ޔާމީން (ކ) އާއި މައުމޫންގެ ގުޅުން ގޯސްވުމުގެ ކުރިން ދެ ބޭފުޅުން ރައީސް އޮފީހުގައި 2014 ނޮވެމްބަރުގައި ބޭއްވި ބައްދަލުވުމެއްގެ ތެރެއިން: ޔާމީން މިރޭ ވަނީ މައުމޫނަށް ފާޑުވިދާޅުވެފައި (ފައިލް ފޮޓޯ/ ރައީސް އޮފީސް)
ވެރިކަން ވައްޓާލަން މަސައްކަތްކުރި މޭސްތިރިޔަކީ މައުމޫން: ޔާމީން
އެމަނިކުފާނުގެ ވެރިކަމުގައި، ބޭބޭފުޅު އަދި ކުރީގެ ރައީސް މައުމޫން އަބްދުލްގައްޔޫމް ހައްޔަރުކުރީ އެމަނިކުފާނު އެދިވަޑައިގެން ނޫން ކަމަށާއި އެއީ ވެރިކަން "ވައްޓާލުމަށް" އެންމެ އިސް މޭސްތިރިއެއްގެ ގޮތުގައި މައުމޫން މަސައްކަތް ކުރެއްވުމުން ވީ ގޮތެއް ކަމަށް ކުރީގެ ރައީސް އަބްދުﷲ ޔާމީން މިއަދު ވިދާޅުވެއްޖެ އެވެ.
ވީ ކިހިނެއް؟ - މާލޭގެ އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ މެމްބަރު ކަމަށް ޕީޕީއެމްގެ ފަރާތުން ވާދަކުރައްވާ ފާތިމަތު ނާޒިމާގެ ކެމްޕެއިން ރަސްމީކޮށް ފެށުމަށް ވިލިމާލޭގައި މިއަދު ހަވީރު ބޭއްވި ޖަލްސާގައި ވާހަކަ ދައްކަވަމުން ޔާމީން ވަނީ މައުމޫން ހައްޔަރުކުރުމަށް މެދުވެރިވި "ސަބަބު" ވިދާޅުވެދެއްވައިފަ އެވެ.
ފަސްމަންޒަރު - ޔާމީންގެ ވެރިކަން ވައްޓާލުމުގައި މައުމޫން އެންމެ އިސްކޮށް މަސައްކަތްކުރެއްވި ކަމަށް ޔާމީން ވިދާޅުވީ، 1 ފެބުރުއަރީ 2018 ގައި ސުޕްރީމް ކޯޓުން ނެރުނު އަމުރަށް އިޝާރާތް ކުރައްވަމުންނެވެ. އޭރު ހައްޔަރުކޮށްފައި ތިބި ސިޔާސީ ހުރިހާ ލީޑަރުން ދޫކޮށްލަން ސުޕްރީމް ކޯޓުން ކުރި އަމުރާ އެކު ކުއްލި ނުރައްކަލުގެ ހާލަތު އިއުލާންކޮށް، ދަންވަރުގެ ވަގުތެއްގައި މައުމޫން ހައްޔަރުކުރި އެވެ.
ތަފްސީލް - ޔާމީން ވިދާޅުވީ މައުމޫން ހައްޔަރުކުރީ ކުށެއް ނުކުރައްވާ ހުންނަވަނިކޮށް ނޫން ކަމަށާއި ނަމަވެސް ޔާމީންގެ ހައްގަކަށް އަރައިގަނެގެން ނޫން ކަމަށެވެ.
ބުނީ ކީކޭ؟ - "ދައުލަތުގެ ހައްގަކަށް އަރައިގަނެ، ސުޕްރީމް ކޯޓުގެ ތެރެއިން ދައުލަތް ވައްޓާލަން މަސައްކަތްކުރި އެންމެ އިސް މޭސްތިރިއަކަށް ހުންނެވި ހުންނެވުމާ އެކީ ދައުލަތަށް މަޖުބޫރުވީ [މައުމޫން ހައްޔަރުކުރަން]،" ޔާމީން ވިދާޅުވި އެވެ.
ޔާމީން ވިދާޅުވީ މައުމޫން ހައްޔަރުކުރުމަކީ އެމަނިކުފާނު ނިންމެވި ނިންމެވުމެއް ނޫން ކަމަށާއި އެފަދަ އެންގުމެއް އަންގަވާފައި ނުވާނެ ކަމަށެވެ.
"އަޅުގަނޑެއް ނޫން ރައީސް މައުމޫން ޖަލަށް ލާން ނިންމީކީ. އެއީ ގައުމީ ސަލާމަތާ ބެހޭ ކޮމިޓީގެ ނިންމުމެއް. އެ މައްސަލަ އިސްވެ ހުށަހެޅީ ވެސް އަޅުގަނޑެއް ނޫން،" ޔާމީން ވިދާޅުވި އެވެ.
ޔާމީން ވިދާޅުވީ ގާތް މީހަކު ނަމަވެސް، މުޅި ދައުލަތުގެ ހައްގަށް އަރައިގަންނަ ހިސާބަށް ދިއުމުން، އެ ވަގުތު ދައުލަތް ހިންގަން ހަވާލުވެ ހުންނަ މީހަކަށް، މުޅި ރައްޔިތުންގެ ހައްގުގައި އަޅަން ޖެހޭ ފިޔަވަޅެއް އަޅަން ޖެހޭނެ ކަމަށެވެ.
ޔާމީން ވިދާޅުވީ މައުމޫން ހައްޔަރުކުރުމުގެ "ހަގީގަތަކީ" އެއީ ކަމަށާއި އެ ހަގީގަތް މިހާތަނަށް ވެސް އޮތީ ނޭނގި ކަމަށެވެ.