ކެމްޕޭން ފަޅުފިލުވާލީ ރީތި ފޮންޓުތަކުން، އެކަމަކު އަގު ދައްކާކަށް ބޭނުމެއް ނުވި

ނިމިގެން ދިޔަ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ އިންތިހާބުގެ ޕޯސްޓަރުތަކުން އެއްކަމެއް ފާހަގަވި އެވެ. އެކިވަރުވަރުގެ، އެކި ގޮތްގޮތަށް ލިޔެފައިވާ ދިވެހި ފޮންޓުތަކެވެ. އެކަމަކު ހަގީގަތަކީ އޭގެ ތެރެއިން ގިނަ ފޮންޓުތައް ބޭނުންކޮށްފައި ހުރީ އޭގެ ވެރިފަރާތުގެ ހުއްދައާ ނުލާކަމެވެ.

ރީތި ދިވެހި ފޮންޓެއް މިހާރު އެންމެ ފަސޭހައިން އަތުޖެހޭނެ މާކެޓްޕްލޭސްއަކީ އަކުރުޓައިޕެވެ. އަމިއްލަ ބޭނުންތަކަށް ރީތި ފޮންޓުތައް އެތަނުން ލިބެން ހުރި ނަމަވެސް، ވިޔަފާރީގެ ބޭނުމަށް ނުވަތަ ޕްރޮމޯޝަންތަކަށް އެތަނުގެ ފޮންޓުތައް ޖެހޭނީ ގަންނާށެވެ. އެކަމަކު އަކުރުޓައިޕްގެ ގިނަ ފޮންޓުތަކެއް، ކެމްޕޭން ޕޯސްޓަރުތަކުން ފެނުނު އިރު އެއަށް އަގު ދެއްކީ މަދު ބައެކެވެ.

ވެރިކަން ކުރާ ޕީއެންސީ އާއި އިދިކޮޅު އެމްޑީޕީގެ ގިނަ ކެންޑިޑޭޓުން ވެސް އެކަން ކުރީ ގަވައިދާހިލާފަށެވެ.

މަގުމަތިންނާއި ސޯޝަލް މީޑިއާތަކުން އަކުރު ފޮންޓަށް މި ފަދަ 173 ކޭސްއެއް ފާހަގަވި އެވެ. އެ ތަފާސްހިސާބުތަކަށް ބަލާއިރު:

މި ތަފާސްހިސާބުތަކަށް ބަލާއިރު އެމްޑީޕީގެ 85 ކެންޑިޑޭޓުންނާއި ޕީއެންސީގެ 74 ކެންޑިޑޭޓުންގެ ފަރާތުން މި މައްސަލަ ފެންމަތިވި އެވެ.

"މިއުޅެނީ ހަމައެކަނި ކޮޕީރައިޓަށް ހޭލުންތެރިނުވުމުގެ މައްސަލަ އެކަންޏެއް ނޫން. މީގެން ދައްކައިދޭ އާޓިސްޓުންނަށް އިހްތިރާމް ނުކުރުން ވެސް،" އަކުރުޓައިޕްގެ އޮފިޝަލަކު ބުންޏެވެ.

ފޮންޓުތަކަށް އަގު ނުދައްކާ ބޭނުންކުރާތީ، އަކުރުޓައިޕުން ވަކިވަކިން އެ ބޭނުންކުރި މީހުންނާ ގުޅި އެވެ. އެކަމަކު އޭގެ ތެރެއިން ބައެއް މީހުން، 'އެއީ ގަންނަން ޖެހޭ އެއްޗެއް ކަމެއް ނޭނގޭ' ކަމަށް ބުނެ ޖަވާބުދިން އިރު، 'އެ ގަންނާކަށް ނުޖެހޭނެ'އޭ ކިޔައިގެން ޒުވާބުކުރި މީހުން ވެސް އުޅެ އެވެ. އަނެއް ބަޔަކު ލާރި ބޭނުން ނަމަ ކޯޓަށް ދިޔުމަށް ވެސް އެދުނެވެ.

އަކުރުޓައިޕުން ބުނިގޮތުގައި ބައެއް ކެންޑިޑޭޓުން، އެތަނުގެ ފޮންޓުތައް އޭއައިގެ ޒަރީއާއިން ޓްރޭސް ނުވަތަ ކޮޕީކޮށްގެން ވެސް ބޭނުންކުރި އެވެ. އެހެންވެ، އެއަށް އަގު ދައްކަން އެ މީހުން ދެކޮޅު ހަދަ އެވެ. އެ މީހުންގެ ރައުޔަކަށް ވީ، ފޮންޓު ވެބްސައިޓުން ކޮޕީކޮށްފައި، އަތުގައި ނުބާއްވާ ނަމަ އެއަށް އަގު ދައްކަން ނުޖެހޭނެ ކަމަށެވެ.

ކެމްޕޭންގައި ބޭނުންކުރި އަކުރުޓައިޕުގެ ފޮންޓުތަކަށް ބަލާއިރު އެންމެ ގިނަ ބަޔަކު ބޭނުންކުރީ ކުރީގެ ރައީސް މައުމޫން އަބްދުލްގައްޔޫމްގެ އަތުލިޔުމުގެ ފޮންޓު، 'މައުމޫން' އެވެ. އަމިއްލަ ބޭނުންތަކަށް އެ ފޮންޓު އަކުރުފޮންޓުން ޑައުންލޯޑް ކުރެވެން އޮތް ނަމަވެސް، ވިޔަފާރި އާއި ޕްރޮމޯޝަންތަކަށް އެ ފޮންޓު ޖެހެނީ 3،000 ރުފިޔާއަށް ގަންނާށެވެ. ކެމްޕޭންގައި 85 ބަޔަކު އެ ފޮންޓު ބޭނުން ކުރިއިރު އެއަށް އަގު ދެއްކީ އެންމެ %15 މީހުންނެވެ.

ދެން އެންމެ ގިނަ ބަޔަކު ބޭނުންކުރީ ދިވެހި ޓައިޕް ފައުންޑަރީގެ 'މަލަސް' އާއި ހުސެން ވަހީދުގެ 'ރޯނު' ފޮންޓެވެ. މިއީ ވިއްކާ ދެ ފޮންޓް ނަމަވެސް ގަނެގެން އެ ބޭނުންކުރީ މަދު ބައެކެވެ.

ލައިސަންސް ނުނަގައި ފޮންޓު ބޭނުންކުރާ މައްސަލަ މިދިޔަ މަޖިލިސް އިންތިހާބުގެ ތެރޭގައި ވެސް ފެންމަތިވި އެވެ. އެކަމަކު އަކުރުޓައިޕުން ބުނިގޮތުގައި ކައުންސިލް އިންތިހާބުގައި އެ ނިސްބަތް ދެ ގުނަ އިތުރެވެ.

"ހަމައެކަނި ކެމްޕޭންތަކެއް ނޫން. ބޮޑެތި ކުންފުނިތަކާއި މިނިސްޓްރީތަކުން ވެސް އަގު ނުނަގާ އެބަ ބޭނުންކުރޭ ފޮންޓު. މީގެ ތެރެއިން ބައެއް ކުންފުނިތައް އަޅުގަނޑުމެން ވާނީ ޖޫރިމަނާ ވެސް ކޮށްފައި،" އޮފިޝަލް ބުންޏެވެ.

މި މައްސަލަ ފެންމަތިވުމުން، ބައެއް މީހުން ގުޅައި އަގު ދެއްކި ކަމަށް އޭނާ ބުންޏެވެ. އެކަމަކު އަކުރުޓައިޕް މާކެޓްޕްލޭސް ބޭނުންކުރާ ޓައިޕް ޑިޒައިނަރުންގެ ހައްގުތަކާއި ފިކުރީ މުދާ ރައްކާތެރި ކުރުމަށް، އަގު ނުދައްކާ މީހުންގެ މައްޗަށް ގާނޫނީ ފިޔަވަޅު އެޅުމުގެ ވިސްނުން ހުރި ކަމަށް ވެސް އެތަނުން ބުންޏެވެ.