އިބާދުﷲއަށް ބޮޑު ޝަރަފެއް: އޮލިމްޕިކްސްއަށް ނަގައިފި

މީގެ ދޮޅު އަހަރު ކުރިން ހުޅުމާލޭ ޓްރެކް ދަނޑުގައި އިނދެ އިބާދުﷲ އާދަމް ބުނީ މިހެންނެވެ:

ބޭނުންވަނީ "އޮލިމްޕިކްސްއަށް ކޮލިފައިވާ ފުރަތަމަ ފިރިހެން އެތުލީޓަށް ވާން."

އޭނާ އެހެން ބުނީ ދެ އަހަރު ދުވަހުގެ ކުޅިވަރު ސްކޮލޮޝިޕެއްގައި ޖެމެއިކާއަށް ފުރުމުގެ ކުރިން 'ދައުރު'އަށް ދިން އިންޓަވިއުއެއްގަ އެވެ.

އޮލިމްޕިކްސްއަށް ސީދާ ކޮލިފައިވެވޭ ވަރަށް 22 އަހަރުގެ މި ދުވުންތެރިޔާއަށް އަދި ނުދުވެވެ އެވެ. އިއްޔެ ޖެމެއިކާގައި އޮތް 100 މީޓަރުގެ ރޭހުގައި އޭނާގެ ވަގުތަކީ 10:50 ސިކުންތެވެ. އޮލިމްޕިކްސްއަށް ސީދާ ކޮލިފައިވާން ބޭނުން ނަމަ 10 ސިކުންތަށް ވުރެ އަވަސް ވާން ޖެހެ އެވެ. ނަމަވެސް މިއީ ޖުލައި މަހު ފްރާންސްގައި އޮންނަ ޕެރިސް އޮލިމްޕިކްސްގައި ރާއްޖެއަށް އެތުލެޓިކްސްއިން ލިބުނު ހަމައެކަނި ފުރުސަތު އޭނާއަށް ކަށަވަރުކޮށްދިން ވަގުތެކެވެ.

އެތުލެޓިކްސް އެސޯސިއޭޝަނުން މިއަދު އިއުލާންކުރި ގޮތުގައި އޮލިމްޕިކްސްގެ އެތުލެޓިކްސްގައި މިފަހަރު ރާއްޖެ ތަމްސީލްކުރާނީ، ގދ. ތިނަދުއަށް އުފަން އިބާދުﷲ އެވެ. މިއީ މިދިއަ ދެ އޮލިމްޕިކްސްގައި ރާއްޖެ ތަމްސީލުކުރި އަދި މިހާތަނަށް ރާއްޖޭގައި އުފެދުނު އެންމެ ބާރު ދުވުންތެރިޔާ ހަސަން ސާއިދަށް މި ފަހުން ދުވެވުނު ވަގުތަށް ވުރެ ބާރު ވަގުތެކެވެ. 

ދިވެހި ސަރުކާރުގެ ސްކޮލޮޝިޕެއްގައި އިބާދުﷲ ޖެމެއިކާގައި ތަމްރީން ހަދަމުން އަންނަ އިރު އޭނާގެ އަޒުމަކަށް ވެފައި އޮތީ ރާއްޖޭގެ އެންމެ ބާރު ދުވުންތެރިޔާއަށް ވާށެވެ. އެކަމަކު ސާއިދުގެ އަތުގައި އޮތް 10:33 ސިކުންތުގެ ގައުމީ ރެކޯޑް މުގުރާލެވޭ ހިސާބަކަށް އަދި ނުދެ އެވެ.

ކުރިން އޮލިމްޕިކްސްގައި ކޮންމެ ގައުމަކަށް އަންހެން އަދި ފިރިހެން އެތުލީޓަކަށް ފުރުސަތު ލިބެ އެވެ. އެކަމަކު 2012ގެ ލަންޑަން އޮލިމްޕިކްސްއިން ފެށިގެން މިހާރު ދެނީ، ކޮލިފައިނުވާ ގައުމުތަކަށް އެންމެ ޖާގައެކެވެ. ނަތީޖާއަކީ އިއްޔެ ޖެމެއިކާގައި 11:87 ސިކުންތުން ދުވެ، ފުރަތަމަ ފަހަރަށް 100 މީޓަރު 12 ސިކުންތަށް ވުރެ އަވަހަށް ނިންމި ދިވެހި އަންހެން ދުވުންތެރިޔާގެ މަގާމު ހޯދި މަރިޔަމް ރޫޔާ އަލީއަށް ވެސް ފުރުސަތު ނުލިބުމެވެ.