ނާޒިމްގެ މާޒީ: 'ދުންފިނި ހަރުގެ' ތަޅާލުން، 7 ފެބްރުއަރީ، ދެން 11 އަހަރަށް ޖަލަށް

އެމްޑީޕީގެ އޭރުގެ މެމްބަރުންގެ ހަނދާނުން 12 އޮގަސްޓް 2005 ފޮހެވިގެންނެއް ނުދާނެ އެވެ.

ކުރީގެ ރައީސް މައުމޫން އަބްދުލްގައްޔޫމްގެ ސަރުކާރާ ދެކޮޅު އެތައް ހާސް ބަޔަކު 2004ގައި ޖުމްހޫރީ މައިދާނަށް އެއްވި އެއްވުން ރޫޅާލުމުގެ ފުރަތަމަ އަހަރީ ދުވަސް ފާހަގަކުރަން މިފަހަރު ނުކުންނެވީ މުހައްމަދު ނަޝީދު (އަންނި) އެވެ. ޖުމްހޫރީ މައިދާންގައި އިށީނދެ އިންނަވަނިކޮށް ނަޝީދު ހައްޔަރުކުރި އެވެ. މާލޭގައި ބޮޑު ހަމަނުޖެހުމެއް ފެށުނެވެ. ކުއްލި ނުރައްކަލުގެ ހާލަތު އިއުލާންކުރި އެވެ. އެ ދުވަހުގެ ރޭ ދަންވަރު ސިފައިން ނުކުމެ އޭރު އެމްޑީޕީގެ މައި ހަރުގެ، 'ދުންފުނި ހަރުގެ' ރޫޅާލީ އެވެ. އެކަން ކުރަން ނެރުނު ސިފައިންގެ ކޮމާންޑަރަކަށް ހުންނެވީ މުހައްމަދު ނާޒިމެވެ.

އެހާ ހިސާބުން އެމްޑީޕީގެ ސަޕޯޓަރުންނަށް، މައުމޫން އާއި މައުމޫން ސަރުކާރުގެ މިނިސްޓަރުންގެ އިތުރުން ސިފައިންގެ ތެރެއިން އާ 'ދުޝްމަނެއް' އުފެދުނީ އެވެ. އެކަމަކު ނާޒިމް ވިދާޅުވާ ގޮތުގައި އެރޭ އޭނާ އަދާކުރެއްވީ އޭނާގެ ޒިންމާ އެވެ. އޭނާއާ ހަވާލުކުރި މަސައްކަތެވެ.

ރިޔާސީ އިންތިހާބު ކާމިޔާބުކޮށް 2008ގައި ރާއްޖޭގެ ވެރިކަމާ އެމްޑީޕީން ހަވާލުވުމާ އެކު، ސިފައިންގެއިން ވަކިކުރަން ބޭނުންވި މީހުންގެ ތެރޭގައި ނާޒިމް ހިމެނެ އެވެ. އެކަން އެމަގުން އެމްޑީޕީގެ ސަރުކާރުން ކުރި ވެސް މެ އެވެ. ހައްގު ހޯއްދަވަން އޭނާ ވަޑައިގަތީ ކޯޓަށެވެ.

"ކޯޓުން ވަކި ގޮތެއް ނިންމުމުގެ ކުރިން ސަރުކާރުން ވަނީ ކޯޓުން ބޭރުގައި ވާހަކަ ދައްކައިގެން މައްސަލަ ހައްލުކޮށް، ނާޒިމް ސިފައިންގޭގައި ހުންނެވި މަގާމާ އެކު ރުޖޫއަކޮށްފަ އެވެ. ފަހުން އޭނާ ރިޓަޔަކުރެއްވީ ހިދުމަތުގައި ދެމިހުންނެވި ބޭފުޅެއްގެ ގޮތުގަ އެވެ،" ރައީސް ނަޝީދު އިސްތިއުފާ ދެއްވި 7 ފެބްރުއަރީ ހާދިސާއާ ބެހޭ ގޮތުން އަޅުގަނޑު ލިއުނު 'ފެބްރުއަރީ ހަތެއް' ފޮތުގައި، ލިއުނީމެވެ.

އެއްބަސްވެވުނީ ސިފައިންގެ އިން އޭނާ ކަނޑާލި އިރު ހުންނެވި މަގާމަށް އަލުން ވެންނެވުމަށެވެ. އެކަމަކު އޮފީހަށް ނުކުމެވަޑައިގަތުމުގެ ބަދަލުގައި ރީތިކޮށް ރިޓަޔަކުރެއްވުމެވެ. 'ކާނަލް ރިޓަޔާޑް'ގެ ނަން އޭނާއަށް ބޭނުންކުރެއްވޭ ގޮތްވީ އެހެންވެގެންނެވެ.

އޭގެ ކުރިން ރާއްޖެ ނުދެކޭ ވަރުގެ ހަމަނުޖެހުމެއް 7 ފެބްރުއަރީ 2012ގައި ކުރިމަތިވީ އެމްޑީޕީގެ 'ދުޝްމަނުން'ގެ ލިސްޓުން ނާޒިމްގެ ނަން ފަނޑުނުވެ އުޅެނިކޮށެވެ. އެ ދުވަހު އޭނާ ކުޅުއްވި ރޯލުގެ ސަބަބުން އެމްޑީޕީގެ ސަޕޯޓަރުންނަށް އެންމެ ފަހުން އޭނާ ވީ 'ބާގީއަކަށެ''ވެ.

ނަޝީދުގެ ވެރިކަމާ ދެކޮޅަށް އުފެދުނު އެ ބޮޑު ހަމަނުޖެހުން ހަމަޖެއްސެވޭތޯ ސިފައިންގޭގެ ސަރަހައްދަށް ނާޒިމް ވަޑައިގަތެވެ. އެކަމަކު ކުޑަކުޑަ ވަގުތުކޮޅެއްގެ ތެރޭގައި އޭނާ ވެވަޑައިގަތީ އެއްވެފައި ތިބި އާންމުންނާއި، އެ ހަމަނުޖެހުމުގެ ތެރެއިން ނަޝީދާ ދެކޮޅަށް ނުކުތް ސިފައިންނާއި ފުލުހުންގެ 'ލީޑަރަކަށެ'ވެ. އޭރުގެ ޑިފެންސް މިނިސްޓަރު ތޮލްހަތު އިބްރާހިމް ކަލޭފާނުގެ ދައުވަތަކަށް ސިފައިންގެއަށް ވެންނެވީ ނާޒިމް އާއި، އޭނާގެ ގާތް އެކުވެރިޔާ އަބްދުﷲ ރިޔާޒެވެ. އެއްވެފައި ތިބި މީހުން ހުށައެޅި ޑިމާންޑްތައް، ސިފައިންގެ އިސް ލީޑަޝިޕާ ހަމައަށް ގެންގޮސްދެއްވީ އެ ދެ ބޭފުޅުންނެވެ.

'ފެބްރުއަރީ ހަތެއް' ފޮތުގައި ލިއުނެވެ: "ހެނދުނު ގާތްގަނޑަކަށް 11:30 ހާއިރު ސިފައިންގޭ ތެރެއަށް ދެ ބޭފުޅުން ވަޑައިގަތީ، ނާޒިމް ވިދާޅުވި ގޮތުން ނަމަ، އެ ބޭފުޅުންގެ ޑިމާންޑްތަކެއް ހިއްޕަވައިގެންނެއް ނޫނެވެ. އެއީ އެއްވެފައި ތިބި، އާންމުންނާއި ފުލުހުންނާއި، ފުލުހުންނާ ގުޅުނު ސިފައިންގެ ޑިމާންޑްތަކެވެ."

ނަމަވެސް އެ ބައްދަލުވުމުގެ ފަހުން ރައީސްކަމުން ނަޝީދު އިސްތިއުފާ ދެއްވުމާ އެކު، ނާޒިމްއާ މެދު އެމްޑީޕީގެ ސަޕޯޓަރުންގެ ހިތުގައި އުފެދުނީ، 'ދުންފިނި ހަރުގެ' ފުނޑާލި އިރަށް ވުރެ ވެސް ބޮޑު ނަފުރަތެކެވެ. އޭގެ އަނެއް ދުވަހު، ރައީސް މުހައްމަދު ވަހީދު ސަރުކާރުގެ ޑިފެންސް މިނިސްޓަރުކަން ލިބިވަޑައިގަތެވެ. އާ ރިޔާސީ އިންތިހާބު 2013ގައި ބާއްވައި، ނަޝީދުގެ މައްޗަށް އަބްދުﷲ ޔާމީން ކާމިޔާބު ހޯއްދަވަންދެން، ވަހީދު ސަރުކާރު ދެމެހެއްޓުމުގެ އިސް އެއް ބޭފުޅަކީ ނާޒިމްކަމާ މެދު ޝައްކެއް ނެތެވެ.

ޔާމީންގެ ސަރުކާރުގައި ވެސް ނާޒިމަށް ބޮޑެތި ޒިންމާތަކެއް ހަވާލުކުރި އެވެ. އޭނާ ފެނުނީ އެ މަސްއޫލިއްޔަތުތައް ފުރިހަމަކުރެއްވި ބޭފުޅެއްގެ ގޮތުގަ އެވެ. އާންމުންނަށް އޭނާގެ ހިންގުންތެރިކަން އެންމެ ބޮޑަށް ތަޖުރިބާކުރެވުނީ ޑިސެމްބަރު 2014ގައި މާލެއަށް ކުރިމަތިވި ފެނުގެ ކާރިސާއާ އެކު އެވެ. އެމްޑަބްލިޔުއެސްސީގައި ހިނގި އަލިފާނުގެ ހާދިސާއާ ގުޅިގެން ފެން ޕްލާންޓްތައް ހުއްޓި، ވެރިރަށުން ފެން ކެނޑުނީ އެވެ. އެ ބޮޑު ހާދިސާ ކުރިމަތިވި އިރު ރައީސް ޔާމީން ހުންނެވީ ރާއްޖެއިން ބޭރުގަ އެވެ. ޔާމީން އެކުލަވާލެއްވި ޓާސްކް ފޯސްގެ އިސް ވެރިޔަކަށް ލެއްވީ ނާޒިމް އެވެ.

އުނދަގޫ ކުރިމަތިވިޔަސް، އާންމުންގެ ޝަކުވާތައް ކުޑަކޮށް، ރައްޔިތުން ހަމަޖެހުމެއްގެ ތެރޭގައި ބޭތިއްބުނީ އެ ޓާސްކް ފޯސްގެ ސަބަބުންނެވެ.

ނަމަވެސް އޭގެ ފަހުން މާ ގިނަ ދުވަހެއް ނުވެ ނާޒިމަށް އޭނާގެ ހަޔާތުގެ އެންމެ ނުރައްކާތެރި ވަގުތާ ދިމާވި އެވެ. އަނބިކަނބަލުންގެ ގޭގައި އަވަހާރަފުޅުލައްޕަވާފައި ތިއްބަވަނިކޮށް 18 ޖެނުއަރީ 2015ގެ ދަންވަރު، ކުއްލިއަކަށް ފުލުހުންގެ ސްޕެޝަލް ފޯސްގެ ޓީމެއް، ދޮރު ވައްޓާލާފައި، ވަދެގަތެވެ. އޭނާގެ ކޮޓަރިން ފެނުނު ކަމަށް ފުލުހުން ބުނީ، ފިސްތޯލައަކާއި ތިން ވަޒަން ހޯދީ އެ އޮޕަރޭޝަންގަ އެވެ.

އޭގެ ދެ ދުވަސް ފަހުން، 20 ޖެނުއަރީ 2015ގައި، ޑިފެންސް މިނިސްޓަރުކަމުން ވަކިކުރި އެވެ. އެދުވަހު ނާޒިމް ބޭއްވެވި ނޫސްވެރިންގެ ބައްދަލުވުމުގައި، އޭނާގެ ސިޔާސީ ހުވަފެނުގެ ވާހަކަ ފުރަތަމަ ފަހަރަށް ވިދާޅުވި އެވެ. 

"އިރާދަކުރެއްވިޔާ މިއަށް ވުރެ މަތީ މަގާމެއްގައި [މިނިސްޓަރުކަމަށް ވުރެ] މަސައްކަތްކުރުމަކީ އަޅުގަނޑު ކުރާ އުއްމީދެއް. އަދި އުއްމީދު ހާސިލްކުރުމަށްޓަކައި ރައްޔިތުންނާ ގުޅިގެން މަސައްކަތްކުރާނަން،" ރާއްޖޭގެ ރައީސްކަމުގެ މަގާމަށް އޭނާ ކުރައްވާ އުއްމީދުގެ ވާހަކައިން ވިދާޅުވި އެވެ.

"އިރާދަކުރެއްވިއްޔާ މިއަދުން ފެށިގެން އަޅުގަނޑު އަޒުމް މި ކަނޑައެޅީ ރައްޔިތުންނަށް ހިދުމަތްކުރުމަށްޓަކައި ދެމިހުރުމަށް. މިކަހަލަ ކަމެއް ކޮށްގެން [ފުލުހުން ގެއަށް ވަނުން] އަޅުގަނޑު އެއްވެސް ހާލެއްގައި ރައްޔިތުންނަށް ހިދުމަތްކުރާކަށް ފަހަތަކަށް ނުޖެހޭނެ ވާހަކަ، ދިވެހި ލޮބުވެތި ރައްޔިތުންނަށް އަދި މި ސަރުކާރުގައި ތިއްބެވި ބޭފުޅުންނަށް ދަންނަވާލަން." 

އެ ވާހަކަ ސަރުކާރަށް އަޑުއިވުނެވެ. އަދި ޑިފެންސް މިނިސްޓަރުގެ ގެއަށް އެގޮތަށް ދަންވަރު ފުލުހުން ވަދެގަންނަ ނަމަ އެއީ ދިވެހި ކޮންމެ ރައްޔިތަކަށް ވެސް އޮތް ބޮޑު ބިރެއްކަމަށް ވިދާޅުވެ، ޔާމީން ސަރުކާރުގެ 'ނުރައްކާތެރިކަން' ވެސް އެދުވަހު ވިދާޅުވި އެވެ. ނާޒިމަށް ސަލާމަތެއް ނެތެވެ. ފެބްރުއަރީ މަހު އޭނާ ހައްޔަރުކުރި އެވެ. ދައުވާ އުފުލައި، ޝަރީއަތްކޮށް، މާޗު މަހު، 11 އަހަރަށް ޖަލަށް ލި އެވެ. އޭނާގެ ކޮޓަރިން ފެނުނު ކަމަށް ފުލުހުން ބުނި ފިސްތޯލައިން އޭނާ އާއި އާއިލާ މީހެއްގެ ޑީއެންއޭގެ އެއްވެސް ނިޝާނެއް ނުފެނެ އެވެ. އެއީ އޭރުގެ ޓޫރިޒަމް މިނިސްޓަރު އަހުމަދު އަދީބު އަޑީގައި ހުންނަވައިގެން ރޭވިރޭވުމެއް ކަމަށް ވިދާޅުވަމުން ގެންދެވި އެވެ.

ރިިޔާސި އިންތިހާބު 2018ގައި ކުރިމަތިވި އިރު ނާޒިމް ހުންނެވީ ޖަލުގަ އެވެ. ރިޔާސީ އިންތިހާބުގެ ވޯޓު ކަރުދާސްކޮޅުގައި އޭނާގެ ނަމެއް ނެތެވެ. ކުށެއް ނެތް ބޭފުޅެއްގެ ގޮތުގައި އޭނާ މިނިވަންވެވަޑައިގަތީ ޔާމީންގެ ވެރިކަން ވެއްޓުމާ އެކު ސުޕްރީމް ކޯޓުން އަލުން މައްސަލަ ބެލުމަށް ފަހު އެވެ.

މިދިއަ ހުކުރުދުވަހުގެ ރޭ، އާޓިފިޝަލް ބީޗުގައި އޮތް މޯލްޑިވްސް ނެޝެނަލް ޕާޓީ (އެމްއެންޕީ)ގެ ރަސްމީ ޖަލްސާގައި ނާޒިމް ވަނީ އެ ޕާޓިގެ ރިޔާސީ ޓިކެޓާ ރަސްމީކޮށް ހަވާލުވެވަޑައިގެންފަ އެވެ. މިއީ މަޖީދިއްޔާ ސްކޫލް ނިންމެވި އިރު ރާއްޖޭގެ ގައުމީ ބެޑްމިންޓަން ޓީމުގައި ހިމެނިވަޑައިގެންނެވި ކުޅުންތެރިޔާ ގަދަކަމުން ސިފައިންގެއަށް ވެއްދި ފަހުން، ގައުމީ ހިދުމަތުގައި އަޅުއްވާ އެންމެ ތާރީހީ ފިޔަވަޅެވެ. ކުރިއަށް އޮތް އިންތިހާބުގައި ރާއްޖޭގެ އެންމެ ބޮޑު ދެ ޕާޓީ، އެމްޑީޕީ އާއި ޕީޕީއެމް ބަލިކޮށް، އެމްއެންޕީއަށް ކުރިއެއް ލިބުން ނާދިރު ނަމަވެސް އޭނާ އެ ނުކުންނެވީ އުއްމީދު ހާސިލްކުރެއްވޭތޯ އެވެ.

މިއީ 2015ގައި، ޔާމީނަށް ޗެލެންޖްކުރައްވައި އޭނާ އިއުލާންކުރެއްވި ހުވަފެން ހަގީގަތަކަށް ހެއްދެވުމުގެ ފުރަތަމަ އަމަލީ މަސައްކަތެވެ. ޕްރައިމަރީއެއް އިއުލާންކުރި ނަމަވެސް އެއްވެސް މީހަކު ކުރިމަތިނުލުމުން ވާދައެއް ނެތި ލިބިވަޑައިގެންނެވި ރިޔާސީ ޓިކެޓަށް ފަހު ދެއްކެވި ވާހަކާގައި، ރިޔާސީ ކެންޑިޑޭޓުންގެ އަސާސީ އާދައިގެ ތެރެއިން ވައުދުތަކެއް ވެވަޑައިގަތެވެ. އެ ވައުދުތައް ހިއްޕަވައިގެން އާންމުންނާ ބައްދަލުކުރައްވާ އިރު ނާޒިމަށް އިތުބާރުކުރުމާއި ނުކުރުން އޮތީ ރައްޔިތުންނަށެވެ.

މިހާ ހިސާބަށް އޭނާ އެ ވަޑައިގަތީ ސިޔާސީ ގޮތުން ވަރަށް ބޮޑެތި ކަންކަން ތަޖުރިބާ ކުރައްވައިފަ އެވެ. އެހާމެ ގިނަ ގޮންޖެހުންތަކެއް ގިރާ ވެސް ކުރައްވައިފަ އެވެ.