ޑީއާރުޕީގެ ލޭގައި ހުންނާނީ ހައްގުތައް ހަނިކުރުމުގެ ވިސްނުން

އިއްޔެ އަޅުގަނޑަށް މި ސަރުކާރުގެ ސިޔާސީ ބޭފުޅަކު ގުޅުއްވި އެވެ. ބޭނުމަކީ ޕީއެންސީގެ ރައްޔިތުންގެ މަޖިލީހުގެ މެމްބަރުން ފިއްލަވައިގެން ތިއްބަވާ، 'އަމިއްލަ' ކެންޑިޑޭޓަކު ލައްވާ އިއްޔެ ހުށައެޅުއްވި މީޑިއާ ކޮމިޝަންގެ ބިލާ މެދު ހިޔާލެއް ހޯއްދެވުމެވެ.

އަޅުގަނޑު ދެންނެވީ މިހެންނެވެ؛

"ޕީޕީއެމްއޭ ކިޔަސް، ޕީއެންސީއޭ ކިޔަސް އަސްލު ތިޔަ ބޭފުޅުންނަކީ ހަމަ ޑީއާރުޕީގެ ލޭ. ޑީއާރުޕީއާ ގުޅިފައި އޮންނާނީ ރައްޔިތުންގެ ހައްގުތައް ހިފެހެއްޓުން. ހުރަސް އެޅުން. އެމްޑީޕީގެ ތަފާތަކީ އަބަދުވެސް ހައްގުތައް ހިމާޔަތްކުރުން. މިހާރު މި ފެންނަން ފެށީ ވެސް އެކަން ނޫންތޯ."

ހަނދާން އެބަ ހުރި ހެއްޔެވެ؟ ރައީސް އޮފީހުގައި އޮތް ނޫސްވެރިންގެ ބައްދަލުވުމެއްގައި ޕީޕީއެމްގެ އެކްޓިވިސްޓް ނޫސްވެރިޔަކު އޭރުގެ ރައީސް އިބްރާހިމް މުހައްމަދު ސޯލިހަށް އަމާޒުކުރި ސުވާލެވެ. 'ޒިނޭ'ގެ ތުހުމަތު އަޅުވަމުން ކުރި އެ ސުވާލަށް ވުރެ ހުތުރު ވާހަކައެއް އެކަހަލަ ނޫސްވެރިންގެ ބައްދަލުވުމެއްގައި އަޑުއިވިފައެއް ނޯންނާނެ އެވެ. އެކަަމަކު އެ ދުވަހު ޕީޕީއެމް/ޕީއެންސީގެ އެންމެ މަތީ ލީޑަޝިޕުން ފެށިގެން އެންމެ އާދައިގެ މެމްބަރުން ވެސް ޖެހީ އަތެވެ. ކުރީ ތާއީދެވެ. ނޫސްވެރިޔާގެ 'ހިތްވަރުގަދަކަމު'ގެ މައްޗަށް ތައުރީފް ވެސް އޮއްސާލި އެވެ.

އެ ސުވާލަށް ސޯލިހު ޖަވާބު ވެސް ދެއްވި އެވެ. ނޫސްވެރިންގެ ބައްދަލުވުމަށް ފަހު އެ ނޫސްވެރިޔާއާ ވާހަކަފުޅު ވެސް ދެއްކެވި އެވެ. އެމްޑީޕީގެ ސުޕަ މެޖޯރިޓީ އޮތް ރައްޔިތުންގެ މަޖިލީހުން ނޫސްވެރިކަމުގެ މިނިވަންކަމަށް ހުރަހެއް ވެސް ނާޅަ އެވެ.

ހިތާ ދެކޮޅަށް ނަމަވެސް ގަބޫލުކުރާށެވެ. އެއީ އެމްޑީޕީގެ ތަފާތެވެ. އެ ޕާޓީއަށް ކުރިމަތިވާ ފާޑުކިއުންތަކާއި ޕާޓީގެ ސިޔާސީ އިސް ވެރިންނަށް ކުރާ އެކި ކަހަލަ ތުހުމަތުތަކާ ހެދި 'ދެން ހަދާނެ ގޮތް ނޭނގިގެން ތެޅިފޮޅޭ ތަނެއް' ނުފެނެ އެވެ.

އެކަމަކު އަދިވެސް ދެމިގެންދާ ޑީއާރުޕީގެ ސިޔާސީ ލޭގައި ފެންނާނީ ރައްޔިތުންނަށް ލިބޭ މިނިވަންކަމުގެ ހައްގު ހަނިކުރުމުގެ ވިސްނުންތަކެވެ. ކުރީގެ ރައީސް އަބްދުﷲ ޔާމީންގެ ވެރިކަމުގައި ރާއްޖެ ޓީވީ 2 މިލިއަން ރުފިޔާއިން ޖޫރިމަނާކުރި ގޮޮތަކީ، އޭރުގެ ޕީޕީއެމުން ފަށަން އުޅުނު ނޫސްވެރިކަމުގެ މިނިވަންކަން ހިފެހެއްޓުމުގެ އަމަލީ މަސައްކަތުގެ ނާކާމިޔާބު ސަފުހާއެކެވެ. ބައެއް ނޫސްތަކާ ދެކޮޅަށް އޭރުގެ މީޑިއާ ކައުންސިލަށް ރައީސް އޮފީހުން ފޮނުވި ޝަކުވާތައް، އެއް ދުވަހަކު އޮފީހަށް ދިޔައިރު ހުރީ އަޅުގަނޑުގެ މޭޒު މަތީގަ އެވެ. ކައުންސިލުން ފޮނުވި އެ ސަފުހާތައް އެއްކޮށްލުމުން އުސްމިން ފޫޓެއްހާވަރުވެ އެވެ.

މިހާރު ހުށައަޅާފައި އޮތް ބިލު ފަދަ އެއްޗެއް މިއަދު ނޫނީ މާދަމާ އަންނާނެކަން ކުރިން ވެސް އެނގެ އެވެ. އޭގެ ދެ ފޮޅުވަތް ދޭތެރޭގައި ޑީއާރުޕީގެ އަސްލު ވިސްނުމަށް ފެތޭ ބައިތައް ހުންނާނެކަން ވެސް ގައިމެވެ.

މިހާރު އެ ބިލު އެ އޮތީ އެހެންނެވެ. މިސާލަކަށް 'ގައުމުގެ ސަލާމަތާއި ރައްކާތެރިކަން ދެމެހެއްޓުން'، ނުވަތަ 'ގާނޫނީ ވެރިކަން ދެމެހެއްޓުމުގެ އަސާސްތައް ކުރިއެރުވުން' ފަދަ މާއްދާތައް ލާފައި އެ ހުރީ އެ ބޭނުމުގަ އެވެ. މިއީ މިހާރުގެ ޒުވާނުން ބުނާ ކަހަލަ 'މުސްކުޅި ވިސްނުމު'ގެ އަސަރުތަކެވެ.

އޭގެ ނަތީޖާއަކަށް ވާނީ ކޮން ކަމެއް ހެއްޔެވެ؟ މިސާލަކަށް ރާއްޖޭގައި އަދިވެސް އިންޑިއާ ސިފައިން އެބަ ތިއްބޭ ކިޔާފައި މީހަކު ނޫހެއްގައި ލިއުނު އެއްޗެއް ނުވަތަ ޓީވީ/ރޭޑިއޯއެއްގައި ވާހަކަ ދައްކަމުން އެފަދަ އެއްޗެއް ބުނުމުން އެއަށް ނިސްބަތްކޮށް އެ މީޑިއާއެއް ބަންދުކުރުމުގެ ފުރުސަތު ސަލާމަތީ ބާރުތަކަށް ލިބެ އެވެ.

މިސާލަކަށް އާސަންދައަށް ގެންނަ ބަދަލަކާ މެދު ހިތްހަމަނުޖެހިގެން މީޑިއާއެއްގައި އެ ވާހަކަ ގެނެސްދިނީ އެވެ. ސަރުކާރުން ބޭނުންވީ އެ މީޑިއާއެއްގެ 'އުނދަގުލުން' ސަލާމަތްވާނެ ގޮތެކެވެ. ރައީސް އައްޔަންކުރައްވާ މެމްބަރުންގެ އަގުލަބިއްޔަތު އޮންނަ ކޮމިޝަނުން އަވަހަށް އެކަން މާނަކުރަންވީ އެއީ 'ގާނޫނީ ވެރިކަން ދެމެހެއްޓުމުގެ އަސާސްތަކާ ހިލާފު، ރައްޔިތުންގެ މެދުގައި ފިތުނަ އުފެދޭ އެއްޗެއް'ގެ ގޮތަށެވެ.

މީޑިއާއާ މެދު ފިޔަވަޅު އަޅަންވީ އެވެ. ތަން ބަންދު ވެސް ކުރެވިދާނެ އެވެ. ވަގުތީ ގޮތުން ލައިސަންސް ވެސް ހިފެހެއްޓިދާނެ އެވެ. ޖޫރިމަނާ ވެސް ކުރެވިދާނެ އެވެ.

މި ފާހަގަކުރީ، މިހާރު އޮތް ބިލުން ނުކުމެދާނެ މައްސަލަތަކުގެ ވަރަށް އާދައިގެ މިސާލުތަކެކެވެ. އެކަމަކު ބިލްގައި ނޫސްވެރިކަމަށް އޮތް ނުރައްކާތެރިކަން ވަރަށް ފަސޭހައިން މި މިސާލުތަކުން އެނގޭނެ އެވެ.

ބިލް ހުށައެޅުއްވީ ތުޅާދޫ ދާއިރާގެ އަމިއްލަ މެންބަރު އަބްދުﷲ ހަންނާން އަބޫބަކުރެވެ. އެއީ ވިޔަފާރިވެރިއެކެވެ. އޭނާ ވިދާޅުވާ ގޮތުން ނަމަ ބިލްގެ ޑްރާފްޓް ހެއްދެވީ އަމިއްލައަށެވެ. އެކަމަކު އެ ބިލްގެ ޑްރާފްޓް ޕީއެންސީގެ އިސް އެހެން ބޭފުޅަކު ހައްދަވަމުން ގެންދަވާ ކަމާއި ރާއްޖޭގެ ސީނިއަ ބައެއް ނޫސްވެރިން ގާތު އެ ބޭފުޅަކު އެވާހަކަ ވިދާޅުވެފައި އޮތް ކަމަށް ވެސް ވެ އެވެ.

އެ ބިލު ޕީއެންސީގެ މެމްބަރަކު ލައްވާ ހުށަނޭޅުއްވީ އެކަމުން ސަރުކާރު ސަލާމަތްވާންވެގެން ކަމަށް ބެލެވެ އެވެ. އެކަމަކު ސަރުކާރުގެ ސުޕަ މެޖޯރިޓީ އޮންނަ ރައްޔިތުންގެ މަޖިލީހަކުން އެ ބިލް ބަލައިގަނެ، ފާސްކޮށްފި ނަމަ ސަރުކާރާއި ޕީއެންސީގެ މެމްބަރުން އެ ހިނގަނީ، މީގެ ހަތް އަހަރު ކުރިން ޕީޕީއެމް ސަރުކާރާއި އޭރު މެޖޯރިޓީ އޮތް ޕީޕީއެމްގެ ރައްޔިތުންގެ މެމްބަރުން ގެންގުޅުއްވި ވިސްނުމުގެ މަތީގަ އެވެ. ހަމަ ޑީއާރުޕީގެ ލެ އެވެ.

ހަންނާނު ވިދާޅުވާ ގޮތުން ނަމަ ގައުމު 'ފަސާދަވެގެން މި ދަނީ ދޮގުތައް ގިނަވެ، މަކަރު ހެދުން ގިނަވެގެން'ނެވެ. 

"ކޮންމެވެސް ބަޔަކު މިކަންކަން ރަނގަޅު ކުރަން ޖެހޭ. ކޮންމެ މީހަކު ވެސް ޒިންމާދާރު މީހަކަށް ވާން ޖެހޭ،" ބިލްގެ ދިފާއުގައި ވާހަކަ ދައްކަވަމުން އޭނާ ވިދާޅުވި އެވެ.

އެކަމަކު ޒިންމާދާރުކުރުވާށޭ ކިޔާފައި މިނިވަންކަމަށް ހުރަސްއެޅުމާ ދިމާލަށް ދިއުމަކީ ވަރަށް ބޮޑު މައްސަލައެކެވެ. މިހާރު ބިލް އެ އޮތީ ޒިންމާދާރުކުރުވުމުގެ ބަދަލުގައި ހަންނާނާއި ހަންނާނުގެ ވިސްނުން ހުރި އެހެން މެމްބަރުންނާއި ސިޔާސީ މީހުން އެކުވެގެން ރާއްޖޭގެ މީޑިއާގެ މިނިވަންކަން ނަގާލެވޭ ފަދަ ގޮތަކަށެވެ. 

ހަންނާނަށް ވިސްނިވަޑައިނުގަންނަވާ އެކަމަކު ހުޅުވިފައިވާ ޑިމޮކްރަސީއެއްގައި ވަރަށް މުހިންމު ކަމެއް އެބަ އޮތެވެ: ދައުލަތުގެ ޒިންމާތަކާ ހަވާލުވާ މީހުން، އާންމު ރައްޔިތަކާ އެއްހަމަނުކުރުމެވެ. މި ދެންނެވީ ހަންނާނު ރައްޔިތުންގެ މަޖިލީހަށް ވަޑައިގަތުމުން މިހާރު ތިމަންނާއަކީ 'ވިޔަފާރިވެރިޔާ ހަންނާނޭ' ވިދާޅުވެގެން ފަރުޖެއްސޭކަށް ނެތެވެ. ކުރިން ހަންނާނުގެ ވިޔަފާރިއާ މެދު ނުވިސްނާ ގޮތްގޮތަށް މެމްބަރު ހަންނާނުގެ ވިޔަފާރިއާ މެދު ވިސްނުމުގެ ހައްގު ރައްޔިތުންނަށާއި ނޫސްވެރިންނަށް ލިބެ އެވެ. މެމްބަރު ހަންނާނަށް ސަރުކާރު ތެރެއިން ލިބޭ އެކަމަކު އެހެން ވިޔަފާރިވެރިޔަކަށް ހޯދަން އުނދަގޫ ފަސޭހަތައް ލިބޭތޯ އާއި ސަރުކާރުގެ ތެރެއިން ހަންނާނަށް ފަހިވަނީ ވިޔަަފާރީގެ ކޮން ކަހަލަ ފުރުސަތުތަކެއްތޯ ބެލުމުގެ ޒިންމާ މީޑިއާގެ ބޮލުގައި އެޅެ އެވެ.

މެމްބަރު ގާސިމް އިބްރާހިމް އާއި މެމްބަރު އަހުމަދު ސިޔާމް މުހައްމަދު ފަދަ ބޭފުޅުންގެ ކަންކަމާ ވެސް، ދައުލަތުގެ ޒިންމާއަކާ ހަވާލުނުވެ ތިބޭ ވިޔަފާރިވެރިންނާ ހިލާފަށް، ނޫސްވެރިންނާއި އާންމު ރައްޔިތުންނަށް ބެހެވޭނެ އެވެ. އާއެނކެވެ. ޒާތީ ކަންކަމެއް ނޫނެވެ. 

އަޅުގަނޑުމެން ގަބޫލުކުރަމާ ހިނގާށެވެ. އަދިވެސް ރާއްޖޭގައި ދެމިގެން މިދަނީ ސިޔާސީ ދެ ލެ އެވެ. ޑީއާރުޕީގެ ލެ އާއި އެމްޑީޕީގެ ލެ އެވެ. ދިވެހި ރައްޔިތުން ބެހިފައި އޮންނާނީ ވެސް އެ ދެ ލޭގެ މައްޗަށެވެ. އެއް ބަޔަކަށް ގަބޫލުކުރަން އުނދަގޫ ވިޔަސް މީގެ ތެރެއިން ޑީއާރުޕީގެ ސިޔާސީ ލޭގައި ދެމިގެންދާނީ ރައްޔިތުން އޮބިއަޅައިގެން ވެރިކަންކުރުމުގެ ގޮތްގަނޑެވެ. އެކަމަކު ފާހަގަކުރަން ޖެހޭ ތަންކޮޅަކީ އިދިކޮޅުގައި އޮންނަ އިރު ޑީއާރުޕީ/ޕީޕީއެމް/ޕީއެންސީއަށް ލިބުނު އެންމެ ބޮޑު ބާރަކީ ވެސް މިނިވަން ނޫސްވެރިކަމެވެ.

ޔާމީންގެ ހަރުގެ ޖަލްސާތަކުގައި މިނިވަން ނޫސްވެރިކަމުގެ މުހިންމުކަމުގެ ވާހަކަ ދޭތެރެ ދޭތެރެއިން އެމަނިކުފާނު ވެސް އެބަ ދައްކަވަ އެވެ. ތެދެކެވެ. އިދިކޮޅުގައި ހުންނަވާއިރު އެއީ އެންމެ ބޮޑު ބާރެވެ.

މިހާ ހިސާބުން އެމްޑީޕީ ސަރުކާރާ ދެކޮޅަށް ޕީޕީއެމް/ޕީއެންސީގެ މީޑިއާތަކުން ފެތުރި ވާހަކަތަކުގެ މަތިން ކުޑަކޮށް ހަނދާންކޮށްލާށެވެ. މިހާރު އޮތް ބިލް ކަހަލަ ގާނޫނެއް އެދުވަހު އެމްޑީޕީން ހެދި ނަމަ އޭގެ ތެރެއިން އެއްވެސް މީޑިއާއެއް ހިންގާކަށް ފުރުސަތެއް ނުލިބުނީހެވެ. އެކަމަކު މީޑިއާއަކީ ބިރެއް ކަމަކަށް އެމްޑީޕީއަކުން ނުދެކެ އެވެ. އެމްޑީޕީން ދަސްކުރީ މިނިވަން މީޑިއާއާ އެކު ކުރިއަށް ދާށެވެ. ރައްޔިތުންނަށް ހައްގުތައް ހޯދައިދޭން ގުރުބާންވި ބަޔަކު ދެމިތިބޭނީ ވެސް އެގޮތަށް ކަމަށް ގަބޫލުކުރަމާ ހިނގާށެވެ.