އުމަރު ޒާހިރާއި ރައީސް އިބްރާހިމް މުހައްމަދު ސޯލިހު.
އުމަރު ޒާހިރު އަވަހާރަވުމާ ގުޅިގެން 3 ދުވަހަށް ގައުމީ ދިދަ ބައިދަނޑިއަށް ތިރިކުރަނީ
ކޮވިޑް-19 ޖެހިގެން ފަރުވާ ހޯއްދަވަމުން ދަނިކޮށް ދައުލަތުގެ ހިދުމަތްތެރިޔާ އުމަރު ޒާހިރު މިއަދު އަވަހާރަވުމާ ގުޅިގެން، ތިން ދުވަސް ވަންދެން ގައުމީ ދިދަ ބައިދަނޑިއަށް ތިރިކުރަން ރައީސް އިބްރާހިމް މުހައްމަދު ސޯލިހް ނިންމަވައިފި އެވެ.
ވީ ކިހިނެއް؟ - އުމަރު ޒާހިރު ކޮވިޑަށް ޕޮޒިޓިވް ވީ ފުވައްމުލަކުގައި އަމިއްލަފުޅަށް އިމާރާތްކޮށްދެއްވި މިސްކިތެއް ހުޅުވަން އެ ރަށަށް ކުރެއްވި ދަތުރުފުޅަށް ފަހު މާލެއަށް އެނބުރި ވަޑައިގަތް ފަހުން ހުންއައިސް، ހާލުކޮޅު ގޯސްވުމުން ހެދި ޓެސްޓްތަކުންނެވެ. އަދި މި މަހުގެ 11ގައި ދަރުމަވަންތަ ހޮސްޕިޓަލްގައި އެޑްމިޓްކުރި އެވެ.
އުމަރު ޒާހިރު އަވަހާރަވީ، އުމުރުފުޅުން 85 އަހަރުގައި މިއަދު މެންދުރު 2:02 ހާއިރު އެވެ.
ތަފްސީލް - ރައީސް އޮފީހުން ނެރުނު ބަޔާނެއްގައި ބުނީ އުމަރު ޒާހިރު އަވަހާރަވުމުގެ ހިތާމައިގައި މާދަމާ އިން ފެށިގެން އަންނަ ބުރާސްފަތި ދުވަހުގެ ނިޔަލަށް ގައުމީ ދިދަ ބައިދަނޑިއަށް ތިރިކުރުމަށް ރައީސް ނިންމަވާފައިވާ ކަމަށެވެ.
އުމަރު ޒާހިރަކީ 50 އަހަރަށް ވުރެ ގިނަ ދުވަހު ގައުމަށް ގިނަ ހިދުމަތްތަކެއް ކޮށްދެއްވާފައިވާ ބޭފުޅެކެވެ. ގައުމީ ބޮޑެތި މަސައްކަތްތައް އަމަލީ ގޮތުން ހިންގެވުމާއި އެ މަސައްކަތްތައް ހިނގާނުހިނގާގޮތް ބެއްލެވުމާއި އިޖުތިމާއީ އަދި ގައުމީ އެންމެހާ ކަންކަމުގައި ހަރަކާތްތެރިވެވަޑައިގަތުމުގެ ލާމަސީލު މިސާލެކެވެ.
އިތުރަށް ކިޔާލަން -