ރޯދަވީއްލަން މާލެއިން މާފުއްޓަށް

މޫދު ކައިރީގައި ބަރިބަރިއަށް އަތުރާފައި ހުރި މޭޒުތައް ތައްޔާރުކޮށްފައި ވަނީ 'ބޮޑު ސުފުރާއަކަށް' ކަން، އެވަގުތު އެ ހިސާބުގެ މޫދަށް އެރި ތިބި ޓޫރިސްޓުންނަށާއި ހަވީރު ފިންޏަށް ނުކުމެ އުޅުނު ޓޫރިސްޓުންނަށް ވެސް އެނގެ އެވެ.

ބައެއް ޓޫރިސްޓުން އިށީދެގެން ބަލަން ތިއްބެވެ.

ގެސްޓްހައުސްތަކުން ފުރިފައި އޮތް ރަށަކަށް ވާތީ، ހަވީރުގެ އެ ގަޑީގައި، އެތައް ބަޔަކު ކޮޅުކޮޅަށް ހިނގަމުން، ބަގީތަކުގައި ދުއްވަމުން ދެ އެވެ.

މިދިއަ ހޮނިހިރުދުވަހު މާފުއްޓަށް ޒިޔާރަތްކުރި ދިވެހިންގެ ގިނަ ބަޔަކު ގެސްޓްހައުސްގެ 'ވެރިރަށަށް' ދަތުރުކުރީ ރޯދަވީއްލާށެވެ. މާލޭގެ ތޮއްޖެހުމުން ބޭރުވެލައި، ހިތްހަމަޖައްސާލަން ހުޅުވިފައި އޮތް ފުރުސަތުގެ ބޭނުންހިފީ އެވެ. މޫސުން ރީތި ދުވަސްކޮޅަކަށް ވާތީ ލޯންޗުގެ އެ ދަތުރަށް ނެގީ ގާތްގަނޑަކަށް 25 މިނިޓެވެ.

މި ރަށަށް ނައިސް އަހަރެއް ނުވަތަ ދެ އަހަރެއް ވެއްޖެ ނަމަ ދެން ފެންނާނީ ބޮޑެތި ބަދަލުތަކެވެ. އެހާވެސް އަވަހަށް މިރަށުގެ މަލަމައްޗާއި ރަށު ތެރޭގެ މަންޒަރުތައް ބަދަލުވެ އެވެ. އަލަށް މި ރަށަށް އަންނަ ދިވެއްސަކަށް ފެންނާނީ ގެސްޓްހައުސްގެ ވިޔަފާރި ފުޅާވަމުން އަންނަ ގޮތުގެ މިސާލުތަކެވެ.

މާފުށީގެ ގެސްޓްހައުސްތައް ފުރަތަމަ ހަދަމުން އައީ ބަނދަރު ވެސް އޮންނަ ހުޅަނގު ފަރާތުގަ އެވެ. ރަށުގެ އެއްކޮޅުން އަނެއް ކޮޅަށް ގެސްޓްހައުސްތަކާއި ރެސްޓޯރެންޓްތަކާއި ޓޫރިސްޓުންނަށް ބޭނުންވާ އެހެން ހިދުމަތްތަކުން މިހާރު މި އޮތީ ފުރިފަ އެވެ.

މިދިއަ 15 އަހަރުގެ ތެރޭގައި މި ރަށުގެ މުޅި މަލަމަތި، މުސްކުޅި ފުރާޅުތަކެއްގެ ތިރި ގެތަކެއްގެ ބަދަލުގައި ޒަމާނީ ފަރުމާކުރުންތަކާ އެކު އުސް އިމާރާތްތަކަށް ބަދަލުވެއްޖެ އެވެ.

އެކަމަކު އެންމެ ފުރަތަމަ ގެސްޓްހައުސް ވިޔަފާރި ފެށި ދުވަސްވަރުގެ ބައެއް ގެސްޓްހައުސްތައް އަދިވެސް އެބަ ހުއްޓެވެ. ދެ ބުރި ތިން ބުރީގެ ތަންތަނެވެ. ނަމަވެސް އަވަސް ކުރިމަގެއްގައި އުސް ސިޓީ ހޮޓާތަކަށް ބަދަލުވުން ކައިރި އެވެ.

މިއީ ހަނގުރާމައިގެ ދުވަސްވަރެކެވެ. ރާއްޖެއަށް އެންމެ ގިނަ ޓޫރިސްޓުން އަންނަ  މެދުއިރުމަތީގެ ވައިގެ ދަތުރުފަތުރު ވަނީ ހުއްޓިފަ އެވެ. އެހެންކަމުން ޓޫރިސްޓުންގެ އަދަދު މަދެވެ. އެކަމަކު މާފުށީގައި އަދިވެސް ފުދޭވަރަކަށް ޓޫރިސްޓުން އުޅޭކަން، މަގުމަތީގެ ހަރަކާތްތަކުން އެނގެ އެވެ.

މިދިއަ ހޮނިހިރުދުވަހު މިރަށަށް މާލެއިން ރޯދަވީއްލަން އައި ބައެއް މީހުން ބުނި ގޮތުގައި މިއީ އެމީހުންނަށް ވަރަށް ތަފާތު ދަތުރެކެވެ. ހަވީރު ފަހެއް ޖެހިއިރު މާލެއިން ފުރައިގެން އައިސް ރޭގަނޑު 9 ނުވަތަ 11ގެ ފެރީގައި އަނބުރާ މާލެ ދެވުމަކީ، ހިތްހަމަޖައްސާލަން ލިބުނު ވަގުތުކޮޅެއް ކަމަށް ބުންޏެވެ.

ބައެއް މީހުން ރަށުތެރޭގައި ވެސް ހިނގާލައި، ފޮޓޯ ނަގާ ހެދި އެވެ. މުޅި ރަށަށް އައިސްފައި އޮތް ބަދަލަކީ ކޮބައިތޯ ބަލައިލި އެވެ. މާފުށީގެ މަލަމަތިން ކަށަވަރުވާނީ ޓޫރިޒަމްގެ ތަަރައްގީގެ ކުލަވަރު ގަދަވެފައި ރަށުވަންތަކަން ނެތްކަމެވެ. ނަމަވެސް ރަށުތެރެއަށް ޖެހިލާއިރު އަދިވެސް  ރަށަކުން ފެންނާނެ ސާދާކަން ނެތިނުދެ އެވެ. ކުރީގެ ގެތައް ހަމަ އެގޮތަށެވެ. އެކި ވައްތަރުގެ ގަސްތަކުން ފާރު ފުރިފަ އެވެ.

ބަނދަރުމަތީ މަގުގައި އެއްކޮޅުން އަނެއްކޮޅަށް ދަމާލާފައި ހުރީ ޓޫރިސްޓުންގެ ހިދުމަތަށް ހާއްސަ ތަންތަނެވެ. އޭގެ ތެރޭގައި ރާއްޖެއިން ލިބެން ހުރި ގުދުރަތީ ބާވަތްތަކާއި ދުނިޔޭގެ މަޝްހޫރު އައިސްކްރިމްގެ އުފެއްދުންތަކަށް ހާއްސަ އައުޓްލެޓްތައް ހިމެނެ އެވެ.

ކުރުނބަލެވެ. އެކި ވައްތަރުގެ ދޮންކޭލެވެ. ކަށިކެޔޮ ވެސް މެ އެވެ. ދެން ބާސްކިން ރޮބިންސްގެ ރަހައަކަށް 'ކަރުހިއްކާ' ނަމަ އެކަން ވެސް ފުރިހަމަކޮށްލެވޭ ވަރަށް މި ރަށުގައި ފުރުސަތުތައް އެ ހުރީ ހުޅުވިފަ އެވެ.

ރޯދަވީއްލުމުގެ ދަތުރުގެ ބައެއް ބަައިވެރިން ހަވީރުގެ އެންމެ ފަހު ވަގުތުކޮޅު ހޭދަކުރީ މި ތޮށިގަނޑު މަތީގަ އެވެ. އިރުވައި މޫސުމުގައި ރާއްޖޭގެ ޖައްވު ފޮރުވާލި ދުންގަނޑުގެ އަސަރުތައް ހުރި ދުވަހަކަށް ވާތީ އިރުއޮއްސޭ މަންޒަރު އެހާ ހިތްގައިމެއް ނޫނެވެ. އެކަމަކު މޫދު ކައިރީގައި، އެ ހިމޭން ވަގުތުކޮޅު މަޑުކޮށްލުމަކީ އުފަލެއްކަން ޔަގީނެވެ.

ބައެއް މީހުން ވިސްނީ ހަމައެކަނި ރޯދަވީއްލުުގެ ސުފުރާ މައްޗަކަށް ނޫނެވެ. ދަތުރުގައި ހޭދަކުރި ހަތަރު ފަސްގަޑިއިރުގެ ތަޖުރިބާ އެވެ. އާއެނކެވެ. މާލެއިން ބޭރުވެލަން ރަނގަޅު ގޮތެކެވެ. އުފާވެރި ވަގުތުކޮޅެކެވެ.