އުމަރު ޒާހިރަކީ ގައުމީ ލެޖެންޑެއް؛ ލިބުނު ގެއްލުން ބަޔާނެއް ނުކުރެވޭނެ: މައުމޫން

ކޮވިޑް-19ގައި މިއަދު އަވަހާރަވި ދައުލަތުގެ ހިދުމަތްތެރިޔާ އުމަރު ޒާހިރަކީ 'ގައުމީ ލެޖެންޑެއް' ކަމަށް ކުރީގެ ރައީސް މައުމޫން އަބްދުލްގައްޔޫމް ސިފަކުރައްވައިފި އެވެ.

ވީ ކިހިނެއް؟ - އުމަރު ޒާހިރު ކޮވިޑަށް ޕޮޒިޓިވް ވީ ފުވައްމުލަކުގައި އަމިއްލަފުޅަށް އިމާރާތްކޮށްދެއްވި މިސްކިތެއް ހުޅުވަން އެ ރަށަށް ކުރެއްވި ދަތުރުފުޅަށް ފަހު މާލެ ވަޑައިގަތް ފަހުންނެވެ. އަދި މި މަހު 11ގައި ދަރުމަވަންތަ ހޮސްޕިޓަލްގައި އެޑްމިޓްކުރި އެވެ.

އުމަރު ޒާހިރު އަވަހާރަވީ އުމުރުފުޅުން 85 އަހަރުގައި މިއަދު މެންދުރު 2:02 ހާއިރު އެވެ.

ތަފްސީލް - އުމަރު ޒާހިރަކީ 50 އަހަރަށް ވުރެ ގިނަ ދުވަހު ގައުމަށް ގިނަ ހިދުމަތްކުރެއްވި، ދައުލަތުގެ މަތީ މަގާމްތަކެއް ފުރުއްވި ބޭފުޅެކެވެ. މައުމޫންގެ ވެރިކަމުގައި މިނިސްޓަރުކަމުގެ ޒިންމާތައް ވެސް އުފުއްލެވި އެވެ. ގައުމީ ބޮޑެތި މަޝްރޫއުތައް ހިންގެވުމާއި އެ މަސައްކަތްތައް ހިނގާނުހިނގާ ގޮތް ބެއްލެވުމާއި އިޖުތިމާއީ އަދި ގައުމީ ވަރަށް ގިނަ ކަންކަމުގައި ހަރަކާތްތެރިވެވަޑައިގަތުމުގެ ލާމަސީލު މިސާލެކެވެ.

މައުމޫން ކުރެއްވި ޓުވީޓެއްގައި ވިދާޅުވީ އުމަރު ޒާހިރު ވަކިވެގެން ދިއުމުގެ ސަބަބުން ގައުމަށް ލިބުނު ގެއްލުން ބަޔާން ވެސް ނުކުރެއްވޭނެ ކަމަށެވެ.

"އެއީ އެތައް ބައެއްގެ ލޯބި ހޯއްދެވި، ހަގީގީ ގައުމީ ލެޖެންޑެއް،" މައުމޫން ވިދާޅުވި އެވެ.

އެ މަނިކުފާނު ވިދާޅުވީ ފާއިތުވި 50 އަހަރު ރާއްޖެ ހާސިލުކުރި ކޮންމެ ކާމިޔާބީއެއްގެ ފަހަތުގައި އުމަރު ޒާހިރުގެ ހިއްސާ އޮންނާނެ ކަމަށެވެ.

ގުޅުން ހުރި ކަމެއް - އުމަރު ޒާހިރު އަވަހާރަވުމުގެ ހިތާމައިގައި މާދަމާއިން ފެށިގެން ތިން ދުވަހަށް ގައުމީ ދިދަ ބައި ދަނޑިއަށް ތިރިކުރަން ރައީސް އިބްރާހިމް މުހައްމަދު ސޯލިހު ވަނީ އިއުލާންކުރައްވައިފަ އެވެ.

އިތުރަށް ކިޔާލަން -