އަންނަ އޭޕްރީލާ ހަމައަށް މާލެ ސަރަހައްދުގެ ބިން ހިއްކާ ނިމޭނެ: ރައީސް

އަންނަ މާޗު ނުވަތަ އޭޕްރީލް މަހާ ހަމައަށް މާލެ ސަރަހައްދުގައި ބޯހިޔާވަހިކަމަށް ހިއްކަން ޖެހޭ ހުރިހާ ބިމެއް ހިއްކައި ނިމޭނެ ކަމަށް ރައީސް މުހައްމަދު މުއިއްޒު ރޭ ވިދާޅުވެއްޖެ އެވެ.

ވީ ކިހިނެއް؟ - މައްޗަންގޮޅީ ރައްޔިތުންނާ ބައްދަލުކުރެއްވުމަށް އަމީނިއްޔާ ސްކޫލުގައި ރޭ ބޭއްވި ބައްދަލުވުމުގައި ރައީސް ވިދާޅުވީ، ބޯހިޔާވަހިކަން ފޯރުކޮށްދިނުމަށް އެ މަނިކުފާނު ވެވަޑައިގެންފައިވާ ވައުދަކީ ފުއްދޭނެ ވައުދެއް ކަމަށާއި އެ ވައުދު ފުއްދަވާނެ ކަމަށެވެ.

ބުނީ ކީކޭ؟ - "އަޅުގަނޑު ރައްޔިތުންނަށް ވީ ވައުދު، ހައުސިން ވައުދަކީ ފުއްދޭނެ ވައުދެއް. ފުއްދާނެ ވައުދެއް. މިހާރު ވެސް މިއޮތީ ވަރަށް ގިނަ މަސައްކަތް ކުރެވިފައި،" ރައީސް ވިދާޅުވި އެވެ.

"ބިން ކްރިއޭޓު މިވަނީ އިރާދަކުރެއްވިއްޔާ. މި އަންނަ މާޗު، އޭޕްރީލާ ހަމައަށް ދާއިރު މި އޮތީ މާލެ ސަރަހައްދާއި ރަސްމާލެ ހިމެނޭހެން ހިއްކެން އޮތް ހުރިހާ ތަނެއް ހިއްކާ މި ނިމެނީ."

ރައީސް ވަނީ ބިން ހިއްކުމުގެ މަސައްކަތްތައް ކުރިއަށްދާ ގޮތުގެ މައުލޫމާތު ވެސް ހިއްސާކުރައްވައިފަ އެވެ.

އެގޮތުން ވިދާޅުވީ:

ރައީސް ވިދާޅުވީ ގޯތީގެ އަދި ފްލެޓުގެ މައްސަލަ މި ދައުރު ނިމޭއިރު ހައްލުވާނެ ކަމަށެވެ.

"މާލޭގައި ދިރިއުޅޭ އެއްވެސް ވަރެއްގެ ބޯހިޔާވަހިކަމެއް ނެތް، ފަސްޓް ހޯމް ނެތް 18 އަހަރުން މަތީގެ އެންމެންނަށް އެ މައްސަލަ ހައްލުވާނެކަމުގެ ފުރިހަމަ ޔަގީންކަން އޮތީމާ އަދިވެސް އެއް ފަހަރު އެ ޔަގީންކަން ތިބޭފުޅުންނަށް ދެން،" އެ މަނިކުފާނު ވިދާޅުވި އެވެ.

ގުޅުން ހުރި - ބޯހިޔާވަހިކަމުގެ މައްސަލައަށް ފުރިހަމަ ހައްލެއް ގެނެސްދިނުމަށް ރަސްމާލެ އިން 15،000 ގޯތި އަދި މާލެ ސަރަހައްދުން 7،000 ފްލެޓު ދޭނެކަން ރައީސް ވަނީ މިދިޔަ ޖުމްހޫރީ ދުވަހު އިއުލާނު ކުރައްވައިފަ އެވެ. އެ ފްލެޓުތަކަށާއި ގޯތިތަކަށް ކުރިމަތިލާން އަންނަ ޖެނުއަރީ މަހު ހުޅުވާލާނެ އެވެ.