މަޖިލިސް މެންބަރުންގެ ތެރޭގައި ޑްރަގު ޑީލަރުން އެބަތިބި: އުމަރު ނަސީރު

ރައްޔިތުންގެ މަޖިލީހުގެ މެންބަރުންގެ ތެރޭގައި މަސްތުވާތަކެތީގެ ވިޔަފާރި ކުރާ މީހުން އެބަ ތިބި ކަމަށާއި މަސްތުވާތަކެތީގެ ވަބާ އިން ރާއްޖެ ސަލަމާތް ކުރެވޭނީ ޑްރަގު އެތެރެ ކުރާ މީހުންނަށް މަރުގެ އަދަބު ދީގެން ކަމަށް ކުރީގެ ހޯމް މިނިސްޓަރު އަދި ކުރިއަށް ރިޔާސީ އިންތިހާބަށް ކެމްޕެއިން ކުރައްވަމުން ގެންދަވާ އުމަރު ނަސީރު ރޭ ވިދާޅުވެއްޖެ އެވެ.

ވީ ކިހިނެއް؟ - މާދަމާ ފާހަގަކުރާ ބައިނަލްއަގުވާމީ ޑްރަގާ ދެކޮޅު ދުވަހުގެ މުނާސަބަތުގައި އުމަރު ނަސީރު ވަނީ 'ޑްރަގަށް ދާއިމީ ހައްލު'ގެ ނަމުގައި ރޭ ސަލްޓަން ޕާކްގައި ޖަލްސާއެއް ބާއްވާފަ އެވެ.

ބުނީ ކީކޭ؟ - އެ ޖަލްސާގައި އުމަރު ވަނީ، ޑްރަގު މައްސަލައިގެ މިހާރުގެ ހާލަތާއި މިކަން ހައްލު ކުރުމަށް އޭނާ ގެންގުޅުއްވާނެ ސިޔާސަތުތައް ހާމަކުރައްވާފަ އެވެ. އޭނާ ވިދާޅުވީ މިއީ ވަކި ސަރުކާރެއްގެ ބޮލުގައި އެޅުވޭނެ ކަމެއް ނޫން ކަމަށާއި ވޭތުވެދިޔަ ހުރިހާ ސަރުކާރުތަކުން ވެސް މި ކަމަށް ހައްލެއް ހޯދުމަށް ނުކުޅެދިފައިވާ ކަމަށެވެ.

"ބައިވަރު ވެރިން ވެރިކަންކޮށްފައި ގޮސްފި. އެކަމަކު އެއްވެސް ވެރިއަކަށް ހަދަންވީ ގޮތެއް ނޭނގުނު. ކޮންމެ ބޭފުޅަކު މެނިފެސްޓޯގައި ވަރަށް ރީޗަށް ލިޔޭ. އެކަމަކު އާހިރުގައި ފަސް އަހަރު ކޮށްފައި ނިމިގެން ދާއިރު، ނަތީޖާ ކުރިއަށް ވުރެ ގޯސްކޮށް ނިމެގެން ދަނީ،" ކުރީގެ ރައީސް އަބްދުﷲ ޔާމީންގެ ސަރުކާރުގައި ގިނަ ދުވަސްތަކެއް ވަންދެން ހޯމް މިނިސްޓަރުކަން ކުރެއްވި އުމަރު ވިދާޅުވި އެވެ.

"ކޮންމެ އިންތިހާބެއްގައި ރައްޔިތުންގެ މަޖިލިސް ތެރެއަށް ވަނުމަށް ޑްރަގު ޑީލަރުން މިހާރު މަސައްކަތް ކުރޭ. އަދި މަޖިލިސް ތެރޭގައި މިހާރު ވެސް ޑްރަގު ޑީލަރުން އެބަތިބި. އަދި މީގެ ކުރީގައި ވެސް މަޖިލިސް ތެރޭގައި ޑްރަގު ޑީލަރުން ތިބި."

މަޖިލިސް މެންބަރުންގެ ތެރޭގައި ޑްރަގު ޑީލަރުން ތިބި ކަމަށް އުމަރު ވިދާޅުވި ނަމަވެސް އެއީ ކޮން ބައެއް ކަމެއް އޭނާ ހާމައެއް ނުކުރައްވަ އެވެ. އޭނާ ވިދާޅުވި ގޮތުގައި، ސިޔާސީ ގޮތުން އިތުރަށް ބާރުވެރިކަން ހޯދުމަށް ޑްރަގު ޑީލަރުންނާއި ގޭންގަތަކުން އެތައް މަސައްކަތްތަކެއް ކުރަމުން ގެންދެ އެވެ.

"ޕާޓީތަކުގެ ކައުންސިލްތަކުގެ ތެރެއަށް ޑްރަގު ޑީލަރުން ވަދެއްޖެ. ޕާޓީތަކުގެ ކައުންސިލްތަކަށް ޑްރަގު ޑީލަރުން އިންތިހާބު ވެއްޖެ. މަޝްހޫރު މީހުން މަރާ މީހުން، ރާއްޖޭގެ ބޮޑެތި ސިޔާސީ ޕާޓިތަކުގެ އެވެނި ގޮތްޕެއްގެ ރައީސް، މިވެނި ގޮތްޕެއްގެ ރައީސްކަށް ވެއްޖެ،" ވަކި ޕާޓީތަކެއްގެ ނަން ނުގެންނަވައި އުމަރު ވިދާޅުވި އެވެ.

އުމަރު ވަނީ މަސްތުވާތަކެތީގެ މިހާރުގެ ހާލަތު ހާމަކުރައްވަމުން ބައެއް ތަފާސްހިސާބުތައް ވެސް ހިއްސާކުރައްވާފަ އެވެ. އެގޮތުން އޭނާ ވިދާޅުވީ:

"މައިންބަފައިން ހިތާމަ ކުރަނީ އެ މީހުންގެ ދަރިން މި ނުރައްކަލުން ނުނެރެވިގެން. ފިރިން ހިތާމަ ކުރަނީ އެ މީހުންގެ އަނބިން މީގެ ތެރެއަށް ވަދެދާނެތީ. އަނބިން ހިތާމަ ކުރަނީ ފިރިން ވަދެދާނެތީ. މައިން ރޭގަނޑު ސިއްރުން ކަރުނަ އަޅަމުން ދަނީ އެ މީހުންގެ ދަރިންނަށްޓަކާ، މި ނުރައްކަލުގައި ޖެހިފައި ތިބި ދަރިންގެ ހައްގުގައި،" އުމަރު ވިދާޅުވި އެވެ.

އުމަރު ވިދާޅުވީ، ސިޔާސީ ބާރު ހޯދުމުގެ އިތުރަށް، މުޅި ދައުލަތަށް ގޭންގުތަކުގެ ނުފުޒު ފޯރާފައިވާ ކަމަށެވެ. އެގޮތުން، ދައުލަތުގެ މުވައްޒަފުންނަށް ގޭންގުތަކުން މަހު މުސާރަ ދޭ ކަމަށް އޭނާ ތުހުމަތު ކުރެއްވި އެވެ.

"ޑްރަގު ގޭންގުތައް ވަނީ ކޯޓުތަކަށާއި މަޖިލިސް ތެރެއަށް ވެސް ވަދެފައި. ސަރުކާރުގެ އެތެރެއަށާއި ސަލާމަތީ ބާރުތަކުގެ ތެރެއަަށް ވެސް ވަދެފައި. އެ މީހުންނާ ގުޅުން ހުރި މައްސަލަތަކުގައި ކުށް ސާބިތުނުވާކަން ކަށަވަރު ކުރުމަށް ދައުލަތުގެ ވަޒީފާތަކުގެ ތިބި މީހުންގެ ތެރެއިން ގާތްގަނޑަކަށް 3،000 މީހަކަށް ދަނީ މަހުން މަހަށް އުޖޫރު ދެމުން،" އުމަރު ވިދާޅުވި އެވެ.

އުމަރު ވިދާޅުވީ، ދައުލަތުގެ ގިނަ ވަސީލަތްތައް މިކަން ހުއްޓުވުމަށް ބޭނުން ކުރަމުންދާ އިރު، އެތައް ކިލޯއެއްގެ މަސްތުވާތަކެތި އަތުލަމުން ގެންދާ ކަމަށެވެ. ނަމަވެސް ކުށް ސާބިތުވަނީ ވަރަށް މަދު އަދަދެއްކަން ފާހަގަކުރައްވައި އޭނާ ވިދާޅުވީ އަތުލާ ކޮންމެ ކިލޯއަކަށް 10 ކިލޯގެ މަސްތުވާތަކެތި އަތު ނުލެވި، ގައުމުގެ ތެރެއަށް ވަދެގެން ދާ ކަމަށެވެ. 

އޭނާ ވިދާޅުވީ:

"އެހެންވީމަ ޖަލު ވެސް ހުރީ ފުރިފައި. ޕްރޮސެކިއުޓަރުގެ މޭޒުމަތި ވެސް ހުރީ ފުރިފައި. ކޯޓުތައް ހުރީ ފުރިފައި. ފުލުހުންގެ ވެހިކަލްތައް މަގުމަތީގައި ދުއްވާފައި ދާއިރު، %80 އެ ދުއްވަނީ ޑްރަގާ ގުޅުން ހުރި މައްސަލަތަކަށް،" އުމަރު ވިދާޅުވި އެވެ.

އުމަރު ވިދާޅުވީ، އޭނާ މި މައްސަލަ ދިރާސާ ކުރައްވާތާ 33 އަހަރު ވެފައިވާ ކަމަށާއި މިކަމުގެ އަޑު އުފުލާތާ 15 އަހަރުވެފައިވާ ކަމަށެވެ. އަދި މިކަން މިހާ ފުޅާ ވެގެން ދިއުމުގައި ސަރުކާރުތަކުން ހެދި ގޯސްތައް އޭނާގެ ތަޖުރިބާގެ އަލީގައި ހާމަކުރެއްވި އެވެ.

"މީގެ 30 އަހަރު ކުރިން މާލޭގައި ޑްރަގު ބޭނުން ކޮށްގެން ހުކުމް ކުރާ މީހުން ރާއްޖޭގެ އަތޮޅުތަކުގެ ކުދިކުދި ރަށްރަށަށް އަރުވާލަމުން ގެންދިޔައީ. އޭގެ ސަބަބުން ކުދި ރަށްރަށަށް ޑްރަގު ތައާރަފްވެ، އެ ރަށްރަށުގެ އެއް ޖީލު އެއްކޮށް ހަލާކުވެގެން ދިޔައީ. އެހެންވީމަ އެއީ ރާއްޖޭގައި ހެދި ވަރަށް ބޮޑު ޕޮލިސީ މިސްޓޭކެއް،" ކުރީގެ ރައީސް މައުމޫން އަބްދުލްގައްޔޫމްގެ ސަރުކާރުގައި ގެންގުޅުނު އުސޫލަށް ފާޑު ވިދާޅުވަމުން އުމަރު ވިދާޅުވި އެވެ.

އުމަރު ވިދާޅުވީ، ހޯމް މިނިސްޓަަރަކަށް އޭނާ މަސައްކަތް ކުރެއްވި އިރު، އެ ސިޔާސަތު ބަދަލު ކުރަން މަސައްކަތް ކުރެއްވި ކަމަށާއި އޭގެ ފަހުން އެ އުސޫލު ޖަލަށް ބަދަލު ކުރި ކަމަށެވެ.

"އަޅުގަނޑުމެންގެ ވެރިންގެ އަރިހުގައި އަޅުގަނޑު ދަންނަވަން، މަސްތުވާއެއްޗެހި ބޭނުން ކުރާ މީހަކު ކުޑަކުޑަ ރަށަކަށް އަރުވާލުމަކީ ހެލްތު ވޯކަރަކު ތަމްރީންކުރުމަށް ފަހު އެ ރަށަށް ފޮނުވާލުމުގެ މިސާލޭ. އެއީ ހެލްތު ވޯކަރު އެ ރަށަށް ގޮސް އެ ރަށުގައި އޭނާގެ ބޭސްވެރިކަމުގެ މަސައްކަތް ފަށާ ގޮތަށް، މަސްވާއެއްޗެހި ބޭނުން ކުރާ މީހާ އެ ރަށްރަށަށް ގޮސް އޭނާގެ މަސައްކަތް ފަށަނީ،" އުމަރު ވިދާޅުވި އެވެ.

މި ވަބާ ހުއްޓުވުމަށް އުމަރު ގެންގުޅުއްވާ ސިޔާސަތުތައް: