ފެނަކައިގެ ހިސާބުތަކަށް ފީނާލުން އަދި ފެންނަ ބޮޑު މަންޒަރު

އަތޮޅުތެރެއަށް ކަރަންޓުގެ ހިދުމަތް ދޭން ސަރުކާރުން އުފައްދާފައިވާ ޔުޓިލިޓީ ކުންފުނި، ފެނަކައާ މެދު ޝަކުވާތައް ވަނީ ބޮޑުވެފަ އެވެ. އެންމެ ބޮޑު ޝަކުވާއަކީ އާންމު އެތައް ފަރާތްތަކަށް އެ ކުންފުނިން ދޭން ވެފައި އޮތް ފައިސާ ނުދީ ކުންފުނި ބޮޑު ތަނުން ދަރާފައިވުމެވެ. ހަގީގަތުގައި ފެނަކައަށް މިވީ ގޮތުގެ ބޮޑު މަންޒަރު ސާފުވަނީ އޮޑިޓް އޮފީހާއި ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ)އިން އާންމުކޮށްފައިވާ ކުންފުނީގެ މާލީ ހިސާބުތަކަށް ބަލައިލުމުންނެވެ. 

އޮޑިޓް އޮފީހުން އާންމުކޮށްފައިވާ ފެނަކައިގެ 2018 ވަނަ އަހަރުގެ މާލީ ހިސާބުތަކުގެ އޮޑިޓުން ދައްކާ ގޮތުގައި، 2018 ވަނަ އަހަރުގެ ތެރޭގައި ކުންފުނީގެ ހަރަދުތައް ވަނީ ވަރަށް ބޮޑަށް މައްޗަށް ގޮސްފަ އެވެ. އެގޮތުން 2017 ވަނަ އަހަރާ އަޅާބަލާއިރު ވަނީ:

އިދާރީ ހަރަދުތައް އިތުރުވުމުގެ މައިގަނޑު ސަބަބެއްގެ ގޮތުގައި ދައްކަނީ ފެނަކައިގެ ބޯޑް މެންބަރުންނާއި މުވައްޒަފުންގެ މުސާރަ އާއި އެލަވަންސްތަކަށް ކުރާ ހަރަދާއި މަރާމާތާއި އޮފީސް ސަޕްލައިއަށް ކުރާ ހަރަދުތައް އިތުރުވުމެވެ. އަދި ވަކި ކެޓަގަރީއަކަށް ނުފެތޭ ގޮތަށް ކުރި ހަރަދު ނުވަތަ އެހެނިހެން ހަރަދުތަކުގެ ބައިން ވެސް 9 މިލިއަން ރުފިޔާ އިތުރުވެފައިވެ އެވެ. 

އާމްދަނީ އިތުރުވި ވަރަށް ވުރެ ބޮޑަށް ހަރަދުތައް އިތުރުވުމުގެ ނަތީޖާއެއްގެ ގޮތުން، ކުންފުނީގައި ހުރި ފައިސާގެ އަދަދު ވަރަށް ބޮޑުތަނުން އެ އަހަރު ދަށަށް ދިޔަ އެވެ. އެގޮތުން، 2018 ނިމުނު އިރު ކުންފުނީގެ ބޭންކު އެކައުންޓްތަކާއި ނަގުދު ފައިސާއިން ކުންފުނީގައި ހުރި ފައިސާގެ އަދަދު %45 ދަށްވެ، 38.8 މިލިއަން ރުފިޔާއަށް ވެއްޓުނެވެ. އޭގެ ކުރިން، 2017ގައި އެ އަދަދު ހުރީ 77.5 މިލިއަން ރުފިޔާގަ އެވެ. 

ހަރަދުތަކަށް އަންނަން ފެށި މި ބަދަލާ އެކު ކުންފުނި ވަނީ 2018 ވަނަ އަހަރު ނިމުނު އިރު މާލީ ގޮތުން ނާޒުކު ފައްތަރެއްގަ އެވެ. އެގޮތުން، ކުންފުނީގެ ދަރަނިތައް ދެއްކޭނޭ ގާބިލްކަން ހުރި ކަމާ މެދު ޝައްކު އުފެދޭ ވަރަށް އެ ކުންފުނީގެ މާލީ މިންގަނޑުތައް ވަނީ ދަށަށް ގޮސްފަ އެވެ.

ޕީސީބީއިން އެކުލަވާފައިވާ ފެނަކައިގެ 2018 ވަނަ އަހަރުގެ ހަތަރު ވަނަ ކުއާޓާގެ މާލީ ރިޕޯޓުން ދައްކާ ގޮތުގައި: 

ޕީސީބީން ނެރުނު 2018 ވަނަ އަހަރުގެ ރިޕޯޓްގައި ފާހަގަކުރި ގޮތުގައި، އެ ރޭޝިއޯތައް ދަށްވުމުން ދައްކުވައި ދެނީ ކުންފުނީގެ ކުރު މުއްދަތުގެ ދަަރަނި ދެއްކުމުގެ ގާބިލްކަން ކުންފުނީގައި ނެތް ވަރަށް ކުންފުނީގެ މާލީ ކަންކަން ގޯސްވެފައިވާ ކަމެވެ. އެގޮތުން، ކުންފުނީގައި ހުރި ފައިސާ އާއި އެސެޓަށް ވުރެ ކުންފުނީގެ ދަރަނި ދެ ގުނަ ބޮޑުވެފައިވާ ކަމަށް ރިޕޯޓްގައި ފާހަގަކުރި އެވެ.

ކުންފުނި މާލީ ގޮތުން ނާޒުކުވުމާ އެކު ކުންފުނީގެ ދަރަނި 593 މިލިއަން ރުފިޔާއިން 620.5 މިލިއަން ރުފިޔާއަށް 2018 ވަނަ އަހަރު ނިމުނު އިރު އަރާފައިވާކަން އޮޑިޓް ރިޕޯޓުން ހިސާބުތަކުން ދައްކަ އެވެ.

"ބޭނުންކުރަން ހުރި ފައިސާގެ މިންވަރު ދަށްވެފައި ވާއިރު، ބޭނުންކުރަން ހުރި ފައިސާގެ މިންވަރު އިތުރުކޮށް، ދަރަންޏަށް ތަކެތި ދިނުން މަދުކުރަން ޖެހެ އެވެ. އަދި މިހާރަށް ވުރެ ބޮޑަށްް، އަވަހަށް ބިލުތަކަށް ފައިސާ ހޯދޭނެ ނިޒާމެއް ގާއިމްކުރަން ޖެހޭ،" 2018ގެ ރިޕޯޓްގައި ޕީސީބީއިން ފާހަގަކުރި އެވެ.

"ކުންފުނީގެ ހަރަދުތަކަށް ބޭނުންވާ ވަރަށް ކުންފުނީގައި ފައިސާއެއް މިހާރަކު ނެތް."

ޕީސީޕީގެ ރިޕޯޓުން ވެސް ކުރަހައިދިން ބޮޑު މަންޒަރަކީ 2018 ވަނަ އަހަރު ނިމުނު އިރު ކުންފުނީގެ މާލީ ހާލަތު ނުބައި މަގަށް އަޅާފައިވާ ކަމެވެ. ރިޕޯޓްގައި ބުނި ގޮތުގައި، ފެނަކައިގެ ސަޕްލަޔަރުންނަށް ފައިސާ ދެއްކުމުގައި 2018 އިން ފެށިގެން ކުންފުންޏަށް ވަނީ ދަތިތަކާ ކުރިމަތިވާން ފަށައިފަ އެވެ. އޭގެ އެންމެ ބޮޑު އަސްލަކީ ކުންފުނީގެ ހަރަދުތައް އިތުރުވެފައިވުން ކަމަށް އެ ރިޕޯޓުގައި ފާހަގަކުރި އެވެ.

ބެލެވޭ ގޮތުގައި ހަރަދުތައް އިތުރުވާން ޖެހުނު މައިގަނޑު ސަބަބަކީ އޭރުގެ ރައީސް އަބްދުﷲ ޔާމީންގެ ސަރުކާރުގައި، 2018ގައި އޮތް ރިޔާސީ އިންތިހާބާ ދިމާކޮށް ކުންފުނީގެ މުވައްޒަފުންގެ އަދަދު އިތުރުކުރުމާއި ކުރަން ނުޖެހޭ ހަރަދުތައް އަދި ކުންފުންޏަށް ބޭނުން ނުވާ އިންވެސްޓްމަންޓްތައް ސިޔާސީ ވިސްނުމުގައި ކުރުމެވެ.

އެ ސަބަބުތަކާ ހުރެ ފެނަކައަށް ކުރިމަތިވެފައި އޮތް ދަތި ހާލަތުން އަރައިގަންނަން ޕީސީބީއިން ދީފައިވާ ލަފާތަކަކީ: 

ސުވާލަކީ، ފެނަކަ ސަމާލަތް ކުރަން އޭރު ޕީސީބީއިން އެދިފައިވާ މި ފިޔަވަޅުތައް އެޅުނު ހެއްޔެވެ؟ 

ޕީސީބީގެ ރައީސް އާސިމް މުހައްމަދު ވިދާޅުވި ގޮތުގައި، އެތައް ފަހަރަކު ފެނަކައިގެ ކަންކަން ރަނގަޅު ކުރަން ޕީސީބީއިން ފެނަކައަށާއި ސަރުކާރަށް ވެސް އިރުޝާދު ދީފައިވެ އެވެ. އެކަމަކު އެކަން ކަމަށް އެކަށީގެންވާ ގޮތެއްގައި އަމަލުކޮށްފައި ނެތް ކަމަށް އޭނާ ވިދާޅުވި އެވެ. 

"ކަންކަން އިސްލާހު ކުރަން އުނދަގޫ އެއް ކުންފުނި ފެނަކައަކީ. ބޯޑް ޒިންމާދާރުކޮށްގެން މި ކަންކަން ރަނގަޅު ކުރަން އަޅުގަނޑުމެން ބަލަނީ، ސީދާ މެނޭޖްމަންޓުގެ ތެރެއަށް ނުވަދެ. އެކަމަކު ކަންކަން ރަނގަޅުވެފައެއް ނެތް މި އޮތްހާ ދުވަހު ވެސް. ވަރަށް މަސައްކަތް ކުރެވިއްޖެ،" އާސިމް ވިދާޅުވި އެވެ.  

ޕީސީބީއިން އެންމެ ފަހުން އާންމުކޮށްފައި އޮތީ ފެނަކައިގެ 2021 ވަނަ އަހަރުގެ މާލީ ހިސާބުތަކެވެ. އެ ހިސާބުތަކުން ފެނުނީ، 2018ގެ ހާލަތަށް ވުރެ ވެސް އެ ކުންފުނީގެ މާލީ ހާލަތު 2021 ނިމުނު އިރު ދަށް ވެފައިވާ ތަނެވެ. 

ކޮވިޑާ ގުޅިގެން ކުރި އަސަރުތައް 2021ގައި ރަނގަޅުވެފައިވީ ނަމަވެސް، ފެނަކައިގެ ހަރަދުތައް ވެސް އިތުރަށްވީ ބޮޑެެވެ. ސަބަބަކަށްވީ، ކުންފުންޏަށް މުވައްޒަފުން އިތުރުކުރުން ފަދަ ކަންކަން ކުރުން ކަމަށް ރިޕޯޓްތަކުން ސާފުވެ އެވެ. މިސާލަކަށް ބަލާއިރު، ކުޑަ ރަށެއްގައި ހުންނަ ފެނަކައިގެ އޮފީހަކަށް ބޭނުން ނުވާ ވަރަށް ވުރެ އިތުރަށް އެތައް މުވައްޒަފުންތަކެއް ނަގަ އެވެ. އަދި އިންތިހާބުތަކާ ދިމާކޮށް އެ އަދަދު އަދި މާ އިތުރު ކުރެ އެވެ.

ނަތީޖާއަކަށްވީ މި ހުރިހާ ކަމަކާ ހުރެ، ކުރު މުއްދަތުގެ ދަރަނި ވެސް އިތުރަށް ބޮޑުވެގެން ދިއުމެވެ. އެގޮތުން، ރިޕޯޓްގައި ފާހަގަކުރި ގޮތުގައި: 

މީގެ އިތުރަށް، ކުންފުނީގެ މާލީ ގާބިލްކަން ހުރި މިންވަރު ބަލާ ހުރިހާ މިންގަނޑުތަކެއްގައި ވެސް ފެނަކަ ދިޔައީ އިތުރަށް ދަށަށެވެ. އެގޮތުން، 2018 ވަނަ އަހަރަށް ވުރެ ވެސް މާ ބޮޑަށް 2021ގައި ފެނަކަ މާލީ ގޮތުން ސޮއްސާލި އެވެ. އެގޮތުން: 

ރިޕޯޓްގައި ޕީސީބީއިން ފާހަގަކުރި ގޮތުގައި، ކުންފުނީގެ މާލީ ހާލަތު ދަށަށް ދާން ފެށީ ކުންފުނީގެ ކުރު މުއްދަތުގެ ދަރަނިތަކަށް ފައިސާ ނުދެއްކި ދަރަނި ފުނިޖެހެމުން ދާން ފެށުުމުންނެވެ. އަދި 2021 ވަނަ އަހަރު ނިމުނުއިރު ފެނަކައިގައި ހުރި ހަރުމުދަލުން ދަރަނި ނުދެއްކޭ ހިސާބަށް ކުންފުނީގެ ހާލަތު ގޮސްފައިވާ ކަމަށް ވެސް ޕީސީބީއިން ފާހަގަކޮށްފައިވެ އެވެ.

"ކުންފުނީގެ މާލީ ހާލަތު ވަނީ ވަރަށް ނާޒުގު ފައްތަރަކަށް ގޮސްފައި،" ޕީސީބީގެ 2021 ވަނަ އަހަރުގެ ރިޕޯޓްގައި ފާހަގަކުރި އެވެ.

ހިސާބުތަކުން ދައްކާ ގޮތުގައި، 2021 ވަނަ އަހަރު ނިމުނު އިރު ފެނަކައިން ދޭ ހިދުމަތަށް ކުންފުންޏަށް ފައިސާ ލިބެން ނަގާ ދުވަހުގެ އަދަދު 69 އިން 59 ދުވަހަށް ވަނީ ކުޑަކުރެވިފައިވެ އެވެ. ނަމަވެސް، ފެނަކައިން ސަޕްލަޔަރަކަށް ފައިސާ ދައްކަން އެވްރެޖްކޮށް 524 ދުވަސް ނުވަތަ އެއް އަހަރާއި ފަސް މަސް ނަގާ ކަމަށް ހިސާބުތަކުން ދައްކަ އެވެ. އެއީ، 2020 ވަނަ އަހަރާ އަޅާބަލާއިރު 98 ދުވަސް އިތުރު އަދަދެކެވެ. 

"ސަޕްލަޔަރުންނަށް ފައިސާ ދައްކަން ނަގާ ދުވަސް އިތުރުވަމުން ދިޔުމަކީ ކުންފުނީގެ މާލީ ހާލަތު އިތުރަށް ގޯސްވަމުން ދާކަމުގެ ހެއްކެކެވެ،" ރިޕޯޓްގައިވެ އެވެ.

އެ ހާލަތަށް ކުންފުނި ދިޔަ ނަމަވެސް، 2021 ވަނަ އަހަރުގެ ތެރޭގައި ފެނަކައިން ވަނީ އެ ކުންފުންޏަށް ނުލިބި ހުރި ފައިސާގެ ތެރެއިން 89.7 މިލިއަން ރުފިޔާ މާފުކޮށްދީފަ އެވެ. އެއީ ކުންފުންޏަށް ނުލިބި ހުރި ފައިސާގެ %36 އެވެ. ކުންފުނި މާލީ ގޮތުން ދަށްއިރު މިއީ ވިޔަފާރި ވިސްނުމަށް ވުރެ ބޮޑަށް ކުންފުންޏަށް ގެއްލުންވާ ގޮތަށް ނިންމި ނިންމުމެކެވެ.

ޕީސީބީގެ ރިޕޯޓްގައި ފާހަގަކުރި ގޮތުގައި، ކުންފުނީގެ މާލީ ހާލަތު އިތުރަށް ދަށްވާން ފެށީ ބޮޑެތި ކެޕިޓަލް ހަރަދުތަކެއް ފެނަކައިން ކުރަން ފެށުމުން ކުންފުނީގައި ހުންނަ ފައިސާ މަދުވާން ފެށުމުންނެވެ.

އެގޮތުން، ފެނަކައިގެ މާލީ ހާލަތު ދަށްވެފައިވަނިކޮށް އިންޖީނުގެތައް މީހުން ނޫޅޭ ސަރަހައްދުތަކަށް ބަދަލުކުރުމުގެ ނަމުގައި ބުރިބުރިއަށް އޮފީސް އިމާރާތްތައް ހަދައި އާ އިންޖީނުގެތައް ވެސް ހަދަން ފެށި އެވެ. ދެ ހާހެއްހާ މީހުން ދިރިއުޅޭ ރަށެއްގައި ވެސް ތިން ބުރީގެ އޮފީސް އިމާރާތެއް ހަދާފާނެ އެވެ. މި ގޮތަށް ހަވާލުކޮށްފައި ހުރި ކޮންޓްރެކްޓްތަކުގެ އަގުތައް ވެސް ބާޒާރުގެ އަގުތަކަށް ވުރެ ބޮޑެވެ.

މި ހުރިހާ ކަމެއްގެ ނަތީޖާއަކަށްވީ ކެޕިޓަލް ހަރަދުތައް ވަރަށް ބޮޑަށް މައްޗަށް ގޮސް، ކުންފުނީގެ މާލީ ހާލަތު އިތުރަށް ދަށަށް ދާން ފެށުމެވެ. ރިޕޯޓްގައި ފާހަގަކުރި ގޮތުގައި:

ރިޕޯޓްގައި ފާހަގަކުރި ގޮތުގައި، އެ ކެޕިޓަލް ހަރަދުތައް ކުރުމުން ދުރު މުސްތަގުބަލުގައި އާމްދަނީ އިތުރުވުމުގެ ފުރުސަތެއް އޮތް ނަަމަވެސް، ސަރުކާރުން ދޭ ފައިސާއަށް ވަރަށް ބޮޑަށް ބަރޯސާވެފައި އޮންނަ ކުންފުންޏަކުން ހާލަތު ގޯސްކޮށް އޮއްވައި ބޮޑެތި ކެޕިޓަލް ހަރަދުތަކެއް ކުރުމަކީ ކުުންފުނި ކުރިއަށް ގެންދެވޭނޭ ގޮތެއް ނޫނެވެ. 

"ކުރު މުއްދަތުގައި ކުންފުނި ހިންގޭނޭ ގޮތްތަކަކަށް ވެސް ވިސްނަން ޖެހެ އެވެ،" ޕީސީބީގެ ރިޕޯޓްގައިވެ އެވެ.

މީގެ ނަތީޖާއެއްގެ ގޮތުން، ކުންފުނީގައި ހުރި ފައިސާގެ އަދަދު 2021 ނިމުނުއިރު، 2020 ވަނަ އަހަރާ އަޅާބަލާއިރު %30 ދަށްވެފައިވާ ކަމަށް އޮޑިޓްގެ ހިސާބުތަކުން ދައްކަ އެވެ. އެއީ 2.5 މިލިއަން ރުފިޔާ މަދުވުމެކެވެ. އަދި ފެނަކައިގެ ފައިސާ އަހަރުން އަހަރަށް މަދުވަމުން ދިޔުމުގެ ސަބަބުން ކުންފުންޏަށް ކުރު މުއްދަތުގެ ދަރަނިތައް ދެއްކޭނޭ ކަމާ މެދު ސުވާލު އުފެދޭ ހިސާބަށް ކުންފުނި ގޮސްފައިވާކަން ސާފުވެ އެވެ.

ފެނަކައިގެ މާލީ ހިސާބުތަކުން ދައްކާ ގޮތުން، 2021 ވަނަ އަހަރު ނިމުނު އިރު ކުންފުނިން އެކި ފަރާތްތަކަށް ދައްކަން ޖެހިފައިވާ ކުރު މުއްދަތުގެ ދަރަނި ވަނީ 1.6 ބިލިއަން ރުފިޔާއަށް އަރައިފަ އެވެ. އަދި އަހަރެއްގެ ތެރޭގައި އެވްރެޖްކޮށް ދަރަންޏަށް 363 މިލިއަން ރުފިޔާ އިތުރުވެފައިވާކަން ވެސް ހިސާބުތަކުން ދައްކަ އެވެ.

ފަހުގެ ރިޕޯޓްތައް އަދި ނެރެފައި ނުވާތީ މިހާރު ފެނަކައިގެ ހާލަތު މިއަށް ވުރެ ގޯސްވެފައި ވެދާނޭ ކަމަށް ބެލެވެ އެވެ. 

މީޑިއާއަށް ތިލަވެފައިވާ މައުލޫމާތަށް ބަލާއިރު، މިހާތަނަށް 2.8 ބިލިއަން ރުފިޔާ ފެނަކައިގެ ދަރަނީގެ ގޮތުގައި އެބަ ހުއްޓެވެ. އޭގެ ތެރެއިން 1 ބިލިއަން ރުފިޔާއަކީ އާންމު ފަރާތްތަކަށް އޮތް ދަރަންޏެވެ. އަދި އަނެއް ބަޔަކީ އެސްޓީއޯގެ ތެޔޮ ބިލްތަކަށް ދައްކަން ޖެހިފައިވާ 1.8 ބިލިއަން ރުފިޔާ އެވެ.

ޕީސީބީގެ ރައީސް އާސިމް ވިދާޅުވި ގޮތުގައި، ފެނަކައަށް ކުރިމަތިވީ އެންމެ ބޮޑު މައްސަލައަކީ، ކުންފުނީގައި މާލީ ހާލަތު ނެތް ވަރުން ވެސް ބޮޑެތި މަޝްރޫއުތަކެއް ހިންގަން ފެށުމެވެ. އަދި ކުންފުނީގެ މާލީ ކަންކަން ދޯދިޔާކަމުން ކުންފުނީގެ މެނޭޖްމަންޓަށް ބައެއް ބަދަލުތައް ގެންނަން ލަފާ ދެއްވި ކަމަށް ވެސް އޭނާ ވިދާޅުވި އެވެ.

"ބައެއް ފަހަރު ފާހަގަވެފައި އެބަހުރި ވަކި ކަމަކަށް ދޭ ކެޕިޓަލް ކޮންޓްރިބިއުޝަން ވެސް އެކަން ނޫން އެހެން ކަންކަމަށް ބޭނުންކުރެވިފައި ހުރިކަން ވެސް. އަބަދުވެސް ވަރަށް މައްސަލަތައް ހުރި ކުންފުންޏެއްގެ ގޮތުގައި ފެނަކަ ފާހަގަވަނީ،" އާސިމް ވިދާޅުވި އެވެ.

ފެނަކައާ މެދު ހުރި ކަންބޮޑުުވުންތަކާ ގުޅިގެން އެ ކުންފުނީގެ މެނޭޖިން ޑިރެކްޓަރު އަހުމަދު ސައީދު މުހައްމަދު ވިދާޅުވަނީ ފެނަކައިގެ މާލީ ކަންކަން އިތުރަށް ގޯސްވެގެން ނޫޅޭ ކަމަށެވެ. ފެނަކައިގެ މާލީ ކަންކަން ގޯސްވެ، ކުންފުނި ބޮއްސުންލާފައިވާ ކަމަށް އޭނާ ގަބޫލެއްނުކުރައްވަ އެވެ. އޭނާ ހަވާލުވީ ފަހުން ކުންފުނީގައި އޮތް ޒަމާންވީ ދަރަނި ކުޑަކޮށް މާލީ ކަންކަން ރަނގަޅުކޮށްފައިވާނޭ ކަމަށް އޭނާ ވިދާޅުވި އެވެ.

"ކުންފުނި އިތުރަށް ގޯސްވެގެން މި ތަން [ފެނަކަ] ބޮއްސުންލައިގެން އުޅޭ ކަމެއް އެއީ އަޅުގަނޑުމެން ދެނެހުރި ކަމެއް ނޫން. މީޑިއާގައި ދައްކާ ވާހަކައެއް ތިއީ. އަޅުގަނޑުމެން ހަވާލުވެފައި ކުންފުނީގެ އެތައް ކަމެއް ހުންނާނީ ރަނގަޅުކޮށްފައި،" ސައީދު ވިދާޅުވި އެވެ.

ސައީދު އެހެން ވިދާޅުވިޔަސް، މާލީ ހިސާބުތަކުން އެ ކަމަށް ބާރެއް ނުދެ އެވެ. އެ ކުންފުނީގެ ދަރަނި ވަނީ މިދިޔަ އަހަރުތަކުގެ ތެރޭގައި އިތުރަށް ބޮޑުވެފަ އެވެ.

އެއްކަމެއް ޔަގީނެވެ؛ ފެނަކައިގައި ޒަމާންވީ މައްސަލަތަކެއް އެބަ ހުއްޓެވެ. އެކި ސަރުކާރުތަކުގައި އެ ކުންފުނިން ގޯސްތައް ތަކުރާރުކުރަމުން ދިއުމުގެ ނަތީޖާއަކީ ފެނަކަ ކަރުތާފެނަށް އެޅުމެވެ. އެ މައްސަަލަތައް ފަރުވާއެއް ނުހޯދޭ ނަމަ، ފެނަކަ ސަލާމަތެއް ނުކުރެވޭނެކަން ޔަގީނެވެ.