ސެންޓްރަލް ޕާކަށް ޖަމާކޮށްލީ 'ފުޑް ލަވާސް'

ހުޅުމާލޭ ސެންޓްރަލް ޕާކުގައި އޮތް މޯލްޑިވްސް ފުޑް އެންޑް ބެވެރޭޖް ޝޯ ރޭ މިވަނީ ނިމިފަ އެވެ. ސެންޓްރަލް ޕާކުގައި ޖަހާފައި ހުރި ހުދު ކުލައިގެ ބޮޑު ޓެންޓް ތެރެއަށް، އިއްޔެ ހަވީރު އާންމުން ޖަމާވެ، ފުރެމުން ދިޔަ އެވެ. 

މުޅި އެގްޒިބިޝަނުގައި ހެން އޮތީ ކެއުމާއި ބުއިމުގެ އެތައް އެއްޗެއްގެ ރަހަ ދެއްކުމެވެ. ރާއްޖެ އެތެރެކުރާ ބޭރުގެ އުފެއްދުންތަކާއި ދިވެހިންގެ އަމިއްލަ އުފެއްދުންތަކުގެ މައުލޫމާތު އާންމުންނަށް ފޯރުކޮށްދިނުމުގައި އިސްކޮށް އުޅުނީ ޒުވާނުންނެވެ.

މިތަނުން ބައްދަލުވީ ކެރޭ ޒުވާނުންނާ އެވެ. އެމީހުންގެ އުފެއްދުންތައް ދައްކާ އޭގެ ފައިދާ ވެސް ކިޔައިދެ އެވެ. ރަހަ ކަމުދޭތޯ އަހަ އެވެ. އެ އުފެއްދުންތައް ގަންނަން ލިބެން ހުންނާނެ ތަންތަން ކިޔައިދިނެވެ.

ބައެއް ސްޓޯލްތައް ކައިރިއަށް ކުޑަކުދިން އެއްވަނީ ހިލޭ އިނާމް ހޯދުމަށެވެ. އެހެންކަމުން އެކުދިން މޫނުމަތިން ފެންނަނީ އުފާވެރި ކަމެކެވެ.

އިސާހިތަކު މީހުންތަކުން ފުރިބާރުވެއްޖެ އެވެ. ޓެންޓް ތެރޭގައި ސްޓޯލްތައް ހަދާފައި ހުރީ ދެ ފަރާތުގަ އާއި މެދުގަ އެވެ. ހަނިހަނި ދެ މަގު، ދެ ފަރާތުގައި ހިނގަން އޮތެވެ. އެކަމަކު ވަކި ކޮޅަކަށް ގުޑާލެވެނީ އުނދަގުލުންނެވެ.

ބޭރުގެ އުފެއްދުންތައް އެތެރެކުރާ ރާއްޖޭގެ މައި އެތައް ކުންފުންޏަކުން މި އެގްޒެބިޝަންގައި ބައިވެރިވި އެވެ. ރާއްޖެ ގެންނަ ބައެއް ބްރޭންޑްތަކުގެ އާ އުފެއްދުންތައް ދެއްކި އެވެ. ކޮފީ އާއި ސައި ފަދަ ބަވަތްތަކުގެ ރަހަ ބަލަން އާންމުން ސަމާލުކަން ދިނެވެ.

ކުރިއަށްް އޮތީ ރޯދަމަސް ކަމުން ގިނަ ބަޔަކަށް އެގްޒިބިޝަން ކަމުދާނެ އެވެ. ރޯދަމަހުގެ ސުފުރާމަތި ފަޅުފިލުވާލަން ތައްޔާރުކުރާނެ އެއްޗިއްސަށް ބޭނުންވާ އެތައް ރަހައެެއްގެ އަޖުމަބެލުނެވެ.

އާ އެތައް ބްރޭންޑެކެވެ. ދިވެހިންގެ އަމިއްލަ އުފެއްދުންތަކެވެ. މިސާލަކަށް 'ސޯސްޑް އަޕް ބައި ލޫސީސް' އެވެ. އޭގެ ދެ ޕާޓްނަރުން ވަގުތުން ކައްކާ ތަން ފެނުނެވެ.

އޯކިޑު މަގުގައި ހިންގާ މި ކެފޭގެ ދެ ޕާޓްނަރުންނަކީ ދެ ދެމަފިރިންނެވެ. އަރުފާއު ޝަހީރު އާއި އައިމިނަތު ރަނާ އަދި އަލީ ރަޒާން އާއި އިފާޒާ ވަހީދު އެވެ. ކެފޭ ހިންގާތާ މިވީ އަހަރެއްހާ ދުވަސް ވެއްޖެ އެވެ. 

އެމީހުން ދެކޭ ގޮތުގައި އާންމުންނާ ގުޅުން އުފައްދާށާއި ބްރޭންޑް ތައާރަފުކުރަން މިފަދަ ހަރަކާތްތަކުގައި ބައިވެރިވުން މުހިންމެވެ. 

އިންސްޓަގްރާމްގައި ހިންގާ ކުޑަ ވިޔަފާރިއެއްގެ ބައިވެރިން ވެސް ތިބީ މޭޒެއް ނަގައިގެންނެވެ. ފޮނި ބާވަތްތައް ވިއްކާ ޑެސާޓްބުޓީކް.އެމްވީ ޕޭޖް މެދުވެރިކޮށް ގިނަ ބާވަތްތަކެއް އެ މީހުން ވިއްކަ އެވެ.

ކަނަމަދު ކޭކު، ބްރައުނީ، ސިނަމަން ރޯލް، ނަޓެއްލާ ރޯލް އަދި ކުކީސް ފަދަ ބާވަތްތަކެވެ. 

ޓެންޓްގެ އެއްކޮޅުން ވަދެ އަނެއް ކޮޅުން ނުކުތް އިރު ބޭރުގައި ވެސް ދެ ސްޓޯލެއް ހުއްޓެވެ. ކުދިކުދި ކެއުންތައް ވިއްކަމުން ދިޔަ އެވެ.

ބޭކް އެންޑް ޑެލިކެސީ ޝޯއެއް އެއް ޓެންޓްގައި ކުރިޔަށް ދިޔަ އެވެ. ކޭކު އެޅުމުގެ ހުނަރުވެރި ދިވެހިން އެ މީހުންގެ މަސައްކަތް ކިޔައިދެނީ އެވެ.

މުބާރާތެއްގެ ގޮތަށް ފަސް ބައިވެރިޔަކު އެތަނުގައި އެޅި ކޭކްތައް ފަރިތަަކަމާ އެކު ޒީނަތްތެރިކުރަމުން ދަނީ އެވެ.

ދިވެހި ކުޅަދާނަ ޝެފް މަހާ ނަސީރު ހުއްޓެވެ. މަހާގެ އިތުރުން، ވޯލްޑް ޝެފްގެ އިތުރު ތިން ފަނޑިޔާރަކު ވެސް ގެންދިޔައީ ކޭކް ޒީނަތްތެރިކުރާ ބައިވެރިންގެ މަސައްކަތްތަކަށް އިންސާފުކުރަމުންނެވެ. ފަނޑިޔާރުންނަށް ތިބީ މުޅިން ވެސް ދިވެހިންނެވެ. ދިވެހި ހުނަރެވެ. އެ އެންމެންގެ ތަފުސީލަކަށް ދާ ނަމަ އެއީ؛

މަހާ ބުނިގޮތުގައި ފަސް ބައިވެރިންގެ ކޮންމެ މީހަކަށް ވެސް ކޭކު ޒީނަތްތެރިކުރަން ލިބޭނީ ދޮޅުގަޑިއިރެވެ.

މި ބައިގައި ތައްޔާރުކޮށްފައި ހުރި އެތައް ބައިވަރު އެއްޗެހި ދައްކަން ބަހައްޓާފައި ހުއްޓެވެ. އެހެންކަމުން އާންމުންނަށް ދިވެހިންގެ ހުނަރު ތަޖުރިބާކޮށްލަން ރަނގަޅު ފުރުސަތެއް ލިބުނެވެ.

މިކަހަލަ ޝޯތަކަކީ އަހަރެމެން 'ފުޑް ލަވާއިން' އެއް ތަނަކަށް އެއްކޮށްލާ ތަފާތު ރަހަތައް ޓެސްޓުކޮށްލަން އޮތް ވަރަށް ބޮޑު ފުރުސަތެކެވެ. އާ ބްރޭންޑްތައް ދަސްކޮށްލެވެ އެވެ. ދިވެހި ހުނަރުވެރިންނާ ބައްދަލުކޮށްލެވެ އެވެ.

ރޭ އެ ނިމުނީ އެފަދަ ބޮޑު ޝޯއެކެވެ.