މަހުމޫދު މަރާލި ކަމަށް އިއުތިރާފުވީ އޮޅުވާލުމުން ކަމަށް ސާލިމް ހައި ކޯޓުގައި ބުނެފި

އދ. ދަނގެތީގައި އެ ރަށުގެ ވިޔަފާރިވެެރިޔާ މަހުމޫދު އަބޫބަކުރު މަރާލި މައްސަލައިގައި އިއުތިރާފުވީ، ޑީޕޯޓުކޮށް އަނބުރާ ބަންގްލަދޭޝްއަށް ފޮނުވާލާނެ ކަމަށް ބުނުމުން ކަމަށް ޝާ އަލޮމް މިއާ (ސާލިމް) ހައި ކޯޓުގައި މިއަދު ބުނެފި އެވެ.

މައްސަލައިގެ ފެށުން - މީގެ ދޮޅު އަހަރެއްހާ ދުވަސް ކުރިން، އޮކްޓޫބަރު 2021ގައި ހިނގި މި ހާދިސާގައި، މަހުމޫދު ގެއްލިގެން ހޯދަމުން ދަނިކޮށް ފެނުނީ، ވަރަށް ބޮޑަށް ޒަހަމްކޮށްލައި މަރާލުމަށް ފަހު ދަނގެތީގެ ފަޅު ގޯއްޗެއްގެ ތެރޭގައި ހުރި ވަޅެއްގެ ތެރެއަށް ވައްޓާލާފައި އޮއްވަ އެވެ. އެ އަމަލު ހިންގުމުގެ ތުހުމަތުގައި ސާލިމް ހައްޔަރުކުރުމުން:

ވީ ކިހިނެއް؟ - ކްރިމިނަލް ކޯޓުން ކުރި ހުކުމް ކަށަވަރުކުރަން ހުށަހެޅި މައްސަލައިގައި ހައި ކޯޓުގައި ބޭއްވި ފުރަތަމަ އަޑުއެހުމުގައި ސާލިމް މިއަދު ވަނީ އޭނާގެ ތަރުޖަމާނު އޮޅުވާލީ ކަމަށް ބުނެ، ބަންގްލަދޭޝް ތަރުޖަމާނަކާ އެކީ އަޑުއެހުންތައް ކުރިޔަށް ގެންދަން ފަނޑިޔާރުންގެ ކިބައިން އެދިފަ އެވެ. 

ތަފްސީލް - މާފުށީ ޖަލުގައި ހުރެގެން އަޑުއެހުމުގައި ބައިވެރިވި ސާލިމް، ފަނޑިޔާރުންގެ ކުރިމަތީގައި އުދާސްތައް ބަންޑުންކޮށްލަމުން ބުނީ، އޭނާ ކުށަށް އިއުތިރާފުވީ، އިއުތިރާފުވުމުން ޑީޕޯޓު ކޮށްދޭނެ ކަމަށް ތަރުޖަމާކޮށްދިން މީހާ ބުނުމުން ކަމަށް އޭނާ ބުންޏެވެ.

ބުނީ ކީކޭ؟ - "ކުރިން ބުނީ އެ ވައްތަރު އެ ވައްތަރު ވާހަކަ ބުނައްޗޭ. ބުނީމަ އެއްބަސްވަނީ ބަންގްލަދޭޝް [ބުނި އެއްޗެއް ސާފެއް ނުވޭ]. އަހަރެން އެކަމެއް ނުކުރަން،" ބިދޭސީން އާއްމުކޮށް ދިވެހި ބަހުން ވާހަކަ ދައްކާ ގޮތަށް ސާލިމް ބުންޏެވެ.

އެނގުން މުހިންމު - ސާލިމް ވަނީ ތަހުގީގު މަރުހަލާގެ އިތުރުން، ޝަރީއަތުގެ މަޖިލީހުގައި ވެސް އިއުތިރާފުވެފަ އެވެ. ދައުލަތުން ދަށު ކޯޓުގައި އެެދެމުން ދިޔައީ ހެކި ހުށަހަޅައިގެން މައްސަލަ ސާބިތުކުރާށެވެ. ނަމަވެސް، ސާލިމްގެ އިއުތިރާފު ދެމެހެއްޓުމަށް ފަހު މި މައްސަލަައިގައި ހުކުމް ކުރި ކްރިމިނަލް ކޯޓުގެ އިސް ގާޒީ އަހުމަދު ޝަކީލު ނިންމެވީ ސާލިމްގެ އިއުތިރާފުގެ މައްޗަށް މައްސަލަ ސާބިތުވާކަމަށެވެ.

ތަރުޖަމާނު ދެއްކި ވާހަކަތަކަކާ ގުޅިގެން އިއުތިރާފުވީ ކަމަށް ސާލިމް ބުނި ނަމަވެސް އެއީ ކޮން ތަރުޖަމާނެއް ކަމެއް ސާފެއް ނުވި އެވެ.

ޕީޖީގެ ވަކީލުން ވިދާޅުވީ ތަހުގީގު މަރުހަލާގައި ހުރީ އެހެން ތަރުޖަމާނެއް ކަމަށާއި ދަށު ކޯޓުގައި ތަރުޖަމާކޮށްދިނީ، ހައި ކޯޓުގައި ތަރުޖަމާކޮށްދޭން ހުރި ދިވެހި މީހާ ކަމަށެވެ. އޭގެ ކުރިން ވާހަކަ ދައްކަމުން ތަރުޖަމާނު ވަނީ، އެފަދަ އެެއްވެސް ވާހަކައެއް ސާލިމް ގާތު ބުނެފައި ނުވާނެ ކަމަށް ފަނޑިޔާރުންނަށް ދަންނަވާފަ އެވެ.

ތަރުޖަމާނު ބަދަލުކުރުމާ މެދު ދައުލަތުން ދެކޭ ގޮތް އޮޅުންފިލުވަން ސުވާލުކުރުމުން ދައުލަތުގެ ވަކީލުން ވިދާޅުވީ، ޝަރުތުތައް ފުރިހަމަވާ ނަމަ އެކަމާ ދެކޮޅު ނޫން ކަމަށެވެ. އަދި އެކަމުގައި ފަނޑިޔާރުންގެ ބެންޗުން ގޮތެއް ނިންމަން އެދުނެވެ.

ހައި ކޯޓުުގައި މި މައްސަލަ ބައްލަވާ ފަނޑިޔާރުންގެ ބެންޗުން ނިންމީ ބަންގްލަދޭޝްގެ ތަރުޖަމާނަކު ހަމަޖެއްސުމާ މެދު ފަހުން ގޮތެއް ނިންމާށެވެ.

ދަނގެތީގައި އުމުރުން ދުވަސްވީ މީހަކު ބަލަހައްޓަމުން ދިޔަ ސާލިމް، މަހުމޫދު މަރާލީ އެ އުމުރުން ދުވަސްވީ މީހާގެ ގޭތެރޭގަ އެވެ. އޭނާ މަރާލުމަށް ފަހު ހަށިގަނޑު، ކައިރި ގޯއްޗެއްގައި ހުރި ވަޅެއްގެ ތެރެއަށް ވައްޓާލީ، މަހުމޫދުގެ ހަށިގަނޑު ފާރެއްގެ މަތިން މަގަށް ގެންގޮސް އުފުލައިގެންނެވެ.