އޮރެންޖެ އެލާޓްތައް ގިނަވެއްޖެ؛ މިއައީ ކޮން ބަދަލެއް؟

ހުޅަނގު ފެށި މިދިޔަ ހަފްތާއިން ފެށިގެން، މުޅި ރާއްޖެއަށް މޫސުން ގޯސްވެ ކޮންމެ ދުވަހަކު ވެސް ރާއްޖޭގެ އެކި ހިސާބުތަކަށް މޫސުމާ ބެހޭ ގައުމީ އިދާރާއިން އަންނަނީ ސަމާލުވުމަށް އެލާޓްތައް ނެރެމުންނެވެ. އެކަމަކު އެލާޓްތަކުން މިފަހަރު ފާހަގަވާ ކަމަކީ، އާންމުކޮށް ނުނެރޭ އޮރެންޖް އެލާޓް ނެރޭ މިންވަރު އިތުރުވުމެވެ. 

މާލެ ސަރަހައްދު ހިމެނޭހެން މިއަދު ވެސް މެންދުރު 12 ޖެހުމާ ހަމައަށް ރާއްޖޭގެ ބޮޑު ބައެއް އޮތީ އޮރެންޖް އެލާޓްގަ އެވެ. 

މެޓްގެ ތަފާސްހިސާބުތައް ދައްކާ ގޮތުން މިދިޔަ ހަފްތާގެ ބުދަ ދުވަހުން ފެށިގެން ރާއްޖޭގެ އެކި ހިސާބުތަކަށް ހަތް އޮރެންޖް އެލާޓް ނެރެފައިވެ އެވެ. އޮރެންޖް އެލާޓް ނެރެނީ: 

މޫސުމަށް މިހާރު އައިސްގެން އުޅޭ ބަދަލު ކިޔައިދެއްވަމުން މެޓް އޮފީހުގެ މީޓްރޮލޮޖިސްޓް އަބްދުﷲ ހަފީޒް ވިދާޅުވީ މިއަހަރު އޮރެންޖު އެލާޓް ނެރެން ޖެހޭ ވަރު އިތުރުވެގެން އުޅެނީ އާދަޔާ ހިލާފަށް މޫސުން ގޯސްވުން ނުވަތަ 'އެކްސްޓްރީމް ކޮންޑިޝަންތަައް' މިއަހަރު ގިނަވުމުން ކަމަށެވެ. މިފަދަ ކޮޅިގަނޑުތައް އުފެދެން މެދުވެރިވާ އެއް ސަބަބަކީ މޫސުމަށް އަންނަ ބަދަލުތައް ކަމަށް ވެސް ހަފީޒް ވިދާޅުވި އެވެ. 

"ވޭތުވެދިޔަ އަހަރަކީ އެލްނީނިއޯގެ ސްޓްރޯންގް އަހަރެއް އެ ދިޔައީ، އެލްނީނިއޯގެ ކަންތައްތައް ވަރަށް ބޮޑަށް މަޑުޖެހި ނޯމަލް ކަންޑިޝަނެއް މިހާރު އެދަނީ، އެހެން ނަމަވެސް މިއަންނަނީ ޖުމްލަ ގޮތެއްގައި މޫސުމީ ބަދަލުތައް، އެކްސްޓްރީމް ކަންޑިޝަންތަަކަށް މިދަނީ ބުނާނަމަ މޫސުމީ ބަދަލު އެ އަންނަނީ،" ހަފީޒް ވިދާޅުވި އެވެ.

"ދެން އަޅުގަނޑުމެންނަށް ޑައިރެކްޓްލީ ކިހާވަރަކަށްތޯ ބަދަލު ރާއްޖެއަށް އަންނަނީ ދަންނަވަން ކެރޭނީ ރަނގަޅު ރިސާޗެއް ހަދައިގެން. ކާރިކާރީގައި މި ކަންޑިޝަންތައް އަންނަ ސަބަބަކީ ވެސް މޫސުމީ ބަދަލުތައް."

ހަފީޒް ވިދާޅުވީ އޮރެންޖް އެލާޓް ނެރޭ ވަރަށް މިފަހަރު ހުޅަނގު މޫސުމުގެ ބާރުގަދަވެފައިވަނީ ބޭ އޮފް ބެންގޯލްގައި ވަރުގަދަ ކޮޅިގަނޑެއް އުފެދިފައިވާތީ ކަމަށެވެ. މިހާރު ރާއްޖެއަށް މި ކުރަނީ އެ ކޮޅިގަނޑުގެ އަސަރެވެ. އަދި ކުރިއަށް އޮތް ދެ ދުވަހު އެ ކޮޅިގަނޑު އިތުރަށް ބާރުގަދަވާނެ ކަމަށް ލަފާކުރެވޭ ކަމަށް ހަފީޒް ވިދާޅުވި އެވެ. 

"މެދުރާއްޖެތެރެއާއި އުތުރަށް މި ވިއްސާރަ މިހާގަދަކޮށް މި ކުރަނީ އެ ޕްރެޝަ ސިސްޓަމްގެ އޭގެ އިންޑައިރެކްޓް އެފެކްޓް. އެ އެފެކްޓް ވަރަށް ބޮޑަށް އެބަކުރޭ، ވިންޑް [ވައި] މިވަރަށް ސަސްޓެއިން [މި އަންނަނީ] އެކަމުގެ ސަބަބުން،" ހަފީޒް ވިދާޅުވި އެވެ.

މިދުވަސްވަރު އޮރެންޖް އެލާޓް ނެރޭމިންވަރު ގިނަވެފައިވާ އެއް ސަބަބަކީ ގަދަ ވައި ކަން ހަފީޒް ފާހަގަކުރެއްވި އެވެ.

މިދިޔަ ހަފްތާގައި ރާއްޖޭގެ ދެކުނުގައި ވެސް ސާކިއުލޭޝަނެއް އުފެދި އޭގެ އަސަރު ވަރަށް ބޮޑަށް ކުރި އެވެ. ނަމަވެސް އެ ސާކިއުލޭޝަން މިހާރު ރާއްޖެއާ ދުރުވެފައިވާ ކަމަށް ހަފީޒް ވިދާޅުވި އެވެ.

"އޮރެންޖް އެލާޓްތައް މިހާގިނައިން މި އިޝޫކުރަން ޖެހެނީ ބޯކޮށް ވާރޭ ނުވެހުނަސް ވައި އަންނަވަރު ގަދަވީމާ. އެ އަންނަ ވިލާގަނޑުގައި ފުދޭވަރަކަށް އެބަ ވައިބާރުވޭ،" ހަފީޒް ވިދާޅުވި އެވެ.

ހަފީޒް އިތުރަށް ވިދާޅުވި ގޮތުގައި: 

މިހާރު ނެރޭ އޮރެންޖް އެލާޓްގައި ސަމާލުކަން ދޭންޖެހޭ ކަންކަންކަމުގެ ގޮތުގައި މެޓުންނާއި ޑިޒާސްޓާ މެނޭޖްމަންޓް އޮތޯރިޓީން ފާހަގަ ކުރަނީ ގިނައިރު ވަންދެން ގަދަ ވައިޖެހޭތީ ކަނޑުގެ ބާނިތައް ބޮޑުވެފައިވާތީ ކޮންމެހެން ކުރަންޖެހޭ ދަތުރެއް ނޫނީ ނުކުރުމަށެވެ. މީގެ އިތުރަށް ވެސް ގަސްތަކާއި އެއްޗެހި ވެއްޓިދާނެތީ ސަމާލުވުމާއި ފުރާޅު އެއްލައިލަފާނެތީ އެކަމަށް ސަލާމުވުމަށް ވެސް އިލްތިމާސްކޮށްފައިވެ އެވެ.