ސިޔާމާއި ހިލްޓަންގެ މައްސަލަ: ރާއްޖެއިން އިންވެސްޓަރުންނަށް ރަތުގެ އިންޒާރެއް

މޯލްޑިވްސް ޑިވަލޮޕްމަންޓް އެލަޔަންސް (އެމްޑީއޭ)ގެ ލީޑަރު އަހުމަދު ސިޔާމް މުހައްމަދުގެ ނ. އިރުފުށި ރިސޯޓު ހިންގަން ދުނިޔޭގެ ބޮޑު ހޮޓާ ކުންފުނި، ހިލްޓަންއާ އެކު ހަދާފައިވާ އެއްބަސްވުން ބާތިލްކުރުމުން ސިންގަޕޫރުގެ އާބިޓްރޭޝަނުން ހިލްޓަންއަށް ދޭން ޖެހޭ ކަމަށް ނިންމި 24 މިލިއަން ޑޮލަރު ހޯދުމަށް އެ ކުންފުނިން މަސައްކަތްކުރާތާ މިހާރު އަށް އަހަރުވީ އެވެ. މައްސަލަ ހައްލުކުރަން ސަރުކާރުގައި އާދޭސްކޮށް ރާއްޖޭގެ ކޯޓުތަކުގެ ދޮރުގައި ވެސް އެ ބޮޑު ހިލްޓަންއިން ޓަކިޖަހައިފި އެވެ. އިންޓަނޭޝަނަލް ޗެމްބާ އޮފް ކޮމާސް (އައިސީސީ) އާއި ސިންގަޕޫރުގެ މަތީ ކޯޓް، ކޯޓް އޮފް އެޕީލްއިން ވެސް ފަހު ބަސް ބުނެފައި ވިޔަސް، ސަން ޓްރެވަލްސްގެ އަތުން އެންމެ ސެންޓެއް ވެސް ހިލްޓަންއަށް ލިބޭ ގޮތެއް ނުވެ އެވެ. އަދި ލިބޭނޭ ދުވަހެއް ލަފާކޮށްލަން ވެސް ނޭނގެ އެވެ. 

މި މައްސަލަ މިހާ ދިގުލައިގެން ދިއުމުން ޔަގީންވާ އެއް ކަމެއް އެބަ އޮތެވެ. ރާއްޖޭގެ ޓޫރިޒަމް ވިޔަފާރީގައި އިންވެސްޓްކޮށްފައިވާ ދުނިޔޭގެ ބޮޑު ވިޔަފާރިއަކަށް މި ރާއްޖޭގައި އިންސާފު ނުލިބިގެން މި އުޅެނީ އެ މައްސަލައިގެ ވަށައިގެންވާ ބާރުގަދަ ސިޔާސީ ނުފޫޒުތަކާ ހުރެ އެވެ.

އެއީ ރާއްޖޭގައި ތިއްބެވި އެތައް ގާނޫނީ ވަކީލުން ވެސް އެ މައްސަލަ ތަރުޖަމާކުރައްވާ ގޮތެވެ. ސަން ޓްރެވަލްސް ކުންފުނީގެ ވެރިޔާ، ސިޔާމްގެ ބާރާއި ނުފޫޒު މާ ގަދައީ އެވެ. ކޮންމެ ސަރުކާރެއްގައި ވެސް، އެ ފައިސާ ނުދައްކާ ހުންނެވޭނޭ މަގެއް ސިޔާމް ސިޔާސީ ގޮތުން ހޯއްދަވަނީ ހެއްޔެވެ؟

"ސަން ޓްރެވަލްސްގެ ފަރާތުން ހުރި ކޮންސާންތައް ވެސް ބަލާފައި އާބިޓްރޭޝަނުން އަދި ސިންގަޕޫރުގެ ކޯޓް އޮފް އެޕީލްއިން ވެސް ނިމިފައިވާ ސާފު މައްސަލައެއް މިއީ. ރާއްޖޭގެ ގާނޫނުތަކުގައި ވެސް އާބިޓްރޭޝަނުން ނިންމާ މައްސަލަތައް ތަންފީޒު ކުރަން ލާޒިމް ކުރޭ. ދެން މި މައްސަލައިގައި އަޅުގަނޑަށް މި ފެންނަނީ އެކި ނުފޫޒުތަކުން ކޯޓުގެ އެކި މަރުހަލާތައް ބޭނުންކޮގެން ފައިސާ ނުދައްކައި ދިގު ދެންމޭނޭ ގޮތްތަކެއް ހޯދާ ތަން،" ކޯޓުގައި މައްސަލަ ހިނގަމުން ދާތީ ނަން ނުޖަހާ ގޮތަށް ވާހަކަ ދެއްކެވި ގާނޫނީ ވަކީލަކު ވިދާޅުވި އެވެ. 

އަށް އަހަރު ފަހުން، ސިވިލް ކޯޓުން މައްސަލަ ނިމި ހިލްޓަންއަށް ބަދަލުގެ ފައިސާ ލިބި މައްސަލަ ކޮޅެއްގައި ޖެހޭނޭ ކަމުގެ އުންމީދެއް ލިބިފައި ވަނިކޮށް، އަނެއްކާ ވެސް މި މަހުގެ ދެ ވަނަ ދުވަހު ހައިކޯޓުން ނެރުނު ވަގުތީ އަމުރަކުން ފައިސާ ދެއްކުން މި ވަނީ ފަސްކޮށްފަ އެވެ. އާބިޓްރޭޝަންގެ ނިންމުން ތަންފީޒުކުރުމަށް ސިވިލް ކޯޓުން ކުރި ހުކުމް އިސްތިއުނާފު ކުރުމާ އެކު ނެރުނު އެ އަމުރު މި އައީ، ކުރިއަށް އޮތް ރިޔާސީ އިންތިހާބަށް ރައީސް އިބްރާހިމް މުހައްމަދު ސޯލިހާ އެކު މަސައްކަތް ކުރަން ސިޔާމް ނިންމަވައި ސަރުކާރާ އެކު ބައިއަތު ހިފިތާ މަހެއް ވެސް ނުވަނީހެވެ.

"ސަބަބުވެރި އިންސާނެއްގެ ވިސްނުމުން ވިސްނާއިރު ސިޔާސީ ގޮތުން ހަދާ ޑީލެއްގެ ހަދިޔާއޭ މި ލިބެނީ ބުނާނެ ޖާގަ އެބަ އޮތް. ކޯލިޝަން ލީޑަރަކމަށް ކަމެއް ކޮށްދިނުމޭ މިއީ. އެ ނޫން ސަބަބެއް އަޅުގަނޑަކަށް މީގައި ނުފެނޭ،" ކުރިން ވެސް ވާހަކަ ދެއްކެވި ގާނޫނީ ވަކީލު ވިދާޅުވި އެވެ.

ސިޔާމް އަކީ ކުރީގެ ރައީސް އަބްދުﷲ ޔާމީންގެ ސަރުކާރުގައި ވެސް ނުފޫޒު ގަދަ ކޯލިޝަން ޕާޓްނަރު ކަމަށް ވީ އިރު، އާބިޓްރޭޝަންގެ ނިންމުން ތަންފީޒުކުރަން ހިލްޓަންއިން އޭރު ހުށަހެޅި މައްސަލަ އެ ގޮތުގައި ކޯޓުގައި އޮއްވާ، އޭގެ މާ ފަހުން ސަން ޓްރެވަލްސްއިން އެ ކުންފުނީގެ މައްޗަށް ހުށަހެޅި ބަދަލު ހޯދުމުގެ މައްސަލައެއް ކޯޓުން ނިންމައި ހުކުމްތައް އައިސްފައިވެ އެވެ. މިއީ ނުފޫޒެއް ނެތި ހިނގާނޭ ކަމެއް ހެއްޔެވެ؟ އެ ހިސާބުން، މުޅި މައްސަލަ އަނެއްކާވެސް އޮޅުންބޮޅުންވެ، ހިލްޓަންއަށް އެތައް އަހަރެއް ގެންލިގެން ދިޔައީ އެވެ.

ވަކީލު ވިދާޅުވި ގޮތުގައި، އެ މައްސަލައިގައި ސަން ޓްރެވަލްސްއިން ކޯޓްތަކުގެ މަރުހަލާތަކުގެ ތެރެއިން ދިގުދަންމާލައި ތާށިކޮށްލުމުގެ އުކުޅުތައް ބޭނުން ކުރާ ކަމަށް ބުނުމުގެ ޖާގަ އެބަ އޮތެވެ. އޭނާ ވިދާޅުވި ގޮތުގައި، އެ ފުރުސަތު ކޯޓުތަކުން ދީގެން ނުވާނޭކަން ސުޕްރީމް ކޯޓުން މީގެ ކުރިން ނިންމާފައިވާ ނިންމުންތަކުން ސާފުވެ އެވެ.

އެޗްޑީސީއާ ދެކޮޅަށް މީހަކު ކުރި ދައުވާއަކާ ގުޅިގެން 2020 ވަނަ އަހަރު ސުޕްރީމް ކޯޓުން ކުރި ހުކުމެއްގައި ފާހަގަކޮށްފައިވެ އެވެ؛ "އިސްތިއުނާފު ކުރާނޭ ގާނޫނީ ސަބަބެއް ނެތް މައްސަލަތަކުގައި ކަނޑައެޅިގެން ފައިސާ ދައްކަން ޖެހޭ ފަރާތަށް ފައިސާ ދެއްކުން ލަސްކުރުމުގެ ބޭނުމުގައި ނުވަތަ ދަށު ކޯޓުން ކުރަން އަންގާފައިވާ ކަމެއް ނުކޮށް ލަސްކުރުމުގެ ބޭނުމުގައި އެ މައްސަލައެއް ކޯޓުތަކުގެ އިސްތިއުނާފީ މަރުހަލާއަށް ވައްދައިގެން އެ މަރުހަލާގެ ބޭނުން ތައައްސަފީ ގޮތުން [މެނިޕިއުލޭޓްކޮށްގެން] ބޭނުންކޮށް އަނެކުންނަށް ގެއްލުން ކުރުމުގެ ނިޔަތުގައި އެކަން ކުރުން ހުއްޓުވައި އިންސާފުގެ ރާސްތާ ކުރު ކުރުމަކީ ކޯޓްތަކުގެ މައްޗަށް ގާނޫނުން ލާޒިމް ކުރާ" ކަމެކެވެ. 

ސުޕްރީމް ކޯޓުގެ މި ބަހުން ސާފުވާ ކަމަކީ މަދަނީ މައްސަލަތަކުގައި އެކަށީގެންވާ ގާނޫނީ ސަބަބުތައް ނެތި، ހަމައެކަނި މައްސަލައެއް ދިގު ދަންމާލުމުގެ ނިޔަތުގައި އިސްތިއުނާފުކުރުން ބަހަނާއަކަށް ދައްކަން ޖާގަދީގެން ނުވާނޭ ކަމަށެވެ. ސުޕްރީމް ކޯޓުގެ އެ ހުކުމުގައި އިތުރަށް ބުނެފައިވާ ގޮތުގައި، އެކަށީގެންވާ ސަބަބުތަކެއް ދެއްކުމެއް ނެތި، ދަށު ކޯޓެއްގެ ހުކުމް ހަމަ އެކަނި ގޯސް ކަމަށް އިސްތިއުނާފު ކުރާ ފަރާތުން ބުނުމަކީ މައްސަލައެއް މަތީ ކޯޓުތަކުން ބަލައިގަނެ، މައްސަލަ ކުރިއަށް ގެންދަން އޮތް ސަބަބެއް ނޫނެވެ. 

އެހެންވެ، އެ ބުނުމަށް ރިއާޔަތްކޮށް އެހެން ގާނޫނީ ވަކީލަކު ވިދާޅުވި ގޮތުގައި، ފައިސާ ދެއްކުން ލަސްކުރުމުގެ ވަގުތީ އަމުރެއް ހައި ކޯޓުން ނެރުނު ނެރުމަކީ ފައިސާ ނުދައްކަން ސަން ޓްރެލަވްސްއިން އަނެއްކާވެސް ހޯދި މަގެކެވެ. ސަންގެ ވާހަކަތަކުގައި ގާނޫނީ މާ ބޮޑު ބުރަދަނެއް ނެތްކަން އެ ހުރިހާ ކަމަކުން ސާފުވާ ކަމަށް އޭނާ ވިދާޅުވި އެވެ.

"ސިވިލް ކޯޓުން ނިންމި މައްސަލަ އާއި ސުޕްރީމް ކޯޓުން އެ މައްސަލައިގައި ނިންމާފައި ހުރި މައްސަލަތަކުން ވެސް އެ މައްސަލައިގެ ވަރަށް ގިނަ ހަގީގަތްތައް ސާފުވާން ހުއްޓާ، އިސްތިއުނާފުކޮށްފައި އޮތަތީއޭ ކިޔާފައި އަމުރެއް ނެރުމަކީ އަޅުގަނޑު ބުނާނީ އެއީ ހަމަ ސުޕްރީމް ކޯޓުގެ ހުކުމުގައި އެ ބުނާ ކަހަލަ ފައިސާ ނުދައްކާން ވެގެން އިސްތިއުނާފުގެ މަރުހަލާ ނަހަމަ ގޮތުގައި ބޭނުން ކުރުމޭ. ޓެކްސްޓްބުކް އެގްޒާމްޕަލްއެކޭ އެއީ،" ވަކީލަކު ވިދާޅުވި އެވެ.

"ކޯޓުތަކުން އެ ކަމަށް ޖާގަ ދީގެން ނުވާނޭ ކަމަށް އަޅުގަނޑު ދެކެނީ." 

އާބިޓްރޭޝަންގެ ނިންމުމެއް ތަންފީޒު ކުރަން ރާއްޖޭގެ ކޯޓުތަކުގެ ދޮރުގައި ހިލްޓަންއިން ޓަކި ޖަހާލަ ޖަހާލައި އަށް އަހަރު ތިބެން ޖެހުމަކީ ނުފޫޒެއް ނެތިކަން ހިނގާނޭ ގޮތެއް ނޫނެވެ. އެހެން ނޫނީ މިހާ ބޮޑު ވިޔަފާރީގެ މައްސަލައެއް ނުނިމި ދިގުލައިގެން ދާން ޖެހޭ ހަމަ އެއްވެސް ސަބަބެއް ނެތެވެ.

އާބިޓްރޭޝަނުންނާއި ސިންގަޕޫރުގެ އެންމެ މަތީ އެޕީލް ކޯޓުން ނިންމާފައިވާ ގޮތަށް ހިލްޓަންއަށް ފައިސާ ނުދައްކަން ސަން ޓްރެވަލްސްއިން ދައްކާ ސަބަބުތަކެއް ވެސް އެބަ ހުއްޓެވެ.

އާބިޓްރޭޝަންގެ ނިންމުން ތަންފީޒުކުރަން ސިވިލް ކޯޓުން ނެރުނު ހުކުމުގައި ހުރި ކަންތައްތަކުން ފާހަގަވާ ގޮތުގައި، ސަން ޓްރެވަލްސްގެ އެންމެ ބޮޑު ދިފާއަކީ އާބިޓްރޭޝަންގެ ނިންމުމަކީ ރާއްޖޭގެ އާންމު ސިޔާސަތާއި އުސޫލުތަކާ ހިލާފު ނިންމުމެއް ކަމުން، އެކަން ތަންފީޒު ކުރަން ނުޖެހޭނޭ ކަމަށް ބުނާ ބުނުމެވެ.

ނަމަވެސް، ސިވިލް ކޯޓުގެ ގާޒީ ރިޒްމީނާ އިދްރީސް ފެބްރުއަރީ މަހު ހުކުމް ކުރެއްވި ގޮތުގައި، ހޮޓަލް މެނޭޖްމަންޓް އެއްބަސްވުމަކާ ގުޅިގެން ދެ ވިޔަފާރިއެއްގެ ދެމެދުގައި އުފެދޭ މަދަނީ ދެބަސްވުމަކީ ރާއްޖޭގެ އާންމު ސިޔާސަތާ ހިލާފު ކަންކަމެއް ނޫން ކަމަށެވެ. އަދި އެފަދަ އެއްބަސްވުންތަކަކީ ރާއްޖޭގެ ގާނޫނުތަކުން ބަލައިގަންނަ އެއްބަސްވުންތަކެއް ކަމަށް އެ ހުކުމުގައި ކަނޑައަޅާފައިވެ އެވެ. އެފަދަ އެއްބަސްވުންތަކާ ހިލާފުވާ ހާލަތުގައި ގެއްލުންވާ ފަރާތަށް ބަދަލު ނަގައިދިނުމަކީ ރާއްޖޭގެ އާންމު ސިޔާސަތުން ބާރު އަޅާކަމެއްކަން ހުކުމުން ސާފުވެ އެވެ.

މީގެ އިތުރަށް، ސަންއިން ފާހަގަކުރާ ގޮތުގައި، އެއްބަސްވުމުގައި ސޮއިކުރީ ހިލްޓަންއިން މަކަރާއި ހީލަތް ހަދައި އޮޅުވާލައިގެންނެވެ. އެކަމާ ގުޅިގެން ސިވިލް ކޯޓުން ނިންމާފައި ވަނީ ސަން ޓްރެވަލްސްއަކީ ޓޫރިޒަމް ދާއިރާގައި ތަޖުރިބާ ހުރި ކުންފުންޏަކަށް ވާއިރު، އެފަދަ އޮޅުވާލުމެއް އޮޅުވާލެވޭނޭ ކަމަށް ސަބަބުވެރި އިންސާނެއްގެ ވިސްނުމުން ގަބޫލުކުރެވޭނޭ ޖާގައެއް ނެތް ކަމަށެވެ. މީގެ އިތުރުން، ސިންގަޕޫރުގެ އެޕީލް ކޯޓުން ނިންމާފައި ވަނީ، ހުށަހެޅިފައިވާ ހެކިތަކާއި ތަޖުރިބާކާރުންގެ ރައުޔުތަކަށް ބަލާއިރު އެއްބަސްވުން ހެދުމުގައި ހިލްޓަންއިން ހަދާފައިވާ އަންދާޒާތަކަކީ އޮޅުވާލުމެއް ނޫން ކަމަށާއި އެއީ ބަލައިގަނެވޭނޭ ކަންތައްތަކެއް ކަމަށެވެ. 

ހިލްޓަންއިން ސަން ޓްރެވަލްސްއަށް ބަދަލު ދޭން ޖެހޭ މައްސަލައިގައި ސުޕްރީމް ކޯޓުން ކުރި ހުކުމުން ވެސް މި މައްސަލައިގެ ދެ ކަމެއް ސާފުވެ އެވެ. އެއީ:

ހިލްޓަން އާއި ސަން ޓްރެވަލްސްއާ ދެމެދު އުފެދުނު މައްސަލަތަކާ ގުޅިގެން ސިވިލް ކޯޓާއި، ހައިކޯޓާއި އަދި ސުޕްރީމް ކޯޓުންކޮށްފައިވާ ހުކުމްތަކުން ދައްކައިދޭ ބޮޑު މަންޒަރަކީ ސަން ޓްރެވަލްސްއިން އާބިޓްރޭޝަންގެ ނިންމުމަށް އިހުތިރާމްކޮށް ބަދަލު ދޭން ޖެހޭ ކަމެވެ. އަދި ސަން ޓްރެވަލްސްގެ ވާހަކަތަކުގައި މާ ބޮޑު ގާނޫނީ ބުރަދަނެއް ނެތް ކަމެވެ. ބޭރުގެ އިންވެސްޓަރުންނާ އެކު ހަދާފައި ހުންނަ އެއްބަސްވުންތަކުން ހޯދައިދޭ ރައްކާތެރިކަން ކޯޓުތަކުން އެ ފަރާތްތަކަށް ހޯދައިދޭން ޖެހޭކަން ވެސް ހުކުމްތަކުން ކަށަވަރުކޮށްދެ އެވެ.

އެކަމަކު، މި މައްސަލަ މިހާތަނަށް ހިނގަމުން އަންނަ ގޮތުން މި ފެންނަނީ އެ މަންޒަރެއް ނޫނެވެ. ސަން ޓްރެވަލްސްގެ ވެރިޔާގެ ނުފޫޒާއި ބާރުގައި ބޮޑު އިންވެސްޓަރަކު ރާއްޖޭގައި ގޮތް ހުސްވެފައިވާ ކަމެވެ. ނަން ނުޖަހާ ގޮތަށް ރާއްޖޭގެ ވިޔަފާރިވެރިއަކު ވިދާޅުވި ގޮތުގައި، ހިލްޓަންއާ މެދު އަމަލު ކުރެވޭ ގޮތުން ރާއްޖެއިން މި ދެނީ އިންވެސްޓަރުންނަށް ރާއްޖޭގައި ރައްކާތެރިކަން ނެތް ކަމުގެ މެސެޖެކެވެ. މިއީ ރާއްޖެ އަންނަން ތިބި އިންވެސްޓަރުން ވިސްނާނޭ ކަމެއްގެ ގޮތުގައި އޭނާ ފާހަގަކުރެއްވި އެވެ.

"ވިސްނާލާ މިއީ ހިލްޓަންގެ ވާހަކަ މިދައްކަނީ. އެމެރިކާގެ ބޮޑު ނުފޫޒު ގަދަ ކުންފުންޏެއް. ދެން އެހެން ކުދި އިންވެސްޓަރުންނަށް މިސާލަކަށް ވާނެ ގޮތް ވިސްނާލައްވާ. މި ރާއްޖޭގައި އެބަ އޮތްތަ އިންވެސްޓަރުންނަށް ރައްކާތެރިކަމެއް،" އޭނާ ސުވާލު އުފެއްދެވި އެވެ.

މީގެ ކުރިން ހިލްޓަންއިން ވެސް އެކި ފަހަރު ސަރުކާރުގެ ވެރިންނާ ވެސް ބައްދަލުކޮށް މައްސަލައަށް ހައްލު ހޯދުމުގެ މުހިންމުކަން ފާހަގަ ކޮށްފައިވެ އެވެ. ލިޔުމުން ވެސް އެ ވާހަކަ ބުނެފައިވެ އެވެ. އަދި އެމެރިކާ ސަރުކާރުން ވެސް އެކަމާ ރާއްޖެއާ އެކި ފަހަރު އެކި ގޮތަށް ވާހަކަ ދެއްކިކަން ކަށަވަރުވެފައިވެ އެވެ. އެކަމަކު، އެކަމުން ވެސް ނަތީޖާއެއް ނުފެނުނެވެ. 

ޔާމީންގެ ސަރުކާރުގައި 2015ގައި ހިލްޓަންގެ އެގްޒެކެޓިވް ވައިސް ޕްރެޒިޑެންޓް އަދި އެ ކުންފުނީގެ އޭޝިއާ ޕެސިފިކް ސަރަހައްދުގެ ޕްރެޒިޑެންޓް މާޓިން ރިންކް ދިވެހި ސަރުކާރުގައި އެ މައްސަލަ ހައްލުކޮށްދޭން އެދި ފޮނުއްވި ސިޓީއެއް އާންމުވެފައިވެ އެވެ. އެ ސިޓީގައި ވެސް އޭނާ ވިދާޅުވެފައިވެ އެވެ؛ "ރާއްޖޭގެ ޓޫރިޒަމް އިންޑަސްޓްރީއަށް އޮތް އިތުބާރު ދަމަހައްޓައި ގެއްލުމެއް ކުރިމަތިވިޔަ ނުދިނުމަށް ހިލްޓަން އާއި ސަން ޓްރެވަލްސްގެ ފައިސާގެ މައްސަލަ ވީ އެންމެ އަވަހަކަށް ހައްލުކުރުމަކީ ދެ ފަރާތަށް ވެސް އެންމެ ފައިދާ ބޮޑު ގޮތް" ކަމަށެވެ.

ނަމަވެސް، ރާއްޖޭގެ ސިޔާސީ މީހުންނަށް މުހިންމުވަނީ އެ މީހުންގެ އަމިއްލަ އެދުމެވެ. އިންވެސްޓަރުންގެ އިތުބާރެއް އެ މީހުންނަށް މުހިންމުވާ ތަނެއް ނުފެނެ އެވެ. މިހާރުގެ ސަރުކާރަށް ވެސް މުހިންމު ވަނީ ސަން ޓްރެވަލްސްގެ ވެރިޔާ ރުއްސައިގެން ދެ ވަނަ ދައުރެއް ހޯދުން ކަމަށް ވެދާނެ އެވެ. އެކަމަކު، މުޅި ގައުމުގެ މަސްލަހަތު އޮތީ އެ ގޮތަކަށް ނޫނެވެ. ސަން ޓްރެވަލްސްގެ މައްސަލައަކީ، ރާއްޖެއާ މެދު އޮންނަ އިންވެސްޓަރުންގެ އިތުބާރު ދަމަހައްޓަން އަވަހަށް ނިމުމެއް އަންނަން ޖެހޭ މައްސަލަ އެކެވެ.

އެކަމަކު ސުވާލަކީ؛ ރާއްޖޭގެ ސިޔާސީ މީހުންގެ އެ އިހުލާސްތެރިކަން އަދި އެ ކެރުންތެރިކަން އެބަ ހުރި ހެއްޔެވެ؟