ޔާމީނާއި އަދީބާ ދެެމެދު އޮތް 5 މިލިއަން ޑޮލަރުގެ 'ރުޅިވެރިކަން'

ކުރީގެ ރައީސް އަބްދުﷲ ޔާމީން އާއި ކުރީގެ ނައިބު ރައީސް އަހުމަދު އަދީބުގެ ދެމެދު އޮތް އެތައް ރުޅިވެރިކަމެއްގެ ތެރެއިން ވެސް ރައްޔިތުންނަށް އެންމެ ގިނައިން އިވޭނެ އެއް އަޑަކީ ސިޔާސީ ކަންކަމަށް ހޭދަކުރަން ބޭރުގެ ކޮންމެވެސް ފަރާތަކުން ދިން 5 މިލިއަން ޑޮލަރެއްގެ ވާހަކަ އެވެ. އެ ފަސް މިލިއަން ޑޮލަރުގައި އެ ދެ ބޭފުޅުން އެ ތިއްބަވަނީ، 'ބައްދަބައްދަ' އެވެ. ޔާމީން ވިދާޅުވަނީ އެއީ ސީދާ އެމަނިކުފާނުގެ ސިޔާސީ ކަންކަމަށް ލިބިވަޑައިގެންނެވި ފައިސާ ކަމަށެވެ. ނަމަވެސް އަދީބު އެ ހިފަހައްޓަވައިގެން އުޅުއްވަނީ އެވެ.

ދިވެހި ރައްޔިތެއްގެ ހައިސިއްޔަތުން އަޅުގަނޑުގެ އަމިއްލަ ޝުއޫރު ފާޅުކުރާ ނަމަ ބުނެވޭނީ އެއީ ލަދުވެތި ވާހަކައެއް ކަމަށެވެ. ނަމަވެސް އެ ފައިސާ ހޯއްދެވި ބޭފުޅުންގެ ފަރާތްޕުޅުން އެފަދަ ލަދުވެތިކަމެއް ނުފެނެ އެވެ. ޔާމީން އަބަދުމެ ވިދާޅުވަނީ އެއީ "އަޅުގަނޑުގެ ސިޔާސީ މަސައްކަތަށް" ބޭރު ފަރާތަކުން ދެއްވި އެއްޗެއް ކަމަށެވެ. އެ ފައިސާއާ އަދީބު ހަވާލުވެވަޑައިގަންނަވަނީ އެއާޕޯޓުން ކަމެވެ. ސީދާ ނަގުދު ފައިސާ އެވެ. އަދީބު އެއަށް ހެއްދެވި ގޮތެއް ހެއްދެވީ އެވެ.

'އަދަދު' ނޫހުގެ އެޑިޓަރު ހުސެއިން ފިޔާޒު މޫސާއަށް މިދިއަ ހަފުތާގައި ޔާމީން ދެއްވި އިންޓަވިއުގެ ބައެއް ވެސް ދިޔައީ އެ 5 މިލިއަން ޑޮލަރުގެ ތެރޭގަ އެވެ. އެ ވާހަކާގައި އެމަނިކުފާނު ބެދުނެވެ. ރައީސުލްޖުމްހޫރިއްޔާގެ މަގާމުގައި ހުންނަވާ ބޭފުޅަކަށް އެފަދަ އެހީއެއް ގަބޫލުކުރެއްވިދާނެތޯ ކުރާ ސުވާލަށް ޔަމީން ދެއްވާ ޖަވާބު އެހާމެ 'ކަޑަ' އެވެ.

"އެއީ ބޭރުން އަޅުގަނޑަށް އެހީތެރިވާ އެކި ފަރާތްތަކުން ދީފައި ހުރި ފައިސާ،" ޔާމީންގެ އެކައުންޓްގައި ކިހާ ފައިސާއެއް ހުންނާނެތޯ ދެންނެވި ސުވާލުގެ ޖަވާބެއްގެ ގޮތުން ވިދާޅުވި އެވެ.

އެހާ ބޮޑެތި އަދަދުތަކުން މާލީ އެހީތެރިކަން ދޭނީ އެ ދޭ ބައެއްގެ ވެސް ކޮންމެވެސް މަސްލަހަތެއް އޮންނާނެތީ ކަމަށް، އާންމުކޮށް ގަބޫލުކުރާކުރުމަށް ރައްދެއްގެ ގޮތުގައި ވިދާޅުވީ "އެއީ ރާއްޖޭގެ އެހެން ކަމަކަށް [ނުވަތަ]، އެއްވެސް ގޮޮތަކަށް މިތަނުގައި އިންވެސްޓްކޮށްގެން އުޅޭ ބައެއް ނޫން" ކަމަށެވެ.

"އަޅުގަނޑަށް ހަމަ ކެމްޕޭނަށް އެހީތެރިވާން ލިބުނު ފައިސާ. އެ ފައިސާ އަދީބު އަތުގައި ވެއްޖެ. ފަސް މިލިއަން ޑޮލަރު،" ޔާމީން ވިދާޅުވި އެވެ.

"އެ ލާރި އެއާޕޯޓަށް ބަލާދިޔައީ އަދީބު. ހަމަ ނަގުދުން ފޮނުވި ލާރި އެއީ. އެ ފައިސާ ނެގީ އަދީބު. ދެން ސައުދީ ޕްރިންސްތޯ އެއީ އެކި ސްޕެކިއުލޭޝަން."

ވެރިކަމުގައި ހުންނެވި އިރު ވެސް އަދި ފަހުން ވެސް އެމަނިކުފާނުގެ ސިޔާސީ ބައިވެރިން ކައިރީގައި އެ 5 މިލިއަން ޑޮލަރުގެ ވާހަކަ އެކި ގޮތްގޮތަށް ޔާމީން ދެއްކެވި އެވެ. ބައެއް ފަހަރަށް އެއީ ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާންގެ އެހީއެއް ކަމަށް ވިދާޅުވި ކަމަށް، އޭރު ޕީޕީއެމްގެ ބައެއް އިސް ބޭފުޅުން ނޫސްވެރިން ކައިރީގައި ބުނެފައި އެބަ ހުއްޓެވެ. އެކަމަކު 'އަދަދު'ގެ އިންޓަވިއުގައި ބޮޑަށް އިސްކަން ދެއްވީ ވަކި ބޭފުޅެއްގެ ނަން ނުގެންނަވައި، އެކަކަށް ވުރެ ގިނަ ބައެއްގެ އެހީއެއް ކަމަށް ދައްކަވާށެވެ. 

ކޮންމެ މީހަކު ދިނަސް ނުވަތަ ކޮންމެ ފަރާތަކުން ދިނަސް ޔާމީން އެ ވިދާޅުވާ 5 މިލިއަން ޑޮލަރަކީ ގާނޫނީ ކުށެކެވެ. ދެ ގާނޫނަކުން މަނާކުރާ އަމަލެކެވެ.

ސިޔާސީ ޕާޓީތަކާ ބެހޭ ގާނޫނުގައި 'ސިޔާސީ ޕާޓީއަކުން ކޮށްގެން ނުވާނެ ކަންތައްތައް' ބަޔާންކުރާ މާއްދާގެ ނުވައެއްގައި އޮތީ މިހެންނެވެ:

އިންތިހާބުތަކާ ބެހޭ އާންމު ގާނޫނުގައި ވެސް، ބޭރު ފަރާތްތަކުން މާލީ އެހީތެރިކަން ހޯދުން މަނާކުރެ އެވެ. އެގޮތުން އެ ގާނޫނުގެ 70 ވަނަ މާއްދާ ހާއްސަކޮށްފައި ވަނީ 'ބައެއް ފަރާތްތަކުން ދޭ އެހީ ގަބޫލުނުކުރުން' މި ބަޔަށެވެ. އެ މާއްދާގެ ހ. ށ އަދި ނ. ބިނާކުރީ ބިދޭސީންނަށެވެ. އެގޮތުން:

ޕާޓީތަކުން ސިޔާސީ ހަރަކާތްތައް ހިންގަނީ އިންތިހާބުތަކަށް ނުކުންނާށާއި އެ އިންތިހާބުތައް ކާމިޔާބުކުރާށެވެ. އެހެންކަމުން ތިމަންނަގެ ސިޔާސީ ކަންކަމަށް އެހީވާން ވިޔަސް ބިދޭސީއެއްގެ ފަރާތުން މާލީ މަންފާއެއް ލިބިގަނެގެންނުވާ އެވެ. އެގޮތަށް އެހީތެރިވާނީ އެ އެހީއެއް ދޭ ބައެއްގެ ވެސް މަސްލަހަތުތަކެއް ހިމާޔަތްކުރާށެވެ. އެހެންކަމުން ބޭރުގެ އެއްވެސް ފަރާތަކުން ދޭ މާލީ އެހީއެއްގައި ރާއްޖޭގެ ރައީސުލްޖުމްހޫރިއްޔާ ހިއްޕެވުމަކީ ވަރަށް ބޮޑު މައްސަލައެކެވެ. ރައްޔިތުން އެނޫން ގޮތަކަށް ނުބުނާނެ އެވެ.

ޔާމީން އެ ވިދާޅުވާ 5 މިލިއަން ޑޮލަރު ރާއްޖެ ގެނައީ ވައިގެ މަގުންނެވެ. އަމިއްލަ ޖެޓެއްގަ އެވެ. އޭރު އަދީބަކީ ޔާމީންގެ އެންމެ އަރިސް ބޭފުޅެވެ. އެންމެ އިތުބާރުކުރައްވާ އެހީތެރިޔާ އެވެ. އެންމެ ބާރުގަދަ ވަޒީރެވެ. ދެ ބޭފުޅުންގެ ދެމެދު ހިންގާފައި ހުރި މާލީ މުއާމަލާތްތަކުގެ ހަގީގަތް އެ ދެ ބޭފުޅުން ނޫން ބަޔަކަށް ނުވެސް އެނގޭނެ އެވެ.

ހުރިހާ ގުޅުމަކާއި އިތުބާރުގެ ވާފަށް ކެނޑުނީ 'ފިނިފެންމާ' ލޯންޗުކޮޅުގައި އެއްޗެއް ގޮއްވާލި ހިސާބުންނެވެ. ދެން ޔާމީން އަވަސްވެވަޑައިގަތީ އަދީބު އަތުގައި ހުރި އެމަނިކުފާނަށް 'ލިބިވަޑައިގަންނަވަން ޖެހޭ' ފައިސާ ހޯއްދެވުމަށެވެ. ފަސް މިލިއަން ޑޮލަރުގެ ވާހަކަ އެއްސެވުމުން އަދީބު ދެއްވި ޖަވާބަކީ، ޔާމީން ވިދާޅުވި ގޮތުގައި، "އެ ހުންނާނީ އިންވެސްޓްކޮށްފައޭ" އެވެ.

"ތިމަންނައަށް ދުވަސްކޮޅެއް ނަގާނޭ [އެ ހޯދަން]. [އެހެން] ކިޔާފައި ދުވަސްކޮޅެއް ކޮށްލާފައި އެއް މިލިއަން ޑޮލަރުގެ ޗެކް އަޅުގަނޑުގެ އެކައުންޓަށް [ޖަމާކުރީ]،" ޔާމީން ވިދާޅުވި އެވެ.

އެއީ މަނީ ލޯންޑަރިންގެ ކުށުގައި އެންމެ ފުރަތަމަ ޔާމީން ޖަލަށް ލި ގއ. ވޮޑަމުލާއާ ގުޅޭ ޗެކެކެވެ. އެ ކުށް ސާބިތުނުވާކަމަށް ސުޕްރީމް ކޯޓުން ނިންމުމުން އެމަނިކުފާނު ވަނީ މިނިވަންވެފަ އެވެ.

ޔާމީން އެ ވިދާޅުވާ 5 މިލިއަން ޑޮލަރަކީ ސިޔާސީ ފަރާތްތަކުން ގަބޫލުކޮށްގެންވާނެ އެއްޗެއް ނޫންކަން ގާނޫނުތަކުން ރަނގަޅަށް އެނގެ އެވެ. މައްސަލައަކީ ރާއްޖޭގައި ހިޔާނާތް ބޮޑުވެ، އާންމުވެ، މިހާރު އެފަދަ ވާހަކަ ދެއްކުން ވެސް ލަދުވެތިކަމަކަށް ނުވުމެވެ. އާންމުން ރައްޔިތުން މާ ބޮޑަކަށް އަޅައެއް ނުލަ އެވެ. އެކަން ސިޔާސީ ލީޑަރުންނަށް އެނގިވަޑައިގަނެ އެވެ.

ޔާމީންގެ ތަފާތަކީ އެކައުންޓްގައި ހުރި ފައިސާގެ ވާހަކަ ދައްކަވާ ކަމެވެ. އެހެންވެ އަބަދުވެސް 5 މިލިއަން ޑޮލަރާ ބެހޭ 'އޮޅުންފިލުވައިދިނުން' އަންނާނެ އެވެ. އެއީ އެއްގޮތަކުން ބަލާ ނަމަ ޔާމީނާއި އަދީބާ ދެމެދު އަބަދުވެސް އޮންނާނެ ރުޅިވެރިކަމެކެވެ.