ޓީޗަރުންގެ ޕޭ ފްރޭމްވޯކު އޮތީ ޑިގްރީއަކަށް ވުރެ މާސްޓާއަށް ލިބޭ މުސާރަ ކުޑަކޮށް: ޝަފީއު

މިދިޔަ ސަރުކާރުން އެކުލަވާލި ޕޭ ފްރޭމްވޯކް އޮތް ގޮތުން، މާސްޓާސް ހާސިލުކުރާ ޓީޗަރުންނަށް ލިބޭ މުސާރަ، ޑިގްރީއެއް އޮންނަ ޓީޗަރަކަށް ވުރެ ދަށް ކަމަށާއި އެ މައްސަލަތައް ހައްލުކުރަން ޕޭ ފްރޭމްވޯކް ރިވިއުކުރުމުގެ މަސައްކަތް ކުރަމުން އަންނަ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މިއަދު ވިދާޅުވެއްޖެ އެވެ.

ވީ ކިހިނެއް؟ - ޝަފީއު މިހެން ވިދާޅުވީ، މިއަދު އޮތް ރައްޔިތުންގެ މަޖިލީހުގެ ޖަލްސާގައި، ކެންދޫ ދާއިރާގެ އެމްޑީޕީ މެންބަރު މައުރޫފު ޒާކިރު ކުރެއްވި ސުވާލަކަށް ޖަވާބުދެއްވަމުންނެވެ. މައުރޫފް ސުވާލުކުރެއްވީ:

ބުނީ ކީކޭ؟ - ޖަވާބުގައި ޝަފީއު ވިދާޅުވީ، މާލޭގައި ވެސް އަދި އަތޮޅުތެރެ ވެސް ހިމެނޭ ގޮތަށް 15އަށް ވުރެ ގިނަ ޓީޗަރުންނާ ބައްދަލުކޮށް ވާހަކަދެކެވިފައިވާއިރު، ޕޭ ފްރޭމްވޯކް އެކުލަވާލާފައިވާ ގޮތާ މެދު ވަރަށް ގިނަ ޓީޗަރުންގެ ކަންބޮޑުވުން އެބަހުރި ކަމަށެވެ. އެހެންވެ، އެ މައްސަލަތައް ހައްލުކުރުމަށް ޓީޗަރުންނާ ގުޅިގެން ޕޭ ފްރޭމްވޯކް ރިވިއުކުރުމުގެ މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.

"އަޅުގަނޑު ޓީޗަރުންނަށް ދީފައިވާ ޔަގީންކަމަކީ، ޕޭ ފްރޭމްވޯކް ރިވިއުކުރުމުގެ މަސައްކަތް އަޅުގަނޑު މުދައްރިސުންނާއި ޕްރިންސިޕަލުންނާ ގުޅިގެން ކުރިއަށް ގެންދިއުމުގެ ކަންތައްތަކެއްގެ ތެރެއިންނޭ މި މައްސަލަތައް ހައްލުކުރާނީ،" ޝަފީއު ވިދާޅުވި އެވެ.

އެގޮތުން، އޭނާ ފާހަގަކުރެއްވި މައްސަލަތަަކަކީ:

"ޓްރާސްފާ ކޮށްފި ކަމުގައި ވަނީ ނަމަ، މުދައްރިސުންނަށް ޑިގްރީއެއް އޮވެގެން ލިބޭ މުސާރައަށް ވުރެ، ދެން މާސްޓާސްގެ އެ ހަރުފަތުގައި ލިބޭ މުސާރަ ދަށްވާ ގޮތަށް ޕޭ ފްރޭމްވޯކް މި އޮތީ. އެހެންވީމާ އަޅުގަނޑުގެ ހިތުން މިއީ ހައްލުކުރަންޖެހޭ ކަމެއް. މިއީ އެކަކު އަނެކަކަށް އިނގިލި ދިއްކޮށްގެން ތިބެންޖެހޭ ކަމެއް ނޫން،" ޝަފީއު ވިދާޅުވި އެވެ.

"މިއީ ހަގީގަތުގައި ވެސް ޕޭ ފްރޭމްވޯކް އެކުލަވާލެވުނުއިރުގައި ހަމަ ކުރީގައި ވިސްނާނުލައި މިކަން ކޮށްފައި އޮތީމާ މިކަން މިހެން ދިމާވެފައި މި އޮތީ."

އެނގުން މުހިންމު - ޓީޗަރުންނަށް އިތުރު ގަޑީގެ ފައިސާއާ އެކީގައި މިހާރު ލިބޭ ވަރަށް ވުރެ ބޮޑު މިންވަރެއް މުސާރަ އާއި އިނާޔަތްތަކުން އެކަނި ލިބޭނެ ގޮތަށް، ތައުލީމީ ދާއިރާގެ މުވައްޒަފުންގެ މުސާރަތައް ބޮޑުކުރީ،ރައީސް އިބްރާހިމް މުހައްމަދު ސޯލިހުގެ ސަރުކާރުގައި 2022 ވަނަ އަހަރެވެ. މި ބަދަލާ އެކު، 12،000ރ. އާއި 24،000ރ.އާ ދެމެދުގެ މުސާރައެއް މިހާރު ޓީޗަރުންނަށް ލިބެ އެވެ.