ގާ ހުދުވުމުގެ މައްސަލަ: ބިން ހިއްކުމުގެ މަޝްރޫއުތައް މެދުކަނޑާލަން އެދިއްޖެ

ހޫނުގަދަވެ، ރާއްޖޭގެ ފަރުތަކުގެ ގަލާއި މުރަކަ ހުދުވުމުގެ މައްސަލަ ކުރިމަތިވުމުގެ ފުރުސަތު އޮތުމުން، ސަރުކާރުން ހިންގާ ބިން ހިއްކުމުގެ މަޝްރޫއުތަކާއި ގުޅުން ހުރި އެ ފަދަ މަސައްކަތްތައް މެދުކަނޑާލުމަށް، ކަމާ ބެހޭ ޖަމިއްޔާއަކުން އެދެފި އެވެ.

ވީ ކިހިނެއް؟ - މޯލްޑިވްސް ރިސިލިއެންޓް ރީފްސް (އެމްއާރުއާރު) އިން މިއަދު ބުނި ގޮތުގައި، ރާއްޖޭގައި ގާ ހުދުވުމުގެ މައްސަލަ ކުރިމަތިވެދާނެތީ ސަމާލުވުމަށް 'ނޯއާ ކޮރަލް ރީފް ވޮޗު'ން ވަނީ މީގެ ދެ ދުވަސް ކުރިން އެލާޓް ނެރެފަ އެވެ. އަދި ކުރިއަށް އޮތް 12 ހަފުތާ ތެރޭގައި މި ހާލަތު އިތުރަށް ގޯސްވެދާނެތީ އެލާޓް ލެވެލް-1އަށް ގިންތި ކުރެވިދާނެ ކަމަށް ބުނެފައިވާ ކަމަށް އެ ޖަމިއްޔާއިން ބުންޏެވެ.

ގުޅުން ހުރި ކަމެއް - ކަނޑުގެ ފިނިހޫނުމިން މަތިވެ، ރާއްޖޭގެ ފަރުތަކުން ގާ ހުދުވުމުގެ މައްސަލަ ކުރިމަތިވާތީ، ބިން ހިއްކުމާއި ގުޅުން ހުރި ތަރައްގީގެ މަޝްރޫއުތައް 2024ގެ ތެރޭގައި ވެސް މެދުކަނޑާލި އެވެ. ސަރުކާރުން އޭރު މަސައްކަތްތައް މެދުކަނޑާލީ އެލާޓް ލެވެލް-1އަށް އެރުމުންނެވެ.

ބުނީ ކީކޭ؟ - އެމްއާރުއާރުން ބުނީ އަނެއްކާވެސް ހާލަތު ގޯސްވުމުގެ ފުރުސަތު އޮތުމުން މިހާރުއްސުރެ ފިޔަވަޅު އެޅުން މުހިއްމު ކަމަށެވެ. އެގޮތުން، އެ ޖަމިއްޔާއިން އެދުނީ:

ގާ ހުދުވުމަށް މެދުވެރިވާ ސަބަބެއްގެ ގޮތުގައި އެ ޖަމިއްޔާއިން ބުނީ، އެއީ ގިނަ ދުވަސްތަކެއް ވާންދެން ކަނޑުގެ ލޮނުގަނޑުގެ ހޫނުމިން އާދަޔާހިލާފަށް މަތީގައި ހުރުމުން ކަމަށެވެ. އެ ހޫނުމިން އާދައިގެ މިންވަރަކަށް ދަށްވެއްޖެ ނަމަ، މުރަކަތަކަށް އަލުން ފެހިކަން ލިބި އޭގެ ކުލަ އިއާދަވުމުގެ ފުރުސަތު އޮވެ އެވެ. އެކަމަކު ހޫނުގަދަ ދުވަސްތައް ދެމިގެންދާ ނަމަ މުރަކަތައް މަރުވެ، ފަރުތައް މުޅިން ހަލާކުވެ އެވެ.

އެނގުން މުހިއްމު - ދުނިޔެއަށް ކުރިމަތިވި ގާހުދުވުމުގެ ހާދިސާތަކުގެ ތެރެއިން ރާއްޖެއަށް އެންމެ ބޮޑު ގެއްލުމެއް ލިބިފައިވަނީ 1998 ވަނަ އަހަރާއި 2016 ވަނަ އަހަރާއި 2023 ވަނަ އަހަރު އެވެ.