ސަލާހުއްދީންގެ މި ބައިތު ވެރިންނަށް: ލިބޭ މިންވަރަކުން ހަރަދުކުރޭ؛ ނޫނީ ވާނީ ބޭޒާރު

'ދައުރު' އެޑިޓާޒް ޓޯކު ޕޮޑްކާސްޓުގެ މިއަދުގެ އެޕިސޯޑު ރެކޯޑް ކުރަމުން ދިޔައިރު މެހެމާނެއްގެ ގޮތުން ބައިވެރިވެވަޑައިގަތް ކުރީގެ އިގްތިސާދީ ވަޒީރު އަދި ރާއްޖެއިން އިންޑިއާއަށް ކަނޑައަޅާފައި ހުންނެވި ސަފީރުކަން ވެސް ކުރެއްވި އަހުމަދު މުހައްމަދު (އަންޑޭ) ދެއްކެވި ވާހަކަތައް އަޑުއަހަމުން ދިޔައިރު ބޮލުގައި ކުޅެމުން ދިޔަ ބައިތުތަކަކީ ހުސެއިން ސަލާހުއްދީންގެ ޅެމެކެވެ.

"ލަދެއް ނެތި އަތް ދިމާކުރުމީ ތިމާގެ އެދުންތަކާ މެދުގައި،

ހިނގާ ގޮސް އަނެކަކުގެ ގާތަށް ކަމެއްތޯ ހުތުރުނުވެދާނޭ

ލިބޭ މިންވަރު ނިކަން ދަނެގެން ވިބޭނުންތައް ބަހާލައިގެން،

ތިބޭނަމައީ ފިކުރުކޮށްގެން މި ބޭޒާރެއް ވެސް ނުވެސް ވާނޭ"

ސަލާހުއްދީންގެ 'އަލް އަދަބު' ޅެމުގައި ލިޔުއްވާފައި އެ ވަނީ މިއަދު ރާއްޖޭގެ ދަރަނީގެ ހާލަތު ގޯސްވެގެން މި އުޅޭ ސަބަބެވެ. ލިބޭ މިންވަރަށް ފަރުވާލެއް ބެހެއްޓުމެއް ނެތި ހަރަދު ބޮޑު ދައުލަތެއް ފައްކާކުރީ އެވެ. އެ ހަރަދުތައް ހަމަޖައްސަން ހޯދުނު ގޮތަކަށް އެކި ގައުމުތަކުން ދަރަންޏަށް ދިވެހި ދައުލަތުން ފައިސާ ނަގަމުން ދިޔައީ އެވެ. 

ސަލާހުއްދީން ވިދާޅުވެފައި އެ ވަނީ އެ ގޮތަށް އުޅެން ދިމާކުރުމުގެ ހުތުރު ކަމެވެ.

އާދައިގެ މިސާލެއް ނަންގަވަމުން އަހުމަދު މުހައްމަދު ވިދާޅުވީ ފަރުދީ ފެންވަރުގައި އަމިއްލަ ދިރިއުޅުމުގެ ހަރަދުތައް ނުވަތަ ގޭތެރޭގެ ހަރަދުތައް ވެސް ހަމަޖައްސަން ވާނީ ލިބޭ އާމްދަނީއަކަށް ބަލައިގެން ކަމަށެވެ. އެހެން ނޫން ނަމަ، ދެން ޖެހޭނީ އެކި ތަންތަނުން ދަރަންޏަށް ފައިސާ ނަގާށެވެ.

"ދެން ބޭންކުން ނެގި އެ ލޯނުތަކަށް ފައިސާ ނުދެއްކިގެން ބޭންކުތައް އޭނާ ފަހަތުން އަންނާނީ. އެންމެ ފަހުން ބޮލާ ފޮށައި އެޅޭ ހިސާބަށް ގޮސްގެން އޭނާ ފަލީހަތަކަށް ދާނީ. މިއީ އަމިއްލަ ފަރުދަކާ ހިސާބުގައި މިކަން ވެދާނޭ ގޮތް. ގައުމަކަށް ވެސް ވާނީ ހަމަ މިހެން. އެއަށް ވުރެ ލާޖު ސްކޭލުުގައި އެކަން ހަމަ ވާނީ،" އަހުމަދު މުހައްމަދު ވިދާޅުވި އެވެ. 

އޭނާ ވިދާޅުވީ ކޮންމެ އަހަރަކު ވެސް ރާއްޖޭގެ ބަޖެޓް އަންނަނީ އެވްރެޖުކޮށް %10 އިން ބޮޑުވަމުން ކަމަށެވެ. އާމްދަނީއަށް 30 ބިލިއަން ރުފިޔާ ލިބޭއިރު ހަރަދު 40 ބިލިއަން ރުފިޔާއަށް އަރަ އެވެ. އެހެންކަމުން ކުރާ ހަރަދުތައް އާމްދަނީއަށް ވުރެ 11-12 ބިލިއަން ރުފިޔާ ކޮންމެ އަހަރަކު ވެސް އެވްރެޖްކޮށް ބޮޑު ކަމަށް އޭނާ ވިދާޅުވި އެވެ.

"ދަރަނި ނެގުން މައްސަލައެކޭ ނޫން އަޅުގަނޑު މި ދަންނަވަނީ. ވަޒީފާ ދިނުމަކީ ވެސް މައްސަލައެކޭ ނޫން މި ބުނަނީ. އެކަމަކު އެ ދަރަނި ނަގައިގެން ކުރަން ޖެހޭނީ އުފެއްދުންތެރި މަސައްކަތޭ އަޅުގަނޑުގެ ޕޮއިންޓަކީ. އެ ނަގާ ފައިސާ ދެއްކޭ ވަރަށް އާމްދަނީ ވެސް އިތުރުވާން ވާން ވާނޭ،" އަހުމަދު މުހައްމަދު ވިދާޅުވި އެވެ.

"އަޅުގަނޑުމެންނަށް މި ފެންނަނީ ދަރަންޏަށް ފައިސާ ނަގައިގެން ވަޒީފާ ދޭތަން. އެކަމަކު ވަޒީފާ އުފެދެން ޖެހޭނީ އިގްތިސާދީ ހަރަކާތުން އެ ލިބޭ އެއްޗަކުން މުސާރަ ދެވޭ ގޮތަށް. ދަރަންޏަށް ނަގާ ގޮތަކަށް ނޫން." 

މިކަހަލަ ކަންކަން އެތައް ސަރުކާރަކުން އެތައް ޒަމާނެއް ވަންދެން ކުރުމުގެ ނަތީޖާއަކީ، އޭނާ ވިދާޅުވި ގޮތުގައި، ދުވަހަކު ވެސް ދަރަނި އަދާކުރުމަށް ހޭދަކުރަން ނުޖެހޭ ވަރަށް ރާއްޖެއިން އަހަރެއްގެ ތެރޭ މި އަހަރުން ފެށިގެން ހަރަދު ކުރަން ޖެހުމެވެ. އޭނާ ވިދާޅުވި ގޮތުގައި، 500 މިލިއަން ޑޮލަރު ރާއްޖެއިން އަހަރަކު ދަރަނި ދައްކަން މިހާރު ހަރަދުކުރަން ޖެހެ އެވެ. ދެން އޮތީ 2026 އެވެ. އެއީ 1 ބިލިއަން ޑޮލަރުގެ ދަރަނި ރާއްޖެއިން ދައްކާ ހަލާސްކުރަން ޖެހޭ އަހަރެވެ. 

"އެންމެ ފަހަރަކު ޑީފޯލްޓް ވާން ޖެހޭނީ، ދެން ސޮވަރިން ޑީފޯލްޓަކަށް އެވީ. އެ ހިސާބުން ދެން އެ ވެއްޓޭ އަނދަވަޅުން އަރައިގަންނަން ކުރަން ޖެހޭ މަސައްކަތް ވަރަށް ބޮޑުވާނެ،" އަހުމަދު މުހައްމަދު ވިދާޅުވި އެވެ.

"ރާއްޖެއިން މިއީ ދުނިޔޭގެ ކޮންފިޑެންސް ހޯދަން ފިޔަވަޅު އަޅަންވީ ވަގުތު އެ ފައިސާ ދެއްކޭނެ ގާބިލްކަން ރާއްޖޭގައި ހުރިކަމުގެ. ކޮންފިޑެންސް ވަރަށް މުހިންމު." 

އެކަން ކުރަން އަޅަން ޖެހޭ ފިޔަވަޅުތައް ވެސް ގިނަ އެވެ. އޭނާ ފާހަގަކުރެއްވި ގޮތުގައި:

އަހުމަދު މުހައްމަދު ވިދާޅުވި ގޮތުން ނަމަ ރާއްޖެއަށް އަދި މުޅިއަކުން ވަގުތު ފާއިތެއް ނުވެ އެވެ. މިއީ ފިޔަވަޅު އެޅުމުގެ ވަގުތެވެ. ކަންކަން އިސްލާހު ކުރުމުގެ ވަގުތެވެ. އެކަން ކުރެވިއްޖެ ނަމަ އަރާ ހަމަކުރަމުން އަންނަ ތޫފާނުން ރާއްޖެއަށް އަދިވެސް ރައްކާތެރިކަން ހޯދި ސަލާމަތުގެ އައްސޭރިއެއްގައި ބަނދަރުކުރެވިދާނެ އެވެ.

ޕޮޑްކާސްޓް ނިންމާލަމުން ހިމަނާފައި އެވާ އަބްދުﷲ ހަސަން (ހޮޅުދޫ އަބްދުﷲ)ގެ ލަވަ؛

"އިސްލާހުވާން އެދޭ ނަމަ ފުރުސަތު ނަގާ ނުލާ، 

މިސްރާބު ރަނގަޅު ސީދާކޮށްލަން އަވަސްވެލާ."

މިއީ އެ ވަގުތެވެ.