ގްރޭޑް 4 އިން މަތީގެ ދަރިވަރުންގެ އާ ޔުނީފޯމުގައި ހަރުވާޅު ލާޒިމް

ސްކޫލުތަކުގެ އާ ޔުނީފޯމުގެ އުސޫލުގައި، ގްރޭޑް ހަތަރަކުން މަތީގެ އަންހެން ދަރިވަރުން، ހަރުވާޅުލާން ޖެހޭ ގޮތަށް ހަމަޖައްސައިފި އެވެ.

ވީ ކިހިނެއް؟ - ރާއްޖޭގެ ހުރިހާ ސްކޫލެއްގެ ޔުނީފޯމު ވަކި ކުލަތަކެއްގައި އެއްގޮތްކުރުމަށް އެޑިއުކޭޝަން މިނިސްޓްރީން ވަނީ ނިންމާފަ އެވެ. އެއާއެކު ޔުނީފޯމުތައް ހުންނާނެ ގޮތުގެ ކުރެހުން މިހާރު ސްކޫލުތަކަށް ވަނީ ފޮނުވާފަ އެވެ.

އާ އުސޫލުގައި އޮތްގޮތުން ކީ ސްޓޭޖް-2 ނުވަތަ ގްރޭޑް ހަތަރަކުން މަތީގެ ދަރިވަރުންގެ ޔުނީފޯމުގައި ހަރުވާޅު ވަނީ ލާޒިމްކޮށްފަ އެވެ. ބުރުގާ އަޅާ އަދި ނާޅާ ދަރިވަރުންނަށް ވެސް ދެ އިހްތިޔާރެއް ވަނީ ދީފަ އެވެ.

ތަފްސީލް - އަންހެން ކުދިންގެ ޔުނީފޯމަށް ބަލާއިރު:

ފައުންޑޭޝަން ސްޓޭޖް ނުވަތަ ޔޫކޭޖީ-އެލްކޭޖީގެ ދަރިވަރުންނާއި ގްރޭޑް 1-3 އިން ހިމެނޭގޮތަށް، ކީ ސްޓޭޖް 1ގެ ދަރިވަރުންގެ ޔުނީފޯމު ވެސް ހުންނަނީ ހަމަ މިގޮތަށެވެ. އެކަމަކު އެ ކުދިންނަށް ހަރުވާޅުލުމާއި ނުލުމުގެ އިހްތިޔާރު އޮންނަނީ ދީފަ އެވެ.

ފިރިހެން ކުދިންގެ ޔުނީފޯމަށް ބަލާއިރު:

ހުރިހާ ދަރިވަރުންގެ ވެސް ރަސްމީ ޔުނީފޯމުގެ ގަމީހުގެ ކުލަ އަކީ ހުދު، މަޑު ރަތް، އުޑުނޫ ނޫނީ ޓީލް ގްރީން އެވެ. ހަރުވާޅާއި ސްކާޓް އަދި ސޯޓު ހުންނަން ޖެހޭނީ ކަޅު ކުލަ ނޫނީ ނޭވީ ބްލޫކުލައިގަ އެވެ.

ބުރުގާ އަޅާ ދަރިވަރުންގެ ބުރުގާގެ ކުލައިގައި ދެ އިހްތިޔާރެއް ވަނީ ދީފަ އެވެ. އެއީ ޔުނިފޯމާ އެއްކުލައެއްގެ އެކަމަކު އެއަށް ވުރެ ގަދަ ކުލައެއްގެ ބުރުގާ އެޅުން ނޫނީ ނޭވީ ބްލޫ އާއި ރޯޔަލް ގްރީން ޑާކް ރެޑް އާއި ހުދު ކުލައިގެ ބުރުގާއެއް އެޅުމެވެ.

އަޅާނެ ކުލައެއް ހަމަޖައްސާނީ ކުރާނީ ސްކޫލުންނެވެ.

ސްކޫލުތަކުގެ އިސްވެރިންނާ މަޝްވަރާކުރުމަށް ފަހު ހަމަޖެއްސި މި އުސޫލަށް 2027 ވަނަ އަހަރު އަމަލު ކުރަނީ، އެކަމަށް ތައްޔާރުވުމަށް ވަގުތު ދިނުމުގެ ގޮތުން ކަމަށް އެޑިއުކޭޝަން މިނިސްޓްރީން ވަނީ ބުނެފަ އެވެ.