލަސްވެފައި އުމުރާ އެކު ބަރުހެލިކަން ވަނީ ބޮޑުވެފަ އެވެ.

އަފްގާނިސްތާންގެ ވަރުގަދަ ދިފާއީ ކުޅުންތެރިން ކައިރީގައި ކުރީގެ ޖާދޫ ދައްކާލެވޭ ވަރެއް ނުވި އެވެ.

ރާއްޖެ އަތުން 9-1އިން ބަލިވި މެޗަށް ފަހު، ސާފް ޗެމްޕިއަންޝިޕްގައި އަފްގާނިސްތާން އައީ ފަހަރަކަށް ވުރެ ފަހަރެއް ރަނގަޅުކޮށް، ޓީމު ވަރުގަދަކުރަމުންނެވެ. ފުރަތަމަ ދެ މުބާރާތަށް ދިޔައީ އަފްގާނިސްތާންގެ ތެރެއިން ހޮވާލި ކުޅުންތެރިންތަކަކާ އެކުގަ އެވެ. ފަހުން އަފްގާނިސްތާން ޓީމު ބިނާވަނީ ގައުމުން ބޭރުގައި ކުޅެމުން އަންނަ ކުޅުންތެރިންގެ މައްޗަށެވެ.

މިއަދު ހުރިހާ ކުޅުންތެރިން ކަހަލަ ގޮތަކަށް ދިރިއުޅެނީ އަދި ކުޅެނީ ވެސް ގައުމުން ބޭރުގަ އެވެ.

2005، ކަރާޗީ، ޕާކިސްތާން

2009، ޑާކާ، ބަންގްލަދޭޝް

2013، ކަތަމަންޑޫ، ނޭޕާލް

2015، ޓްރިވަންޑްރަމް

މިއަދު އަފްގާނިސްތާނަކީ ސެންޓްރަލް އޭޝިއަން ފުޓްބޯލް ފެޑެރޭޝަންގެ މެމްބަރެކެވެ. އެހެންކަމުން ސާފް ޗެމްޕިއަންޝިޕްގައި އަފްގާން މިހާރު ވާދައެއްނުކުރާނެ އެވެ. އެކަމަކު ރާއްޖޭގެ ހާއްސަ ދައުވަތަކަށް އައިސް އެ ކުޅެނީ އެ ގައުމުގެ ސީނިއަ ފުޓްބޯޅަ ޓީމެވެ.

ރޭގެ މެޗުގެ 80 ވަނަ މިނިޓްގައި ރޯމަން ފާޒީ ޖެހި ހަމައެކަނި ލަނޑުން މޮޅުވި އިރު އެއީ ރާއްޖެއަށް ވުރެ ވަރުގަދަ ޓީމެއްކަން އެނގެ އެވެ. އެކަމަކު ދެވަނަ ހާފުގައި ދިވެހި ޓީމުން މެޗު ކޮންޓްރޯލްކޮށް، ވަރަށް ގިނަ ހަމަލާތައް ދިން ވެސް މެ އެވެ.

މެޗުގެ 58 ވަނަ މިނިޓްގައި ކުޅެން ނުކުތް ފާޒީގެ ލަނޑު އައީ، ދިވެހި ދިފާއީ ކުޅުންތެރިންނަށް މުޅި މެޗުގައި ވެސް ރަނގަޅަށް މާކްނުކުރެވުނު ހަމައެކަނި ސިކުންތުކޮޅުގައި، ގޯލުގެ ހަމަ ކުރިމަތީ ހުހަށް ހުރެ ފޮނުވާލި ބޯޅައިންނެވެ.

އަފްގާނިސްތާނާއި ރާއްޖޭގެ ވާދަކުރުންތަކުން ފެންނަ ފުޓްބޯޅައިގެ ތަފާތު މައިގަނޑު ގޮތެއްގައި ބިނާވަނީ ބޭރުގައި އުޅޭ ކުޅުންތެރިންނަށެވެ. 

އެކަމަކު ދިވެހިން ނާއުއްމީދު ވާ ހިސާބަކަށް ނުދެ އެވެ. ދިވެހި ކުޅުންތެރިން އަމިއްލަ ގައުމުގައި ކުޅެ ހޯދާ ތަޖުރިބާތަކާ އެކު މި ސަރަހައްދުގައި ވާދަކުރެވެނީ ދިވެހިންގެ ހުނަރު ތަފާތުކަމުންނެވެ.

ރެއަކީ ދިވެހި ސަޕޯޓަރުންގެ ގަދަ އަޑު އިވެންވީ ރެއެއް ވެސް މެ އެވެ. އެ ފޯރިދިނުން އޮތް ނަމަ މެޗުގެ ނަތީޖާ ތަފާތުވުން އެކަށީގެންވެ އެވެ. ޔަގީންކަމާ އެކު ބުނެވޭނީ ދަނޑުން ނުކުމެގެން ދާނީ ރަނގަޅު ފުޓްބޯޅަ މެޗެއް ބަލައިލެވުނުކަމުގެ ހިތްހަމަޖެހުމާ އެކުގައި ކަމަށެވެ.

މުބާރާތުގެ ފައިނަލަށް ދާނީ އެންމެ ގިނަ ޕޮއިންޓް ހޯދާ ދެ ޓީމެވެ.