ސައީދުގެ ދެފުށްކެހެރި ވާހަކައަކީ އިބުރަތެއް ކަމަށް ބަލަމާ!

ޖުމްހޫރީ ދުވަހުގެ ހެޔޮއެދުންތަކެވެ.

ސިޔާސީ ހަރަކާތްތެރިންނާއި އާންމު ރައްޔިތުންނަށް މި ދުވަހު އާ އިބުރަތްތަކެއް ހޯދިދާނެ އެވެ. އެގޮތުން އިކޮނޮމިކް މިނިސްޓަރު މުހައްމަދު ސައީދުގެ ދެފުށްކެހެރި ވާހަކަތަކަކީ އަމިއްލަ ނަފުސަށާއި ގައުމަށް ތެދުވެރި ހިތެއް އޮތް ނަމަ އެންމެންނަށް ވެސް ލިބެން އޮތް ފިލާވަޅެއް ކަމަށް ބަލަމާ ހިނގާށެވެ.

އިދިކޮޅުގައި ހުންނެވި އިރު ކުރީގެ ރައީސް އަބްދުﷲ ޔާމީންގެ އެންގެވުމަށް ޕީޕީއެމުން ކުރިއަށް ގެންދިޔަ 'އިންޑިއާ އައުޓް'ގެ ފޯރިގަނޑުގައި ސައީދު ދެއްކެވި ވާހަކަތައް ހަނދާންކޮށްލަމާ ހެއްޔެވެ؟

"ހަނިމާދުއަށް ބޭނުންނުވާވަރުގެ އަސްކަރީ ބޮޑު ރަންވޭއެއް އަޅަން 135 މިލިއަން ޑޮލަރު އަޅުގަނޑުމެންގެ މި ދައުލަތުގެ މާލިއްޔާއިން އިންޑިއާއިން އަޅުގަނޑުމެންގެ ބޮލުގައި އެޅީމާ ދުއްޕާނަކަށް ނުވޭތޯ."

މިއީ ޕީޕީއެމުން އޭރު ބޭއްވި ބޮޑު ޖަލްސާއެއްގައި ސައީދު ދެއްކެވި ވާހަކައިން ތަންކޮޅެކެވެ. ރިޔާސީ އިންތިހާބުގައި ޕީޕީއެމްގެ މައިގަނޑު ވިސްނުން ވެސް އޮތީ އިންޑިއާއާ ދެކޮޅަށެވެ. ރައީސް މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް ފަހު ބޭރަށް ކުރެއްވި ފުރަތަމަ ރަސްމީ ދަތުރުފުޅުގައި ވަޑައިގަތީ ވެސް، ކުރީގެ ރައީސުންނާ ތަފާތުކޮށް، ޗައިނާއަށެވެ.

އެމްޑީޕީ ސަރުކާރުން އިންޑިއާއާ ގާތް ގުޅުމެއް ބޭއްވި ސިޔާސަތު ބަދަލުކޮށް ރާއްޖޭގެ އެންމެ ގާތް ބޭރު ގައުމަކީ ޗައިނާކަމަށް ހަދަން މި ސަރުކާރުގެ ކުރީކޮޅު ކުރި މަސައްކަތުގެ އިސް މޭސްތިރިއަކީ ސައީދަށް ވުން ވަރަށް ކައިރި އެވެ. ނަމަވެސް ބައިނަލްއަގުވާމީ ގުޅުންތަކާއި ބޭނުންވާ އެހީތެރިކަން އަވަހަށް ލިބުމުގައި ހުންނަ އުނދަގޫ/ފަސޭހަ ގޮތްތަކާ ހެދި މުޅި ސިޔާސަތު އެކޮޅުކޮޅުން ޖެހެ އެވެ. ދައްކާ ވާހަކަ ބަދަލުވަނީ ތިމާ ދެފުށްކެހެރިއަކަށް ހަދައިފަ އެވެ.

މިނިސްޓަރު ސައީދަށް އެއީ ހަމަ ވަރަށް އާދައިގެ ކަމަކަށް ވެދާނެ އެވެ. އިންޑިއާއިން ރާއްޖޭގެ ބޮލުގައި ދަރަންޏެއް އަޅުވާފައި 'ދުއްޕާނަކަށް' ހެދިހެދުން، ހަނިމާދޫ އެއާޕޯޓް ހުޅުވުމާ އެކު މިދިއަ އާދިއްތަދުވަހު، ސައީދަށް ފެނިވަޑައިގަތީ އެއީ އުތުރުގެ ތަރައްގީއަށް ލިބުނު ބޮޑު ކުރިއެރުމެއްގެ ގޮތަށެވެ. 

ޕީއެސްއެމްއަށް ދެއްވި އިންޓަވިއުއެއްގައި އޭނާ ދެއްކެވި ވާހަކައަކީ މި އެވެ:

ހަނިމާދޫގައި "އާ ރަންވޭއަކާއި ވަރަށް ބޮޑު ޓާމިނަލްއެއް ހުޅުވިގެން މިދިއައީ... [މި] އެއާޕޯޓް ވެެގެންދާނެ އުތުރުގެ ތަރައްގީގެ ވަރަށް ބޮޑު ނާރެހަކަށް. ދެން ރައީސްގެ ވާހަކަފުޅުގައި ވަރަށް ބޮޑަށް ސަރަހައްދުގެ އިންވެސްޓްކުރުމަށް ވަރަށް ބޮޑު ބާރެއް އެޅުއްވި. އެކަން އަމަލީ ގޮތުން ވެސް އެމަނިކުފާނު އެ ގެންދަވަނީ މަސައްކަތްކުރައްވަމުން. ތަފާތު އެކި ލުއިތައް ފޯރުކޮށްދީގެން. އެހެންވީމާ އިރާދަކުރެއްވިއްޔާ އުތުރު، ހާއްސަކޮށް ހަނިމާދޫ ސަރަހައްދު ވެގެންދާނީ މުސްތަގުބަލުގައި ކުރިއެރުންތައް ލިބިގެންދާނެ ސަރަހައްދަކަަށް."

އިދިކޮޅުގައި ހުންނެވި އިރު ސައީދު ވިދާޅުވެފައި އެ އޮތީ ހަނިމާދޫ އެއާޕޯޓްގެ މަޝްރޫއުގައި ހިމެނޭ އާ ރަންވޭއަކީ ހަނިމާދުއަށް އެކަށީގެންވާ ވަރަށް ވުރެ މާ ބޮޑު ތަނެއް ކަމަށެވެ. އޭނާގެ ބަހުން ނަމަ އެއީ އިންޑިއާގެ އަސްކަރީ ރަންވޭއެކެވެ. އެމްޑީޕީ ސަރުކާރުން ފެށި އެ މަޝްރޫއަށް އިންޑިއާގެ ލޯނަކު ހޭދަކުރަން ކަނޑައެޅި 136 މިލިއަން ޑޮލަރަކީ ބޭނުން ނެތް ދަރަންޏެކެވެ.

މި ވެރިކަން ފެށިއިރު، ސައީދުގެ ވިސްނުމާ އެއްގޮތަށް، އިންޑިއާއާ ދުރުވި ދުރުވުން މާ ގިނަ ދުވަހަކަށް ހިފަހައްޓައެއް ނުލެވުނެވެ. އެއަށް ވުރެ ރާއްޖޭގެ އިގުތިސާދީ ހާލަތު މާ ދަށެވެ. އިންޑިއާގެ އެހީތެރިކަން ނުލިބި ސަލާމަތްނުވެވޭ ހިސާބަށް ދިޔައީ އެވެ. އެހެންކަމުން 'އިންޑިއާ އައުޓް'އަކީ ހަމައެކަނި ޔާމީން ގެންގުޅުއްވި ސިޔާސީ އުކުޅަކަށް ހަދައި، އިންޑިއާގެ އެންމެ ގާތް އަވަށްޓެރިޔާއަށް އަނެއްކާވެސް ރާއްޖެ ވީ އެވެ.

ދެ އަނގައިން ސައީދު ދެއްކެވި ވާހަކައިން ލިބޭ އިބުރަތަކީި، ހަގީގަތުގައި އަހަރެމެންނަކީ ގައުމުތަކާ ޖައްސާލައިގެން އުޅެވޭ ވަރަށް ވުރެ މާ ނިކަމެތި ބައެއް ކަމެވެ. ސިޔާސީ ވައުދުތައް ފުއްދަން ދަރަންޏަކަށް ފަހު ދަރަންޏެއް ނެގެން އޮތީ ވެސް، އިންޑިއާ އާއި ޗައިނާ ކަހަލަ ގައުމުތަކާ އެކު ގާތް ގުޅުން ބާއްވައިގެން ކަމެވެ. އެ ގައުމުތަކާ ޖެހިގަނެ، ޖިއޮޕޮލިޓިކްސް ތެރެއަށް، މި ގައުމުގެ ފެންވަރަށް ވުރެ މާ މަތިން، ވަދެގެން އުޅޭ ނަމަ އޮތް ނުރައްކާ ބޮޑު ކަމެވެ. ތިމާއަށް ވުރެ މާ މަތީ ވާހަކަތައް ދައްކައިގެން އެންމެ ފަހުން 'އަތަށް ގޮވާ ކަމެ'ވެ.

އަޅުގަނޑު އަބަދުވެސް ބުނަމުން މި އަންނަނީ މިއީ މީގެ 15 އަހަރު ކުރީގެ ދުނިޔެ ނޫން ކަމަށެވެ. މިދިއަ 15 އަހަރުގެ ތެރޭގައި ޗައިނާ އެ އޮތީ ދުނިޔޭގެ އެންމެ ބޮޑު ދެވަނަ އިގުތިސާދަށް ވެފަ އެވެ. މިދިއަ 15 އަހަރުގެ ތެރޭގައި އިންޑިއާ އެ ވަނީ ދުނިޔޭގެ ހަތަރު ވަނައަށް އެންމެ ބޮޑު އިގުތިސާދަށް ވެފަ އެވެ. ދުނިޔޭގެ އެންމެ ބޮޑު އާބާދީ އޮތް މި ދެ ގައުމުގެ އެ މުއްސަނދިކަމާ އެކު ދުނިޔޭގެ ބާރަކަށް ވެސް ވާދަކުރަނީ އެވެ. އެހެންކަމުން، ދިވެހިންނޭވެ! އަޅުގަނޑުމެން މިހާރު އުޅެމުން މި އަންނަނީ، 'އިންޑިއާ އައުޓް، އާއި 'ޗައިނާ އައުޓް' ޖަހައިގެން ސިޔާސީ މުޒާހަރާތަކާއި ސިޔާސީ ބަހުސް، އަދި ކީއް، އާންމު ބަހުސް ވެސް ނުކުރެވޭ ކަހަލަ ދުނިޔެއެއްގައި ކަމެވެ.

ސިޔާސީ މަގުސަދު ހާސިލްކުރަން ދެފުށްކެހެރި ނުވުމަކީ ގައުމަށް އޮތް ފައިދާއެއް ކަމަށް، ސިޔާސީ ވެރިންނާއި އާންމު ދިވެހިން ވެސް ގަބޫލުކުރަމާ ހިނގާށެވެ. ދުނިޔޭގައި ދިވެހިރާއްޖޭގެ މަގާމަކީ އަސްލު ކޮބައިކަން ދެނެގަންނާށެވެ. މިއީ އަމިއްލަ އުފެއްދުންތެރިކަމެއް ނެތް، ހަމައެކަނި ޓޫރިޒަމްއަށް ބަރޯސާވެފައި އޮތް ގައުމެއް ކަމަށް ބަލައިގެން، ނެގެން އޮތް ފައިދާއެއް ނެގުމުގެ ވިސްނުން ގެންގުޅުން މާ ބުއްދިވެރި އެވެ. މިސާލަކަށް ޔޫކްރެއިންއަށް ރަޝިޔާއިން އަރައިގަތުމުން ދިވެހިން ފާޅުގައި ރަޝިޔާއަށް ފާޑުކިޔައިގެން ނުކުންނާނީ ކޮން ނަތީޖާއެއް ހެއްޔެވެ؟ ރަޝިޔާއަކީ މިއަދުވެސް ރާއްޖޭގެ ޓޫރިޒަމްގެ އެއް ވަނަ ގައުމެވެ. މި ސަރުކާރުގައި ތިބި ދުނިޔެ ނުދަންނަ އެކްޓިވިސްޓުން އިންޑިއާއާ ދެކޮޅަށް ޖެއްސި ސޯޝަލް މީޑިއާގެ ޒުވާބާ އެކު ގެއްލުނު އިންޑިއާގެ ޓޫރިސްޓް މާކެޓް އަދިވެސް ހަމަޔަކަށް ނޭޅެ އެވެ. ކިތައް ސަތޭކަ މިލިއަން ޑޮލަރުގެ ގެއްލުމެއްތޯ އެވެ؟

ސައީދުގެ ވާހަކައިން މިއަދު، ޖުމްހޫރީ ދުވަހު، ސިޔާސީ ހަރަކާތްތެރިންނާއި އާންމު ދިވެހިންނަށް ލިބެން އޮތީ އިބުރަތެކެވެ. އެ އިބުރަތް ހާސިލްކުރާށެވެ. ބޭކާރު އަނގައަކީ ގެއްލުމެއް ކަމަށް ގަބޫލުކުރާށެވެ. ހަޔާތުގައި ދަސްވާ ފިލާވަޅުތަކާ އެއްގޮތަށް އުޅެގެން ތިމާއަށް، ޔަގީނުން ވެސް، ދެރައެއް ނުވާނެ އެވެ.