ހުޅުމާލެ ރަން: ހެނދުނެއްގެ ފުރިހަމަ ދުވެލުމެއް

އިއްޔެއަކީ ރީތި ދުވަހެކެވެ. ފުރިހަމަ ހެނދުނެކެވެ. ގަޑިން ހައެއް ޖެހުމާ އެކު ހުޅުމާލެ ސެންޓްރަލް ޕާކްގެ މެދުން ކަހަލަ ގޮތަކަށް ރޭސް ފެށި އެވެ. 'ހުޅުމާލެ ރަން'ގެ ދެވަނަ ރޭހެވެ. އެލީޓް ރަނާސް މޯލްޑިވްސް އާއި އެޗުޑީސީ ގުޅިގެން ދުވުންތެރިންނަށް، ހުކުރުދުވަހެއްގެ ހެނދުނު، ހޯދައިދިން ރަނގަޅު ފުރުސަތެކެވެ.

މިއީ ހަމައެކަނި ރާއްޖޭގެ ދިގު ދުވުމުގެ ބާރު ދުވުންތެރިންނަށް ހާއްސަ ރޭހެއް ނޫނެވެ. ހުރިހާ އުމުރެއްގެ، ކޮންމެ ޖިންސަކަށް ވެސް ދުވުމުގެ ފެންވަރު ވަޒަންކޮށްލެވޭނެ ރޭހެކެވެ. އެހެންކަމުން ރާއްޖޭގެ އެންމެ މޮޅު ގިނަ ދުވުންތެރިންނާ އެކު އެކި އުމުރު ފުރައިގެ އެކި ފެންވަރުގެ ދުވުންތެރިން މި ރޭހުން ވެސް ފެނުނެވެ.

އެލީޓް ރަނާސްއިން ބުނި ގޮތުގައި ވީހާވެސް ގިނަ ބަޔަކަށް ފުރުސަތު ދިނުމަކީ ރޭހުގެ އެންމެ ބޮޑު މަގުސަދެވެ. ދުވާ މީހުން ގިނަވަމުން އަންނަ އިރު އެ އެންމެންނަށް ވެސް މިކަހަލަ ރޭހެއްގައި ވާދަކޮށްލުމުގެ ހިތްހަމަޖެހުން ލިބޭނެ ކަމަށް ވެސް، އިންތިޒާމްކުރި ފަރާތުން ބުންޏެވެ.

ރޭސް ބަހާލާފައި އޮތީ 10 ކިލޯމީޓަރާއި 5 ކިލޯމީޓަރާއި 1 މެއިލްގެ ބައިތަކަށެވެ. އޭގެ އިތުރުން 10 ކިލޯމީޓަރުގައި 41 އަހަރުން މަތީގެ ވަކި ބައެއް މާސްޓާ ކެޓެގަރީއަށް ހާއްސަކޮށް، 5 ކިލޯމީޓަރުގައި 7-17 އަހަރާ ދެމެދުގެ ކުދިންގެ ތެރެއިން ވެސް ވަނަ ހޮވި އެވެ.

ރޭހުގެ މިއިން ކޮންމެ ބަޔަކުން ވެސް ދެ ޖިންސްގެ ދުވުންތެރިންނަށް ފައިސާގެ އިނާމު ދިނެވެ. ފައިސާގެ އެންމެ ބޮޑު އިނާމެއް ހުށައެޅީ 10ކިލޯމީޓަރުގެ އޯޕަން އަށެވެ.

ދުވުމުގެ ޝައުގުވެރިކަން ބޮޑުވުމުގެ މާނައަކީ ރަނގަޅު ފެންވަރުގެ ދުވުންތެރިން ވެސް އުފެދުމެވެ. އެކަން އެނގެނީ އެކި އުމުރުތަކުގެ ދުވުންތެރިން ކުރިއާ އަޅާބަލާއިރު ވަގުތު އަވަސްވުމެވެ. މިސާލަކަށް އުމުރުން ތަންކޮޅެއް ދުވަސް ވީ ދުވުންތެރިން ވެސް، ކުރިން ނުފެންނަހާ ބާރަށް ދުވެ، ވަގުތު އަވަސްކުރެ އެވެ. އެކަން ހުޅުމާލެ ރަންގެ 41 އަހަރުން މަތީގެ ބައިގެ ދެ ޖިންސުން ވެސް ފެނުނެވެ.

ރޭހުގެ ކުރިން އެލީޓް ރަނާސްއިން ބުނި ގޮތުގައި 41 އަހަރުން މަތީގެ މާސްޓާ ބައެއް ހިމެނީ އުމުރުން ދޮށީ އެތައް ބަޔަކު ވެސް ދުވުމުގެ ތެރެއަށް ވަދެ ވާދަވެރި ރޭސްތަކުގައި ބައިވެރިވުން ގިނަވާތީ އެވެ. ސީރިއަސް ކަމެއްގެ ގޮތުގައި ދުވުން ނަގަމުން އަންނަނީ ވެސް ގިނައިން 35 އަހަރުން މަތީގެ މީހުންނެވެ.

ހުޅުމާލެ ރަންގެ 10 ކިލޯމީޓަރާއި 5 ކިލޯމީޓަރުގެ ރޭސް ފެށީ ހެނދުނު 6:00ގަ އެވެ. ދެ ޖިންސްގެ އެތައް ސަތޭކަ ބަޔަކު، ހެނދުނުގެ އިރާ އެކު އެ މީހުންގެ ދުވުމުގެ ފެންވަރު، ހަށިގަނޑުގައި ބުންވަރު ހުރި މިންވަރު، ދުވުމުގެ ބާރުކަން ދައްކާލި އެވެ. އާއިލާތައް އެކުގައި ދުވި އެވެ. ތުއްތު ދަރިން އުރާލައިގެން ވެސް ބައެއް މީހުން ދުވެލި އެވެ.

ހުޅުމާލެ ސެންޓްރަލް ޕާކަކީ ދިގު ދުވުންތަކުގެ ފެށުމާއި ނިންމުން އޮންނަ ތަނެވެ. އަހަރަކު އެތައް ރޭހެއް، އެކި ފަރާތްތަކުން ގެންދަނީ ބާއްވަމުންނެވެ. އެލީޓް ރަނާސްގެ މި ރޭހުގެ އިންތިޒާމްތަކާ މެދު ބައެއް ދުވުންތެރިން ވަނީ ތައުރީފްކޮށްފަ އެވެ.

ރޭސްތަކުގައި ރަހުމަތްތެރި ގްރޫޕްތައް ވެސް ބައިވެރިވެ އެވެ. އެ ގްރޫޕްތައް ދުވަނީ ވެސް އެކުއެކުގަ އެވެ. މެޑެލްއާ އެކު ފޮޓޯ ނެގުމަކީ މުހިންމު ހަނދާނެކެވެ. ސޯޝަލް މީޑިއާގެ ޒަމާނުގައި އެ ފޮޓޯތަކުން އެހެން ރަހުމަތްތެރިންނާ ގުޅުވާލަދެ އެވެ.

އެލީޓް ރަނާސްގެ އެއް ބާނީ އަދި ދިގު ދުވުންތެރިޔާ އަހުމަދު ޝަރަފް، ހުޅުމާލެ ރަންއަށް ފަހު ކުރި ފޭސްބުކް ޕޯސްޓެއްގައި ބުނީ ކޮންމެ ކަމެއްގެ ފަހަތުގައި ވެސް ކާމިޔާބު ޓީމެއް އޮންނަ ކަމަށެވެ. އޭނާ އެގޮތަށް ލިއުނީ ހުޅުމާލެ ރަންގެ އިންތިޒާމްތަކާއި ހިންގުމުގައި ބައިވެރިވި ގިނަ ބަޔަކާ އެކު ނެގި ގްރޫޕް ފޮޓޯއެއް ހިއްސާކުރަމުންނެވެ.

މިރޭހަށް އެޗުޑީސީގެ ފަރާތުން ލިބުނު އެހީތެރިކަން އޭނާ ހާއްސަ ގޮތެއްގައި ފާހަގަކުރި އެވެ.