މި ގައުމަށް ބޭނުންވަނީ މި ކަހަލަ ޒުވާނުން

ޒުވާނާ ހުރީ ދެ އަތަށް އަންގި ލައްވައިގެންނެވެ. އެއް އަތުގައި ވަނީ އެކި ވައްތަރުގެ ފުޅިތަކެއް ހުރި ދަބަހެކެވެ. އަނެއް އަތުގައި ފެން ޖަހަން ބޭނުންކުރާ ސާމާނެވެ. ބުރަ މަސައްކަތެއް ނިންމާފައި އައިކަން ޔަގީނެވެ. މީހާ ދާހިއްލާ ފޯވެފަ އެވެ.

އެގޮތަށް ހުއްޓާ ލިފްޓުން ދެ ތިން ދުވަހު ދިމާވުމާ އެކު އަހާލީމެވެ. ތިޔަ އަންނަނީ ކޮން ކަމެއް ކޮށްފައި ހެއްޔެވެ؟ އޭނާ ބުނެލީ ކާރެއް ސާފުކޮށްފައި ކަމަށެވެ.

އަޅުގަނޑު އުޅޭ އިމާރާތުގެ ގޮތުން އެ އުމުރުގެ ޒުވާނަކު ނިސްބަތްވާނީ ފުދުންތެރި އާއިލާއަކަށް ކަން ޔަގީނެވެ. އެހެންކަމުން އެކަހަލަ ޒުވާނަކު ވެހިކަލް ސާފުކުރުން ކަހަލަ މަސައްކަތެއްގައި އުޅޭތީ ކުޑަކޮށް ހައިރާން ވެސް ވި އެވެ. އެކަމަކު ހިތަށްއެރީ ގޭގައި ނިދަން ނޯވެ، ކަމެއް ނުކޮށް އުމުރުގެ ވަގުތުތަކެއް ހޭދަކުރުމުގެ ބަދަލުގައި، މިއީ ވެސް ރަނގަޅު ފެށުމެއްތާ އެވެ.

މަލީހު މުހައްމަދުގެ ތައާރަފެއް ހޯދީ އޭގެ ފަހުންނެވެ. އޭނާއަކީ ތިން ބެއިން ހިމެނޭ އާއިލާއެއްގެ ދެވަނަ މެމްބަރެވެ. ހުޅުމާލޭގައި ހުންނަ ބްރައިޓްވޭ އިންޓަނޭޝަނަލް ސްކޫލުން އޯ ލެވެލް ނިންމައި، އޭ ލެވެލް ހެދީ ސީއެޗުއެސްއީގަ އެވެ. އޭ ލެވެލްގެ ގަދަ 10ގައި ވެސް ހިމެނުނެވެ. ރަނގަޅު ބައްޓަމެއްގައި ހަށިގަނޑު ބަހައްޓަން ގަވާއިދުން ޖިމްއަށް ދެ އެވެ. އެއްވެސް ނަމާދެއް ވައްޓައެއް ނުލަ އެވެ. މިސްކިތަކީ އޭނާގެ ކޮންމެ ދުވަހެއް ވެސް މަންޒިލެވެ.

އުމުރުން 21 އަހަރުގެ މި ޒުވާނާގެ ކިބައިން ފެންނަނީ އަޅުގަނޑުމެން މި ބޭނުންވާ ޒުވާނެއްގެ ސިފަތަކެވެ. ހާއްސަކޮށް މަސައްކަތާ ދުރުވަމުން ދާ ޒުވާން ޖީލެއް އުފެދިފައި އޮތް ރާއްޖޭގައި މިކަހަލަ ހީވާގި ޒުވާނުން ފެންނަ ނަމަ، ހަރު މީހުންގެ ހިތަށް ހިތްހަމަޖެހުން ލިބޭނެ އެވެ.

ސްކޫލް ނިމުނު އިރު ކުރިއަށް ދާނެ ރޮނގެއް ހިތުގައި އޮތެވެ: ޕައިލެޓަކަށް ވުމެވެ. އެ ނިޔަތުގައި ޓީއެމްއޭގެ ކެބިން ކުރޫއެއްގެ ވަޒީފާއަށް ވެސް ވަނެވެ. ނުވަ މަހެއްހާ ދުވަހު އެކަމުގައި އުޅުނެވެ. ނަމަވެސް އެ ތަޖުރިބާއިން އޭނާއަށް ނިންމުނީ ޕައިލެޓްކަމަކީ އޭނާއަށް އެންމެ ރަނގަޅު ދާއިރާއަށް ނުވެދާނެ ކަމެވެ. 

"އެ މާހައުލުގައި އުޅުމުން، އެ ތަޖުރިބާކުރެވުމުން އެނގުނީ އަޅުގަނޑަށް އެހާ ކަމުދާ ކަމެއް ނޫންކަން،" މަލީހު ބުންޏެވެ.

އެއް ކަމަކީ އޭނާ ބޭނުންވާ މިނިވަންކަން ނުލިބުމެވެ. މިސާލަކަށް ވަގުތަށް ނަމާދަށް ދިއުމާއި އާއިލާއާ އެއްކޮށް ގިނަ ވަގުތު އުޅުމުގެ ފުރުސަތެވެ. އެހެންކަމުން ޓީއެމްއޭއިން ކެނޑުނެވެ. އެ މުއްދަތުގައި ލިބުނު އާމްދަނީ ބޭނުންކޮށްގެން ދެން ކުރެވިދާނެ އަމިއްލަ މަސައްކަތަކީ ކޮބައިތޯ ވިސްނި އެވެ. އޭނާއަށް ފެނުނީ ޒަމާނީ ސާމާނު ބޭރުން ގެނެސް ވެހިކަލް ސާފުކުރުން ނުވަތަ އޮޓޯ ޑީޓެއިލިން ރަނގަޅުވެދާނެ ކަމެވެ.

އެކަން ފެށުމުގެ ކުރިން ފުރަތަމަ ދަސްކުރީ އެކަމަށް ބޭނުންވާ ކެމިކަލްތަކެވެ. މާލެއަކީ ހިރަފުސް ބޯ ތަނެއް ކަމުން އެފަދަ މާހައުލެއްގައި ވެހިކަލްތަކަށް ދެވިދާނެ ހިމާޔަތެވެ.

"ފުރަތަމަ ފެމިލީގެ ކާރުތަކާ އެއްޗެހި ފޮހެ ޓެސްޓްކުރީ. [ކެމިކަލްތައް] އެޕްލައިކުރަން ދަސްކުރީ. އޭގެ އިފެކްޓްތައް ބެލީ،" އެ މަސައްކަތުގެ ތެރެއަށް ވަދެވުނު ގޮތް ކިޔައިދެމުން މަލީހު ބުންޏެވެ.

މިހާރު އޭނާ ހުރީ އެކަން ވަރަށް ރަނގަޅަށް ދަސްކޮށްގެންނެވެ. ތިމާވެއްޓަށް ގެއްލުމެއް ނުލިބޭ އަދި ވެހިކަލްތަކުގައި ކޫރު އެޅުން ފަދަ ކަންކަމުން ވެސް ދުރުކޮށްދޭ ކެމިކަލް އާއި ފޮހެން ބޭނުންކުރާ ސާމާނާ އެކު އޭނާގެ މަސައްކަތް އެ އަންނަނީ ކުރިއަށް ޖައްސަމުންނެވެ. މިހާރު ބައެއް މީހުން ގަވާއިދުން އޭނާ އަތަށް ކާރާއި ސައިކަލް ސާފުކުރަން ދެ އެވެ. ސޯޝަލް މީޑިއާގައި 'އެލީޓް ޑީޓެއިލާސް'ގެ ނަމުގައި ޕޭޖެއް ހިންގަ އެވެ.

މަލީހު ބޭނުން ނަމަ މަތީ ތައުލީމުގެ ލޯނު ލިބެން އެބަ އޮތެވެ. ނަމަވެސް ލޯނެއް ބޮލުއަޅައިގެން ކިޔެވުމުގެ ވިސްނުމެއް އޭނާގެ ނެތެވެ. އެހެންކަމުން މި ވަގުތު ވެސް އޭނާ ބޭނުންވަނީ އަމިއްލައަށް އާމްދަނީ ހޯދާށެވެ.

"އަޅުގަނޑުމެންނަށް ދަސްވެފައި އޮންނަނީ ވަޒީފާއަކުންނޭ އާމްދަނީ ލިބޭނީ. އެއީ އަސްލު ތެދެއް ނޫން،" މަލީހު ބުންޏެވެ.

"ގައުމެއް ކުރިއަރާ ދާން ބޭނުންވޭ އެބަ ކޮންމެވެސް ބަޔަކު ވަޒީފާތައް އުފައްދަން ވެސް."

އަމިއްލަ ކަމެއް ކުރުމަކީ ވަޒީފާއެއް އުފެއްދުމެވެ. ދީން ހުއްދަކުރާ ކޮންމެ މަސައްކަތެއް ވެސް ފުދެ އެވެ. ރިޒުގަކީ، މަލީހު ބުނި ގޮތުގައި، 'ވަރަށް ފުޅާ އެއްޗެކެ'ވެ. އެ ހޯދަން މަސައްކަތްކޮށްފި ނަމަ ކޮންމެ މީހަކަށް ވެސް ލިބޭނެ އެވެ.

ދީނީ ކަންކަމަށް ލޯބި ހުންނަ ޒުވާނެއް ކަމުން އޭނާ މިސާލު ނެގީ ކީރިތި ރަސޫލާގެ ހަދީސްއަކުންނެވެ. މާތްﷲއަށް އިތުބާރުކޮށް މަސައްކަތްކުރާ މީހަކަށް ދޫނި ފަދަ ދިރުންތަކަށް ރިޒުގު ދެއްވާ ފަދައިން ރިޒުގު ލިބޭނެ ކަމެވެ.

"ދޫންޏަށް ވިސްނާލަމާ. އެއީ އެ ސޮރުގެ ހާލީގައި އަބަދު އޮންނަ އެއްޗެއް ނޫން. އެ ސޮރު މި ނުކުންނަނީ ދުވާލު ވަގުތުގައި ކާއެއްޗެހި ހޯދުމަށް. ނުކުމެފައި މި އަންނަނީ ރޭގަނޑު ރިޒުގު ފެނިގެން، ކާއެއްޗެހި ކައިގެން، ބަނޑު ފުރިގެން،" މަލީހު ބުންޏެވެ.

"އެކަމަށް ވިސްނާލާއިރު އެބަ އެނގޭ މަސައްކަތްކުރަން ޖެހޭކަން."

އެލީޓް ޑީޓެއިލާސްގެ ޕޭޖްތަކުން އޭނާގެ މަސައްކަތަށް އަންނަނީ ތަރުހީބު ލިބެމުންނެވެ. އާ ކަސްޓަމަރުންނާ ބައްދަލުވެ އެވެ. މައުލޫމާތު ހޯދަން ގުޅަ އެވެ. އެހެންކަމުން މަލީހަށް ފެންނަނީ އޭނާގެ މި ފެށުން ކާމިޔާބުވަމުން އަންނަ ތަނެވެ.

ޒުވާނުންނަށް ދޭން އޮތް މެސެޖަކީ، އޭނާ ބުނި ގޮތުގައި، ޒުވާން އިރު ރިސްކް ނަގާށޭވެ. އުމުރުން ދުވަސްވާއިރު އަޅާ ފިޔަވަޅެއްގައި ނާކާމިޔާބު ވެއްޖެ ނަމަ އޭގެ އަސަރުކުރާނެ މީހުން ގިނަވާނެ އެވެ. އެއީ ތެދެކެވެ. އޭރުން ދަރިން ވެސް ތިބޭނެ އެވެ. ބަލަން ޖެހޭ އެހެން މީހުން ވެސް އުޅޭނެ އެވެ.

"މަސައްކަތާ އެއްކޮށް ކާމިޔާބު އަންނާނީ. ކާމިޔާބީ އާއި ނާކާމިޔާބު އެއީ ދައުރުވާ އެއްޗެހި. ނާކާމިޔާބީއަކީ ވަރަށް ގިނަ އެއްޗެހި ދަސްކޮށްދޭ ކަމެއް،" މަލީހު ބުންޏެވެ.

"އެއްވެސް ވަރަކަށް ބިރުގަނެގެން ނުވާނެ. ވޯކް ހާޑް. ދެން އޮތީ اللهއަށް އިތުބާރުކުރުން."

ކުރީ ދުވަހަކު ފެނުނު ފޭސްބުކް ޕޯސްޓެކެވެ. އޭގައި ބުނާ ވާހަކަ އެއްގޮތަކުން މަޖާވެދާނެ އެވެ. އަނެއް ގޮތަކުން އެއީ ވަރަށް ސީރިއަސް މައްސަލައެއްގެ ވާހަކަ އެވެ. އެ ޕޯސްޓްގައި  ބުނަނީ "މި އާ ޖީލު މަސައްކަތްކުރާކަށް ބޭނުމެއް ނުވެ އެވެ. ވަޒީފާގެ ނަމަކީ ނިދުމެވެ. އެކަމަކު އެ ވަޒީފާ ދިނަސް ހޭލާފައި ކެނޑޭނެ އެވެ،" މިހެންނެވެ. 

ދިވެހިންގެ ތެރޭގައި ވެސް ވަޒީފާގައި ނޫޅެވޭ ޒުވާނުން ދަނީ ގިނަވަމުންނެވެ. އެކަހަލަ ޒަމާނެއްގައި މަލީހު ކަހަލަ ޒުވާނަކު ފެނުމުން އޭނާ ވާނީ ހަގީގަތުގައި ވެސް ނަމޫނާއަކަށެވެ. ގައުމު ބޭނުންވާ ޒުވާނުންނަކީ މިއީ އެވެ.