އެޕްސްޓީންއާ ގުޅުން ބޭއްވި ވަހީދު ރައީސްގެ މަންދޫބުގެ މަގާމުން އިސްތިއުފާދެއްވައިފި

ކުޑަކުދިންނަށް ޖިންސީ ގޯނާކޮށް އަދި އެ ކުދިންގެ ބަރަހަނާ މަންޒަރު ވީޑިއޯކޮށް، ނުފޫޒު ގަދަ މީހުންނަށް އެ ކުދިން ވިއްކި ސެކްސް ޓްރެފިކަރު، އެމެރިކާގެ ޖެފްރީ އެޕްސްޓީންއާ ގާތް ގުޅުންތަކެއް ބޭއްވި ރާއްޖޭގެ ކުރީގެ ރައީސް މުހައްމަދު ވަހީދު، ރައީސް މުހައްމަދު މުއިއްޒުގެ ސްޕެޝަލް އެންވޯއީގެ މަގާމުން މިއަދު އިސްތިއުފާ ދެއްވައިފި އެވެ.

ވީކިހިނެއް؟ - ރައީސް އޮފީހުން މިއަދު ބުނީ ވަހީދު، ރައީސްގެ ސްޕެޝަލް އެންވޯއީގެ މަގާމުން އިސްތިއުފާ ދެއްވައި މިއަދު ހެނދުނު ސިޓީ ފޮނުއްވާފައިވާ ކަމަށެވެ.

ތަފްސީލް - އެޕްސްޓީންގެ މެއިލްތައް ހިމެނޭ ފައިލްތައް އެމެރިކާގެ ޖަސްޓިސް ޑިޕާޓްމަންޓުން އާންމުކޮށްފައިވާއިރު، ވަހީދު އެޕްސްޓީނަށް ފޮނުއްވި ބައެއް މެއިލްތައް ސޯޝަލް މީޑިއާގައި އާންމުވުމުން އެ މަނިކުފާނުގެ އިސްތިއުފާއަށް އާންމުން ދިޔައީ ގޮވާލަމުންނެވެ.

އެއިން ފާހަގަކޮށްލެވޭ އެއް ކަމަކީ ޓޫރިޒަމްގެ މަޝްރޫއަކާ ގުޅޭ ގޮތުން ވަހީދު ފޮނުއްވި މެއިލްތަކެވެ. އެގޮތުން:

މީގެ އިތުރުން، ވަހީދު ނައިބު ރައީސް އާއި ރައީސްގެ މަގާމު ފުރުއްވި ފަސް އަހަރުގެ ކަންކަމުގެ މައްޗަށް އިނގިރޭސިން ފޮތެއް ނެރެން މަސައްކަތްކުރާ ކަމާއި އެ ކަމަށް ބޭނުންވާ ފައިސާ ހޯދުމަށް ނޫނީ އެމެރިކާއިން އެ ފޮތް ނެރެދޭނެ ފަރާތެއް ހޯދައިދިނުމަށް ވަހީދު އެދިވަޑައިގެންފައިވެ އެވެ.

ވަހީދުގެ އިސްތިއުފާއާ ގުޅޭ ގޮތުން އެ މަނިކުފާނުގެ އޮފީހުން މިއަދު ނެރުނު ބަޔާނެއްގައި ބުނީ އެޕްސްޓީންއާ އެކު އެ މަނިކުފާނު ބައްދަލުކުރެއްވީ ދެ ފަހަރެއްގެ މަތިން ކަމަށާއި އެ ދެ ބައްދަލުވުމަކީ ވެސް ރަސްމީ ހައިސިއްޔަތުން ބޭއްވި ބައްދަލުވުންތަކެއް ކަމަށެވެ.

ފުރަތަމަ ބައްދަލުވުމަކީ 23 ސެޕްޓެމްބަރު 2012ގައި ބޭއްވި ބައްދަލުމެއް ކަމަށާއި ރޭގަނޑުގެ ކެއުމުގެ އެ ބައްދަލުވުމުގައި ސަރުކާރުގެ އިސްވެރިން ވެސް ބައިވެެރިވެވަޑައިގެންނެވި ކަމަށް ވަހީދުގެ އޮފީހުން ނެރުނު ބަޔާނުގައި ބުންޏެވެ.

ދެވަނަ ފަހަރަށް ވަހީދު އެޕްސްޓީންއާ ބައްދަލުކުރެއްވީ އެ މަނިކުފާނުގެ ދަރިކަލުން ޖެފްރީ ސާލިމް ވަހީދާ އެކު 18 މޭ 2014ގައި ކަމަށް ވެސް އެ ބަޔާނުގައި ބުންޏެވެ. އެގޮތުން:

ވަހީދުގެ އޮފީހުން ނެރުނު ބަޔާނުގައި ބުނީ އެޕްސްޓީިންއާ ބައްދަލުކުރެއްވި އިރު އޭނާގެ މައްޗަށް 2008 ވަނަ އަހަރު ކުރި ތުހުމަތާއި އެކަމާ ގުޅޭ މައުލޫމާތު ސާފުވެފައި ނެތް ކަމަށެވެ. އެކަން އެނގިވަޑައިގެންފައި އޮތް ނަމަ، އެޕްސްޓީންއާ އެކު ބޭއްވެވި ފުރަތަމަ ބައްދަލުވުމަށް ފަހު އިތުރު ބައްދަލުވުމެއް އަދި މުއާމަލާތެއް ވެސް ނުހިންގެވީސް ކަމަށް އެ ބަޔާނުގައި ބުންޏެވެ.