ޕީއެންއެފްގެ ހަރަކާތްތައް އިސްލާހު ނުކޮށްފި ނަމަ ފިޔަވަޅު އަޅާނެ ކަމުގެ ފަހު އިންޒާރު ދީފި

ކުރީގެ ރައީސް އަބްދުﷲ ޔާމީންގެ ޕާޓީ، ޕީއެންއެފުން މަގުމަތީގައި ހިންގާ ހަރަކާތްތަކުގައި ސިޔާސީ ޕާޓީތަކުން އަމަލުކުރަން ޖެހޭ ސުލޫކީ މިންގަނޑާ ހިލާފު ކަންކަން ކުރަމުންދާ ކަމަށާއި އެކަން ތަކުރާރު ކުރާ ނަމަ ފިޔަވަޅު އަޅާނެ ކަމުގެ އިންޒާރު އިލެކްޝަންސް ކޮމިޝަން (އީސީ)އިން ދީފި އެވެ.

ވީ ކިހިނެއް؟ - 'އަދަދު' ނޫހުން މިދިޔަ މަހުގެ ފަހުކޮޅު ގެނެސްދިން ޑޮކިއުމަންޓަރީއެއްގައި ރައީސް މުހައްމަދު މުއިއްޒުގެ މައްޗަށް ތުހުމަތުތަކެއް ކުރި ފަހުން ޕީއެންއެފްގެ މުޒާހަރާތަކުގައި ދަނީ އެ ވާހަކަ ދައްކަމުންނެވެ. އަދި ގިނަ ރޭތަކުގައި މުޒާހަރާގެ ބައިވެރިން މަގުމައްޗަށް ސޯފާއެއް ނެރެ ބަހައްޓައިގެން އެ މަންޒަރުތައް ލައިވްކޮށް ދައްކަ އެވެ.

އީސީއިން ޕީއެންއެފްއަށް ފިޔަވަޅު އަޅާނެކަމުގެ އިންޒާރު މިރޭ ދިނީ އެފަދަ އަމަލުތައް އެ ޕާޓީގެ އެއްވުންތަކުގައި ތަކުރާރު ނުކުރުމަށް މިފަހުން ނަސޭހަތްތެރިވުމަށްފަހު އެވެ.

ބުނީ ކީކޭ؟ - އީސީއިން މިރޭ ނެރުނު ބަޔާނުގައި ބުނީ ޕީއެންއެފްގެ އެއްވުންތަކާއި ހަރަކާތްތަކުގައި ގާނޫނާ ހިލާފު އަމަލުތައް ކުރަމުންދާކަމުގެ ޝަކުވާ ތަކުރާރުކޮށް އެ ކޮމިޝަނަށް ލިބެމުން އަންނަ ކަމަށާއި އެފަދަ އަމަލުތައް ނުހިންގުމަށް ނަސޭހަތްތެރިވެ، އެކަން އެ ޕާޓީއަށް ކުރިން ވެސް އަންގާފައިވާނެ ކަމަށެވެ.

"ހަމައެހެންމެ މިކަންކަމާ ގުޅޭގޮތުން މަޝްވަރާކުރުމަށް މި ކޮމިޝަނަށް ހާޒިރުވުމަށް ދައުވަތު ދީފައިވީނަމަވެސް، ކޮމިޝަނަށް ހާޒިރުވުމަށް ޕީއެންއެފްއިން އުޒުރުވެރިވެފައިވާކަން ފާހަގަކުރަމެވެ،" އީސީގެ ބަޔާނުގައި ބުނެފައިވެ އެވެ.

"ވީމާ، އިސްވެ ބަޔާންކުރެވުނު އަމަލުތައް ތަކުރާރުވާނަމަ ސިޔާސީ ޕާޓީގެ ގާނޫނުގެ ދަށުން އަޅަންޖެހޭ ފިޔަވަޅު މި ކޮމިޝަނުން އަޅާނެ ވާހަކަ ދަންނަވަމެވެ."

ތަފްސީލު - އޭގެ އިތުރުން އީސީއިން ސިޔާސީ ޕާޓީގެ ގާނޫނާ ހަވާލާދީ ބުނީ:

ގުޅުންހުރި - ޕީއެންއެފްގެ ހަރަކާތްތަކުން އާންމުންގެ މެދުގައި ނަފްރަތު އުފައްދައި، ހަމަނުޖެހުމަށް ހިތްވަރު ލިބޭ ކަމަށް ބުނެ، އެފަދަ ކަންކަން ހުއްޓާލަން އިލެކްޝަންސް ކޮމިޝަން (އީސީ)އިން ވަނީ އެ ޕާޓީގެ ރައީސް، ކުރީގެ ރައީސް އަބްދުﷲ ޔާމީނަށް އަންގާފަ އެވެ.